Imilimo ya batumwa 2
2
Ukwisa kwa Mupashi Wabuta
1Ulo akasuba ka Pentekosite kafikile, abachetekela bonse balongene muchifulo chimo. 2Bwangu-bwangu kwaumfwikile ichiunda ichikulu ukufuma kumulu ichali ukubati chipupu nokwiula inanda yonse umo bayikele. 3Penkapo babwene ukubati nindimi shamulilo shayikele pali umo-umo waku bo. 4Elo bonse bayiwile no Mupashi Wabuta. Batatikile nokusosa mundimi ishapusana-pusana kubati ifyo Mupashi afwayile ukuti balokusoselamo.
5Nomba mu Yelusalemu mwalipo Abayuda abalikuchinshika Lesa abafumine mufyalo fyonse ifyapusana-pusana. 6Ulo baumfwile nchi chiunda, abantu abenji balongene pamo. Bonse balishimbilwe pakuti umo-umo waku bo alyumfwile ifyo abatumwa balikusosa mundimi shabo. 7Mba bantu balishimbilwe ukwinekantu. Elo basosele ati, “Ala! Napo mba bonse abakososa mfi tebena Galilipo? 8Nga kanshi chaba shani fwebo umo-umo tukobomfwila mundimi isho twafyalilwamo? 9Fwe bafuma kuchalo cha Palitiya, Mediya naku Elamu. Fwe baku Mesopotamiya, Pontusi naku Asiya. 10Bambi bafuma ku Fulusiya na Pamfiliya, Ijipiti namumipoka yachalo cha Libiya mupepi na Sayilini. Elo fwebo bambi tuli beni bafuma ku Loma. 11Kwalipo Abayuda nabenafyalo abaalukile nokukonka ifya Chiyuda. Fwebo bambi tufuma ku Kileti naku Alabiya. Nangu chibe mfi, bonse tukobomfwa bakososa mundimi shesu. Bakososa ifintu ifikulu ifyo Lesa achitile!” 12Nomba bonse balishimbilwe nokupelwa amano. Elo balikubushanya bati, “Ngechi chintu chikoyalule ndo?”
13Nomba bambi batatikile ukubakweluluka abatumwa bati, “Hehe! Mba bantu bakolelwe bwaka ubwalwa.”
Petulo asambisha abantu
14Elo Petulo ayimakene pamo nabatumwa banakwe ikumi naumo, ayimisha neshiwi nokusosa ati, “Mwebo mwe Bayuda bananji, namwebo bonse abekala mu Yelusalemu, umfwikisheni ngu mulandu. 15Mba bantu tabakolelwepo ubwalwa iyowo, ukubati ifyo mukolanguluka, nakambi ino ninshita ya 9 koloko waluchelo bwaka. 16Nomba nchi ichibonekele nincho ichaebelwe nomusoseshi Yoele ati,
17‘Lesa asosele ati, munshiku shakulekelesha,
nakubapela Mupashi wanji.
Elo abana benu abalalume nabanakashi bakubilisha
amashiwi anji.
Abalumbwana bali kubona ifibonwa,
nabakote benu balikulota ifyoshi.
18Ina, nakwitulwila Umupashi wanji pabapyungi banji,
abalalume nabanakashi munshiku isho.
Elo bakubilisha amashiwi anji.
19Nakuchita ifyakushimbwisha mumulu nefipapwisho
pano chalo.
Kwakuba umulopa, umulilo nokufutuma kwachushi.
20Akasuba kakufita fititi,
umweshi wakusweta chee kubati mulopa
ulo butalafika ubushiku ubwachinshikwa Bashikulu,
21Nomba abantu bonse abalikwita peshina lyaku Bashikulu,
ebakwisa kupuluka.’
22“Mwe bena Isilaeli bananji, umfweni amashiwi anji. Yesu waku Nasaleti ali muntu uwo Lesa abweneshe ukuti eye asala. Nchi achibweneshe ukupitila mufiso ifikulu ifyakushimbwisha nefishibilo ifyo Lesa achitile muli Ye. Nokwishiba mwebene mwalishiba pantu fyalikuchitika pali mwebo. 23Elo Lesa, mumapange akwe aapingwile kale ukuti Yesu akuposwa muminwe yenu. Nachine mwalimwipeye pakusuminisha abantu ababi ukuti bamusamike pamutashi. 24Nomba Lesa alimubusha nokumupulusha kubukali bwamfwa pantu chalikangile ukuti imfwa imuchimfye.
