Camba 42
42
Yaŋhooɓa woosiɗ kuɓuuciŋ ɗe Misra
1Wa Yaŋhooɓa kerah ne Misra raakiɗ bele, a woosa kuɓuuciŋ ɗe ne : « Ɗu ɓoof ye ? 2Ŋ kerhiɗ ne bele raakiɗ ŋ Misra, kaɗaat ɗu roma nga, ɓoo raak pesoha, ɓoo kaanuu ŋ aɗi. » 3Taambɗoh ndaŋkiyaah ŋ ɓaŋ Yuusufa kaɗta roma bele ŋ Misra. 4Waaye Yaŋhooɓa faɗeeɗi Benyaamin, yi ɓaah na Yuusufa yaay na baab, ne a kaɗ na ɓa, a neƴƴohee ne in rahas ɗe. 5Wa kuɓuuciŋ Israayel aasee Misra, ɓa huntiɗkohee na ɓi romoh wiiriis, laam a kur kaŋ Kanaan jen nikee ŋ aɗ.
6Waam raak a Yuusufa a yi adgohee kur ka na toonaŋ beleena. Taambɗoh ciŋ ɗe reesa nga ɗe, ɓa ƴekiɗta ɗe po puk ciŋ ɓa reesa kehƴi. 7Wa Yuusufa hot ɓa, a inhissa ɓa, waaye a mannda na ɓoyi inahɗi ɓa, a ngassa ɓa an : « Ɗu puloh nde ? » Ɓa loffa ɗe ne : « Ɓoo puloh Kanaan, ɓoo waaɗ rom pesoha. »
8Nikka ne Yuusufa inhisiɗ taambɗoh ciŋ ɗe, waaye, ɓa inhisɗi ɗe. 9A naandsukka heeƴ ca a heeƴee ŋ ini kaɗ nga ɓa. A woosa ɓa ne : « Ɗu espiyoŋ, ɗu hay ne ɗu marak ɗiski ɗu min taamb po ɗu saah kur ki. » 10Ɓa woosa ɗe ne : « Muk kilifaani, ɓoo hay ne ɓoo rom pesoha dong. 11Te ɓoo jen e ɓoo ɓaah baab yino, ɓoo ɓo' yurhiɗ kilifaani, ɓoo espiyoŋ haa. »
12Yuusufa woosa ɓa ne : « Ineem keeh haa, ɗu hay ne ɗu marak ɗiski ɗu min taamb po ɗu saah kur ki. » 13Ɓa loffa ɗe ne : « Kilifaani, e ɓoo jen ɓaah baab yino, ɓoo gen Kanaan ; ɓoo nikee ndaŋkiyaah na kanak (12), yinoora sooƴiɗ, ya uup ƴin yaa tassa na baabiŋ ɓoo. »
14Yuusufa woosa ɓa ne : « Ini ŋ woo ɗu weɗ raak, ɗu espiyoŋ, 15waaye ŋ hey marke ndah ɗu woo keeh ; ŋ giñiɗ ŋ Firawnaani ne ɗu heyɗi kurke ndii feeh taambɗoh ɗu yi uup ƴin hayɗi ndii ɗah. 16Woosaat ɓo' yino nga ɗu, a kaɗ ɗe ɓaya, ɓi tas nikohaah ŋ kasooni po ŋ marak ndah ɗu woo keeh ; wa nikɗi ɗah, ŋ giñiɗ ŋ Firawnaani ne ɗu espiyoŋ. »
17Ƴutta, Yuusufa rannga ɓa neeh kaahay ŋ kasoona. 18Ngaŋ neeha kaahayɗoh, a woosa ɓa ne : « Ɗu hun ŋ ini maa hee ɗu woye ɗah, ɗu hey muce, laam ŋ nupiɗ Kooh. 19Nik ne ɗu ɓo' yurhiɗ ɗah, yino nga ɗu tasaat ŋ kasooni, ɓi tas kom ɓi kahan ɗu bele, ɓeɗ ɓa nik ŋ aɗ. 20Ƴut ɗah, komaat to taambɗoh ɗu yi ƴini, ŋ hey inhe ne ɗu woo keeh, ɗu min muc ngaŋ kakaan. » Ɓa teyɗukka ineem. 21Ɓa woyeeɗa ŋ harmban ɓa an : « Cey ! A ini ɓoo tum taambɗoh ɓoo weɗ hay nga ɓoo, laam, wa a nik ŋ miskiɗ, a nakeeɗa ɓoo yirmu, ɓoo hotee nga te ɓoo sikɗukɗi ɗe. Ineem weɗ tah woti, ɓoo nammba nik ŋ miskiɗ. » 22Ruben degga nga ne : « Ŋ woyeen ɗu ne ɓoo kanaat tum njaanji in, waaye ɗu sikɗukɗi so, weɗ tah, ɓoo deguuɗ miskiɗ woti sagu kiñin kiŋ ɗe ɓoo ɓay. » 23Ɓa liiɓee ne Yuusufa kerahɗi in ci ɓa woye, laam wa ɓa woyee na ɗe, a ƴaar a yi toksiɗee ɓa ; 24Yuusufa eɗta ɓa finho, a usɗukka ɓa, a fuɗeeɗa.
