Imilimo ya batumwa 4
4
Batwala Petulo na Yohane kuchilye cha Bayuda
1Ulo Petulo na Yohane balikusosa nabantu, kwayishile bachipupila nomukulu wabakulinda kunanda yaku Lesa na Basaduki. 2Mba bantu balikalipile pantu Petulo na Yohane balikusambisha abantu ukuti Yesu alibuka kubafwa. Ekwebati abafwa bonse bakubuka. 3Echo balibekete nokubaposa muchifungo ukufikila uluchelo pantu chali ichungulo. 4Nomba abantu abenji abaumfwile nokuchetekela amashiwi akwa Petulo na Yohane, impendwa yabalalume abachetekele yali kubati makana asano.
5Muluchelo abakulu ba Bayuda, bachilolo nabasambishi ba Mafunde akwa Mosesi balongene mu Yelusalemu. 6Kwalipo na Anasi chipupila mukulu, Kayafasi, Yohane na Alekisanda nabonse abamulupwa lwakwa bachipupila mukulu. 7Batekele abatumwa kuntanshi yabo. Batatikile ukubafumba ati, “Kanshi mwachitile shani mfi? Nikufiso fyaku nani nangula lishina lyaku nani mwabomfweshe?”
8Elo Petulo, uwayiwile no Mupashi Wabuta, abasukile ati, “Mwe ntungulushi nabafilolo, 9kati tukolubulula pamulandu wamulimo uwawama uwachitwa kumuntu ngu uwali chite nefyo apolele! 10Mwebo bonse mwishibe pamo nabena Isilaeli ukuti ngu umwalalume uwimakene mpano alipolele pamulandu wafiso fyaku Yesu Klistu uwaku Nasaleti. Enka ngulya mwasamike pamutashi, kuntu Lesa alimubushishe kubafwa. 11Ngu Yesu eye chalembelwapo ukuti,
‘Ilibwe ndilya mwe bakwimaka mwasulile,
elyayishile kuba lyapachimfuntu!’
12Ukupuluka kusangwa muli Ye epela pantu takupo ishina limbi panonshi Lesa apela kubantu ilyo twingapulukilamo.”
13Ulo abachilye babwene ukupama kwakwa Petulo na Yohane, balishimbilwe ukwinekantu. Nakambi baumfwile ukuti mba bali bantu bwaka abatasambililapo ukwinekantu. Penkapo balishibile ukuti basambishi baku Yesu. 14Pakuba tabakwetepo amashiwi ayafitala pantu balikubona umuntu uwapolele alimakene pamo na Yohane na Petulo. 15Elo babebele ukuti bafumine panse. Kunuma abachilye batatikile ukufumbashanya 16ati, “Mba bantu tubachite shani? Abantu bonse muno Yelusalemu balishibile ichakushimbwisha icho bachitile. Elo nafwebo tekuti tukanepo iyowo! 17Pakuti umulandu wilundulukilako kubantu bonse, nomba katubatinye bwaka ukwebati belokusosapo mwishina lyaku Yesu kumuntu onse.”
18Elo babetile muchilye nokubakonkobesha ati, “Tekweshapo nakambi ukulumbula nangula ukusambisha mwishina lyaku Yesu.” 19Nomba Petulo na Yohane baasukile abamuchilye ati, “Pinguleni mwebene ichilungeme pamenso aku Lesa, napo nimwe tuli nokumfwila, nangula ni Lesa? 20Fwebo tekuti tulekepo ukushimikila ifintu ifyo twayibwenene nokuyumfwila.” 21Nomba abachilye balibweleshepo ukubatinya ukuti belokuchitapo mfi. Penkapo balibalekele, pakuba tabasangilepo umulandu uwakubapela pantu abantu bonse balikutondayisha Lesa pachakushimbwisha icho bachitile. 22Nomuntu ngulya uwapolele munshila nji achilile napamyaka amakumi ane iyakufyalwa.
Ukulomba kwabena Klistu
23Ulo ichilye chabalekele, Petulo na Yohane babwelele kubanabo nokuya beba fyonse ifyo intungulushi shabachipupila nabachilolo basosele. 24Abanabo pakumfwa mfi, balombele kuli Lesa ati, “Mwe Bashikulu, mwe babumbile umulu nechalo, bemba nafyonse ifyabamo. 25Ukupitila mu Mupashi Wabuta nimwe mwasosele kuli Davide umupyungi wenu ulo asosele ati,
‘Chindo icho abenafyalo bakalipile,
mulandu ndo abantu balikupekanya ifyabwaka?
26Imfumu shapano chalo shayipekanya,
intungulushi shakumana pamo,
bakopingila Bashikulu no Wasubwa wabo.’
27Nachine Helodi na Pontiyasi Pilato bakumene muno mwenka mumushi pamo nabenafyalo nabena Isilaeli. Balikupinga ukulwisha Yesu Umupyungi wenu Uwabuta uyo Wasubilwe. 28Bakumene ukuchita ifyo webo wapangile kale ukupitila mufiso nobufwayo bwako ukuti fichitike. 29Nomba mwe Bashikulu boneni ifyo bakotutinya! Twafwilisheniko fwe bapyungi benu ukuti tusose amashiwi enu ukwambula ukutina. 30Tambululeni ukuboko kwenu ukuti muposhe abantu nakambi mulenge ukuti ifiso fwenu ifikulu fiboneke mwishina lyaku Yesu Umupyungi wenu Uwabuta.”
31Ati bapwe ukulomba, pachifulo apo balongene patatikile ukutenta. Elo bonse bayiwile no Mupashi Wabuta, batatika nokusosa amashiwi aku Lesa ukwambula ukutina.
Ifyo abena Klistu baakene ububoni bwabo
32Ibumba lyabantu abachetekele muli Klistu lyalikuchita ifintu munshila imo nomutima umo. Tapalipo nowakweba ati, “Ububoni mbu bwanji nenka” iyowo. Nomba ifyo umuntu nomuntu akwete fyali fyabonse pamo. 33Abatumwa balikupela bukamboni nefiso ubwakuti Bashikulu Yesu balibukile kubafwa nakambi Lesa alikubashukisha bonse. 34Kanshi takwalipo muli bo umuntu nangu umo uwalikuchulila akantu. Bonse abakwete amabala nangula amananda balikuyashitisha, nendalama ishalikubonekamo, 35balikuleta kubatumwa. Nabo balikwakanya bonse ukulingana nokuchula kwamuntu.
36Elo kwalipo nomuntu umo uwalikwitwa Yosefe, umwina Lefi, uwafyalilwe muchalo cha Saipulasi, uwo abatumwa balikwita Banabasi, (ilikoyalula “Umuntu Uchinchisha.”) 37Ngu Banabasi alikwete ibala, alishitishe, nendalama ishabonekelemo ashiletele kubatumwa.
Chilala New Testament © Bible Society of Zambia, 1998.