Camba 44

Yuusufa markiskiɗ taambɗoh ciŋ ɗe

1Wa ɓa ƴut ŋ ñakta, Yuusufa nakka ƴaara adgohee kahan ce ne : « Tumɗa ƴaaɓii pesoha ini saakuuciŋ ɓa min ɓay, yaa nu nga ɗah, fu ɓekiɗ ɗe haalsiŋ ɗe ŋ saakndiŋ ɗe. 2Te fu nam ɓekndoh kaasiŋ ngo haalsi ŋ ɗooƴ saakndiŋ ƴaari uup ƴin nga ɓa. » Ƴaara tummba ina Yuusufa nak ɗe.

3Wa Kooh wiis na ɓaaɓa teel, ƴaaɓa woyuusa ne ɓa miniɗ coot ; ɓa siffa mbaam caŋ ɓa, ɓa cooteeɗa. 4Ɓa pulla kur ka waaye bala ɓa usan ɗah, Yuusufa woosa ƴaara ne : « Daba ƴaaɓa, fu meekis ɓa ne : Wa ye tah ɓa tumɗuusa baahiɗ po ƴut, ɓa wirndohhaa baahaaɗi ? 5Kaasi ɓa rok weɗ mi na anohe te weɗ mi na name markiskoh ; ini ɓa tum sepƴiɗ. »

6Ƴaara dabba ɓa, a woosa ɓa ineem. 7Ɓa loffa ɗe ne : « Kilifaani, fu na yambe ɓoo ye an ? Ɓoo tumanɗi muk in mand ɗaa. 8Fu hot nga, wa ɓoo puloh Kanaan, ɓoo haytoh haytoh haalsi ɓoo raakee ŋ saakuuciŋ ɓoo. Mbaa ɓoo min na rokoh urus wala haalis ŋ kahan kilifaaniŋ ɗa ? 9Ɓo' nu fu hot na kaaseem ɗah, a apsaat ; te ɓoo ɓi tas, ɓoo nik ñaam ciŋ ɗa, kilifaani. » 10A woosa ɓa ne : « Ee, ŋ teyɗukiɗ ini ɗu woo, waaye a ƴaari rok dong, a yi ŋ amban ñaam, ɓi tas hool nga. »

11Ɓa arra ruhsiɗ saakuucaŋ ɓa, yaa nu nga ɗa rangissa waŋ ɗe. 12Ƴaara markeeɗa, a cambohha waŋ yakkaŋ ɓa po waŋ ƴaara uup ƴin. Kaasa hotohuusa ŋ saakndaŋ Benyaamin. 13Jaarra jaar, keeñ ciŋ ɓa reehha, tahha po ɓa faarra kulɓaacaŋ ɓa. Ƴutta ɓa degissa saakuuca ŋ mbaam caŋ ɓa, ɓa dokkissa ɗiska na Yuusufa.

14Wa Yudaa na taambɗoh ciŋ ɗe ree kahan Yuusufa, ɓa raak ɗe ris nga, ɓa raɗukka ŋ kehƴi, ŋ fikiice. 15Yuusufa woosa ɓa ne : « Ɗu haɓiɗ ye wii ? Hanaa, ɗu inahɗi ne ɓo' findiiso na mine min markis ? » 16Yudaa woosa ɗe ne : « Ɓoo raakɗi woyaah, kilifaani, ɓoo minɗi taasuk po ɓoo hool ŋ inii, laam a Kooh wiñ ɓoo. Ɓoo na hee hey ambsukohe jen ɓoo nik ñaam ciŋ ɗa, ɓoo na ƴaari hotu na kaasi. » 17A woosa ɓa ne : « Muk, ŋ supkiɗ tum ineem, a ƴaari hotu na kaasi dong a yi nikan ñaamiŋ ngo ; ɓi tas haad ŋ baabiŋ ɓa moɗoɗ. »

Yudaa kiimɗiɗ Benyaamin

18Weɗi Yudaa reɓoh nga ɗe, a woosa ɗe ne : « Kilifaani ɗaas so, on ndo ŋ woo na ɗa, te kanaa so ayruk, laam fu na Firawnaani, e ɗu hend. 19Wa ɓoo koc hay ndii, kilifaani, fu meekseen ɓoo ne : Ndah baabiŋ ɓoo ris pes ? Ndah ɓoo raakiɗ taambɗoh wiiriis ? 20Ɓoo loffa ɗa ne, kilifaani, baabiŋ ɓoo yaa nga, a yaɓko'iɗ lool te ɓoo raakiɗ taambɗoh ƴin, yi fu inah ne, a raak ɗe ŋ kiyaɓkookiŋ ɗe. Yakak njaanjeem kaaniɗ, a yi dong a tasiɗ ŋ kuɓuuci a raak na yaayiŋ ɓa, a keeñkohiɗ ɗe lool.

21Fu woosa ɓoo ne, ɓoo ɓayɗaat ɗa njaanjeem, fu hotoot ɗe. 22Ɓoo woosa ɗa ne, kilifaani : Kuɓkeem minɗi saɓsukoh na baab ɓa. A saɓsukoh na ɗe ɗah, baab ɓa hey kaane. 23Fu woosa ɓoo ne kilifaani, feeh taambɗoh ɓoo yeem hayɗi ɗah, fu waaɗisɗi hot ɓoo ŋ fikiifu. 24Ɓoo kaɗta ŋ baabiŋ ɓoo, ñaamiŋ ɗa, ɓoo woosa ɗe ini fu woo. 25Wa a woyis ɓoo ne, ɓoo hayaat ɓa romɗise pesoha, 26ɓoo woosa ɗe ne, ɓoo minɗi kaɗ te ɓoo hunɗi na taambɗoh ɓoo, mbaa kilifaanaŋ kur ka teyɗukanɗi ɓoo.

27Baabiŋ ɓoo, ñaamiŋ ɗa, loffa ɓoo ne : “ Ɗu inhiɗ ne ŋ raak kuɓu kanak dong na yaay ɓa, 28yinoori sooƴiɗ, ŋ amb ne, a sifiñsohuuɗ, ŋ hotisɗi ɗe. 29Ɗu waaɗis ɓay yi tas ɗah, ŋ kiyaɓkookiŋ ngo wii, in rahas ɗe ɗah, ŋ hey haade Jaanim na aay-keeñ saguuɗu. ”

30Ɗiski wa nik ndii kilifaani, ŋ haad ŋ baab ɓoo, te ɓoo hunɗi na njaanji a na iikohe ɗah, 31a hey kaane ŋ kiyaɓkookiŋ ɗe, te e ɓoo ɓekan ɗe aay-keeñi ɓayan ɗe Jaanim. 32Ɓaatta nga, mi, ŋ haf fo, ñam woyee ɗe ne, a ñam deguka, ne ŋ wikɗi ɗe njaanji ɗah, ahhaaneem taambɗaat to ŋ kipes kiŋ ngo jen. 33Mbaa, mi yii kiim ɗa, kilifaani, ne ŋ tas ndii, ŋ nik ñaamiŋ ɗa, te fu faɗ njaanji, a hun na taambɗoh ciŋ ɗe a haad. 34Ŋ minɗi dokuk muk ŋ baab ɓoo, te ŋ hunɗi na ɗe. Ŋ minɗi maasoh muk naamooni baab na hee kooɗohe ŋ ineem. »

Currently Selected:

Camba 44: YM

Highlight

Copy

Compare