Wa Yuusufa fuɗ po ƴutta, a dokkissa woya na ɓa, a ɓayya Simeyong a tokka ɗe ŋ fikiiɓa. 25A nakohha ne saakuucaŋ ɓa soɗu bele po ca riif, ɓa tumɗu haalis caŋ ɓa nga, ɓa nam onu ñamaah ŋ waas ; ineem tumuusa. 26Ƴutta taambɗoh caŋ ɗe siffa ca ŋ mbaam caŋ ɓa, ɓa cooteeɗa.
27Ɓeɗ kaɗoh kaɗoh po ɓa tufukka ŋ ɗisik ne ɓa neeh nga, raak weka aasiɗ ; yino nga ɓa rangissa saakndaŋ ɗe ne a on mbaamaŋ ɗe ñamaah, a hotta haalsa a romohee ɓekuuɗ nga, ŋ nguɓaŋ wa, a feyuusa. 28A woosa ɓinooɓa ne : « Hee ! Ŋ doknuuɗ haalsiŋ ngo, weɗi wii, ŋ ɗooƴ saakndiŋ ngo. » Ɓa tiitta po ɓa saakɗoheeɗa, ɓa woyeeɗa ŋ harmban ɓa an : « Kooh tum ɓoo ye an ? »
29Wa ɓa ree Kanaan ɗiskaŋ baab ɓa, ɓa naandsukka ɗe in ca rahas ɓa jen. 30Ɓa woosa ɗe ne : « Ƴaara adgoh kur ka ngasee ngas ɓoo ; a amb ne ɓoo espiyoŋ. 31Ɓoo lofiɗ ɗe ne ɓoo ɓo' yurhiɗ, ɓoo espiyoŋ haa. 32E ɓoo jen ɓaah baab yino, ɓoo nikee ndaŋkiyaah na kanak (12), yinoora sooƴiɗ, ya uup ƴin yaa tassa na baabiŋ ɓoo ŋ Kanaan. 33Ƴaara loffa ɓoo ne a min inhoh ne ɓoo ɓo' yurhiɗ an : Ɓoo na hee faɗe ɓo' yino, a tas ndaam te ɓoo kom ɓi kahan ɓoo pesoha, ɓeɗ ɓi nik ŋ aɗ. 34Ƴut ɗah, ɓoo kom ɗe taambɗoh ɓoo yi uup ƴin, ineem weɗ na hee ɗe teeɓe ne ɓoo ɓo' yurhiɗ, ɓoo espiyoŋ haa. Ŋ ineem, a faɗis taambɗoh ɓoo, te ɓoo hey mine wil ŋ kur ka. »
35Wa ɓa yiif saakuucaŋ ɓa, yaa nu nga hotta nafaanaŋ haalsa fu ɓayee ŋ saakndaŋ ɗa, ɓeɗ na baab ɓa jen ɓa jaahiɗta. 36A yi Yaŋhooɓa a woosa ɓa ne : « Ɗu ɓii reehiɗ kuɓuuciŋ ngo. Yuusufa na Simeyong sooƴiɗ, ɗu waaɗis ɓay Benyaamin, in ceem jen ŋ ɗafuk ko ! » 37Ruben woosa ɗe ne : « Baab, degga Benyaamin ŋ yaah ciŋ ngo, ŋ hey ɗa ɗe wike, wa nikɗi ɗah, fu ap kuɓuuciŋ ngo kanak ci. » 38Yaŋhooɓa loffa ne : « Muk, ŋ heyɗi faɗe kuɓkiŋ ngo a kaɗ na ɗu. Yakak ce kaaniɗ, a yi dong ŋ tasiɗ, in rahas ɗe ŋ waas ɗah, ŋ kiyaɓkookiŋ ngo wii, ŋ haadan Jaanim na aay-keeñ saguuɗu. »
Currently Selected:
Camba 42: YM
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc
