Camba 43

Benyaamin huniɗ na taambɗoh ciŋ ɗe Misra

1Aɗa uupeeɗa uup misik ŋ Kanaan. 2Wa ɓi kahan Yaŋhooɓa reehiɗ ñam beleeca ɓa ɓayohee Misra, a woosa kuɓuuciŋ ɗe ne : « Kaɗissaat, ɗu romɗissa ɓoo pesoha ƴissuut. » 3Yudaa loffa ɗe ne : « Ƴaara adgoh kur ka gapkiɗ ɓoo ne, a kanaat hotis ɓoo ŋ fikiice ne ɓoo hunɗi na taambɗoh ɓoo ɗah. 4Fu teyɗuk ne Benyaamin hun na ɓoo ɗah, ɓoo hey ɗa kee romɗa pesoha. 5Waaye fu sang ɗah, ɓoo heyɗi kee laam, ƴaara woyeen ɓoo hooliɗ ne : “ Taambɗoh ɓoo hunɗi na ɓoo ɗah, a kanaat hotis ɓoo ŋ fikiice. ” »

6Israayel woyissa ɓa ne : « Ɗu tooñiɗ to, wa ye tah ɗu woosa ƴaara ne ɗu raakiɗ taambɗoh wiiriis ? » 7Ɓa loffa ɗe ne : « Ƴaara kat a yi meeksee ɓoo, a meeksisseeɗa ɓoo ŋ ini kaɗ nga ɓoo na ɓi kahni an : “ Ndah baabiŋ ɓoo ris pes ? ” - “ Ndah ɓoo raakiɗ taambɗoh wiiriis ? ” Ɓoo loffa ɗe ŋ in ceem, ɓoo moosɗi liiɓoh ne a hey ɓoo woye ne ɓoo komaat ɗe taambɗoh ɓoo. »

8Yudaa degga nga ne : « Baab faɗa Benyaamin ŋ yaah ciŋ ngo, ɓoo kaɗ, ɓoo min pes, ɓoo na ɗa na kuɓuuciŋ ɓoo, ɓoo kaanuu. 9Ñam deguka, fu na hee so ɗe meekse ; ŋ komɗi ɗa ɗe ɗah, ineem taambɗaat to ŋ kipes kiŋ ngo jen. 10Ɓoo kaɗee kaɗ ɗah, wii hee raake ɓoo tumiɗ kot kanak. »

11Weɗi Israayel woyoh ɓa ne : « Nik ne wa ɗaa ɗah, tumaat an : Ɓayndohaat ŋ in ciŋ kur ki baahiɗ ci findi diw faan na kuum na cuuraay na daakaande na ɓi saal, pistas na amand ; ɗu tum ca ŋ saakuuciŋ ɗu, ɗu kom ƴaara ca taambil. 12Te ɗu ɓayndoh haalsi ɗu raak ŋ ɗooƴ saakuuciŋ ɗu ; wa miniɗ nik ne ɓa ɗaarkohee ɗaarkoh, ɗu nam ɓay haalis wiiriis romoha. 13Ɓayaat taambɗoh ɗu te ɗu kaɗ ɗiskaŋ ƴaara. 14Koohi Min ambohaat ɗu po ɗu misik ƴaara, a faɗis taambɗoh ɗu Simeyong na Benyaamin ɓa hayis na ɗu. Ŋ ini kaɗ nga so, nik ne maa hee hey ñake kuɓu ɗah, ŋ ñak rek. »

15Ƴaaɓa kooɗukka, ɓa ɓayya taambil ca, ɓa ɓayndohha haalis wiiriis degga ŋ wa ɓa kocee ɓay, ɓa hunnda na Benyaamin, ɓa raakka Yuusufa ŋ Misra. 16Wa Yuusufa hot ɓa huniɗ na Benyaamin, a woosa ƴaara adgoh kahan ce ne : « Ɓaya ƴaaɓii kahna, fu ap ɗoopaat, fu haɓiɗ kañam, ɓaa hee ñaktuke na so woti. »