25Pakuba eye Davide asoselepo ati,
‘Nabwene Bashikulu bali pamenso anji,
lonse bali mupepi nandibo ukuti nikachula.
26Emulandu wine umutima wanji ukosekelela,
namashiwi anji aakwanga.
Ina, nangu naba mwina-kufwa,
nakutusha nokulindila muchichetekelo.
27Pantu mwebo tamwakanshepo kumanda,
nachine tamwakaleke Uwabuta wenu ukubola.
28Mwanangilile inshila ishitwala kubumi,
elo mulanenga ukusangalala
pakuti muli mupepi nane.’
29“Mwe bawesu, nkofwaya ukumweba bwino-bwino pamulandu wachikolwe chesu imfumu Davide. Ena alifwa nokushikwa, nemanda yakwe tuli nayo nalelo. 30Davide ali musoseshi. Elo alishibile ukuti Lesa alimulayile pakulapa ukwebatipabana bakwe akutekapo umo pabufumu kubati nimfilya Davide aali. 31Ulo Davide abwene ifyo Lesa akwisa kuchita kuntanshi, asosele ifyakubuka kwakubafwa kwaku Wasubwa waku Lesa ati,
‘Lesa tamulekeleshe munanda,
nomubili wakwe tawabolelepo iyowo!’
32Lesa abushishe Yesu ngu kubafwa, nafwebo bonse tuli bakamboni pali nchi. 33Elo Yesu alisumbwilwe nokwikala kukulyo ukwaku Lesa Wishi. Apokelele kuli Ye Umupashi Wabuta kubati nimfilya amulayile. Kanshi mfi mukobona nokumfwa bupe ubo Yesu apungwila pali fwe. 34Nomba Pantu Davide umwine takwelelepo kumulu iyowo, kuntu alisosele ati,
‘Bashikulu Lesa basosele kuli Bashikulu banji,
Ikala kumulyo kwanji,
35mbale mpilibule tupondo tobe,
tube ichakunyantapo amakasa obe.’
36“Kanshi mwe bena Isilaeli bonse mwishibe nchi ichakuti ngu Yesu uwo mwebo mwasamikile pamutashi, eye Lesa achita Imfumu no Wasubwa!”
37Pakumfwa mfi, abantu chabekete kumitima. Bafumbile Petulo nabatumwa banakwe ati, “Mwe bawesu, kanshi kuti twachita shani fwebo?”
38Elo Petulo abebele ati, “Lapileni nokubatishiwa bonse mwishina lyaku Yesu Klistu ukuti munakililwe kumabifyo enu. Elo mwakupokelela Umupashi Wabuta, ubupe bwaku Lesa.” 39Pakuba nimwe Lesa alayile pamo nabana benu, nabantu bonse ababa ukutali naabo Lesa akwita.
40Petulo asosele amashiwi ayenji nokubachenjesha ati, “Ipulusheni kukukandwa ukukoyishila nji nkulo.” 41Echo abenji balyumfwile nokuchetekela amashiwi akwa Petulo, elo balibatishiwe penka pakasuba nkalya. Kubati amakana atatu ebalundilweko kubantu abachetekela. 42Abachetekela mba balikukumana inshita shonse ukuti bomfwe ifyo abatumwa balikusambisha. Balikwikala mubwana-nkashi, balikulya nokulombela pamo.
Ukwikala kwabena Klistu
43Abatumwa balikuchita ifyafiso ifikulu nefyakushimbwisha ifinji ifyalikupapusha abantu bonse. 44Bonse abachetekela balikwikala pamo mubwana-nkashi nokwakana ububoni bakwete pakati kabo. 45Balikushitisha ububoni bwabo nafyonse ifyo bakwete, elo indalama isho balikusangamo balikwakanya kuli bonse ukulingana nefyo chila muntu alikukabila. 46Chila kasuba balikukumana pamo munanda yaku Lesa nomutima umo. Elo balikupokelela umulalilo#2.46 balikupokelela umulalilo: Balikulila pamo ifyakulya nokusefya umulalilo. mumananda yabo nokulya ifyakulya nemitima yansansa nokuyichefya. 47Balikutotela Lesa nokusangulusha abantu bonse. Elo inshiku shonse Bashikulu balikubalundilako nabambi abakupuluka.
Chilala New Testament © Bible Society of Zambia, 1998.