17Ƴaara tummba ina Yuusufa woo ɗe, a ɓayya ƴaaɓa kahna. 18Ɓa feyuusa ŋ ɓaya ɓa na ɓayse kahan Yuusufa, ɓa woosa ne : « Kaɗ wii ɗah, haalsi ɓoo raak ŋ saakuuciŋ ɓoo ŋ hayiŋ ɓoo koc, weɗ tah ɓa ɓayee ɓoo, ne ɓa amb ɓoo, ɓa tum ɓoo ñaam ; ɓa nam naaf mbaam ciŋ ɓoo. »

19Wa ɓa kaɗ po ɓa heeɗa aase, ɓa woosa ƴaara adgoh kahan Yuusufa ne : 20« Kilifaani, ɗaasa ɓoo ƴissuut ; ɓoo kociɗ hay rome pesoha ndii. 21Wa ɓoo haadee, e ɓoo kaɗ po ŋ waas, ŋ ɗiska ɓoo tufuk ne ɓoo neeh nga, ɓoo rangissa saakuuciŋ ɓoo, ɓoo hotta haalsi ɓoo romohee, ŋ findi wa hendee ŋ ɗooƴ ca, waaye ɓoo haytohiɗa. 22Te ɓoo namiɗ ɓay kopor wiiriis romoha pesoha. Ɓoo inahɗi ɓoyi dokin koporeem ŋ saakuuciŋ ɓoo. »

23Ƴaara loffa ɓa ne : « Kanaat neƴƴohaat, wa jam ; a Koohiŋ ɗu, yiŋ baab ɗu, a yi tumiɗ ɗu alaleem ŋ saakuuciŋ ɗu ; ini kaɗ ŋ haalsiŋ ɗu, ŋ rahsiɗa. » Ŋ ineem ƴaara faɗsiɗta ɓa Simeyong. 24A ɓekka ɓa ŋ kahan Yuusufa, a onnda ɓa masuɓ ne ɓa naawis kot, a nammba on mbaam caŋ ɓa kañam. 25Ɓa haɓiɗta taambil ca, ɓa sekeeɗa hayiŋ Yuusufa na noha laam, ɓa yegeen ne aa hee ñaktuke na ɓa.

26Wa Yuusufa haad kahan ce, ɓa eɗta ɗe taambil ca ɓa ɓaye, ɓa ƴekiɗta ɗe po puk ciŋ ɓa reesa kehƴi. 27Yuusufa kañiɗta ɓa, a meekissa ɓa ne : « Baab ɗu ya ɗu wee so ne a yaɓko'iɗ, a tum na ? A ris pes e ? » 28Ɓa woosa ɗe ne : « Ee, baabiŋ ɓoo, ñaamiŋ ɗa, yaa ŋ jam, a ris pes. » Ɓa hiirra, ɓa ƴekɗissa ɗe. 29Yuusufa marakka Benyaamin taambɗoh ce, yi a ɓaah na ɗe yaay na baab, a woosa ɓa ne : « Kon ƴaarii a yi taambɗoh ɗu, yi ƴini ɗu woyee so e ? Kuɓki nee, Kooh barke'ɗaat ɗa. »

30Wa a hot taambɗoh ce, faaniŋ Yuusufa nuppa po a minisɗi amb muhun caŋ ɗe, a arra aas ŋ tuuƴ ce ne a fuɗ nga. 31Wa a ƴut po a muktukka, a ndengɗukka, a hayissa ŋ taambɗoh ciŋ ɗe, a nakohha ne kañam ka deƴsaat. 32Yuusufa deƴƴuusa kiik ce, taambɗoh ciŋ ɗe nammba deƴƴu kiik ɓa, ɓinooɓa genee Misra nammba deƴƴu kiik ɓa, laam, wa nikee in sanguuɗ nga ɓa ne ɓa ɓaah na Heber ca kañam. 33Taambɗoh ciŋ Yuusufa ɓoofɗuusa taambtiɗohiɗ ini amboh ŋ saawa po ŋ ya uup ƴin, ɓa yurhiɗkohha na ɗe ; ɓa feyuusa ɓa markoheeɗa. 34Yuusufa nakohha ɓa eɗu kañam ca nikee ŋ fikiice. Benyaamin uupiɗta taambɗoh ciŋ ɗe nga waas yatuus. Ɓa ƴutta, ɓa annda biiñ po keeñ ciŋ ɓa soossa.

Currently Selected:

Camba 43: YM

Highlight

Copy

Compare