Camba 41

Yuusufa toksiɗ heeƴ ciŋ Firawnaana

1Wa degga kiis kanak, Firawnaana, buuraŋ Misra heeƴca. Ŋ heeƴiŋ ɗe, an a nikee ŋ sero kala na woyse Niil. 2A hotta inoh moɗiɗ yasna-kanak, kapiɗ, pulohha nga, ca ñameeɗa ŋ paangfa ŋ sereenda. 3A hotissa ŋak moɗaaɗi'iɗ yasna-kanak nammba puloh ŋ kala, ca nikka na ca. 4Ŋak ca ñammba inoh ca kapiɗ ca. Ndeem, Firawnaana yunukka. 5A neehissa, a heeƴissa mbong yasna-kanak moɗiɗ, ɓiɗsiɗ ŋ mbaang yino. 6Furus yasna-kanak ca fu inah ne a mbooyooni oñiɗ ca, ɓiɗissa ŋ serooca ; 7furus ca onnda mbong ca yasna-kanak ca moɗiɗ ca. Firawnaana yunukka, a inahha ne a heeƴ heeƴ.

8Wa Kooh wiis na ɓaaɓa, Firawnaana feyuusa, a cohɗohha naah ca na riifiɗ haf caŋ Misra jen, a naandsukka ɓa heeƴ caŋ ɗe, waaye ali ɓo' nga ɓa minɗi ɗe ca toksiɗ. 9Ƴaara adgohee ɓa meeɗ taambkoh anaah caŋ Firawnaana woosa ɗe ne : « Mi deey, ŋ hey naandsohe tooñiŋ ngo woti. 10Firawna ayrukeen mi na ƴaara adgohee utoh mbuuruuci po a rannga ɓoo ŋ kasooniŋ dagi adgoh ɓi na niiɗe kahan ce. 11Ɓoo heeƴandoosa, te heeƴ nu nga ɗah raakeen ini wa tokis. 12Komaaki fiir Heber nikeen na ɓoo ŋ ɗooƴ kasoona, a ñaamiŋ dagi adgoh ɓi na niiɗe kahan buur. Ɓoo naandsukka ɗe yaa nu nga ɗah ini fu heeƴ, a yi toksiɗ ɓoo ca mbaɗi. 13Te findi a toksoh ca, ca raakoh ɗaa ; ŋ doknuusa ŋ pangkiŋ ngo, ƴaara tas keɗuusa ŋ kidig. »

14Firawnaana woosa ne ɓa kaɗaat ɓa haya na ɗe. Ɓa arra kaɗ ŋ kasoona, ɓa puliɗta ɗe, a nenukka, a ɓekukka kulɓa wiiriis, ɓa ɓayya ɗe ŋ Firawnaana. 15Firawnaana woosa Yuusufa ne : « Ŋ heeƴ heeƴ, te ali ɓo' minɗi wa tokis, waaye ŋ kerah ne fu miniɗ tokis heeƴ nu fu naandsuku ɗah. » 16Yuusufa woosa ɗe ne : « A ñam haa, waaye a Kooh na hee eɗohe toksi na hee ɗa doye. »

17Firawnaana woosa Yuusufa ne : « Ŋ heeƴiŋ ngo, ŋ nikee ŋ sero Niil, 18ŋ hotta inoh moɗiɗ yasna-kanak, kapiɗ, pulohha nga, ca ñameeɗa ŋ paangfa ŋ sereenda. 19Ŋak yasna-kanak moɗaaɗi'oh na moɗaaɗi'oh nammba puloh nga, ŋ moosɗi hotoh mand ɗaa moɗaaɗi ŋ Misra. 20-21Ca ñammba inoh ca koc, ceɗ ca yasna-kanak ca kapiɗ ca nikka ŋ rook ciŋ ca. Te ɓo' minɗi wa hot nga ca sagu risa ca risee ŋak ; ndeem ŋ yunukka.

22Ŋ heeƴissa mbong yasna-kanak moɗiɗ, ɓiɗissa ŋ mbaang yino. 23Furus yasna-kanak moɗaaɗi, ca fu inah ne a mbooyooni oñiɗ ca, ɓiɗissa ŋ serooca. 24Furus ca onnda mbong ca yasna-kanak ca. Ŋ naandsukiɗ ca naah ci waaye ali ɓo' nga ɓa minɗi so ca toksiɗ. »

25Yuusufa woosa Firawnaana ne : « Heeƴ ciŋ ɗa tokis in yino ; Kooh na teeɓee ɗa ini a na hee tume. 26Inoh ci yasna-kanak ci kapiɗ ci ca kiis yasna-kanak findi mbong ci yasna-kanak ci ; kon wa heeƴ yino. 27Ŋak ci yasna-kanak ci moɗaaɗiici, ca kiis yasna-kanak findi furus ci yasna-kanak ci mbooyooni oñiɗ ; ca nikan kiis aɗ yasna-kanak. 28Weɗ ini ŋ woo ɗa rek Firawna, Kooh na teeɓee ɗa ini a na hee tume.

29Kiis ci yasna-kanak ci na haye, ca na hee nike kiis laaɓɗuk ngaŋ Misra jen. 30Kiis yasna-kanak hey taambe nga ca, ci fu inah ne ca na hee nike kiis aɗ, ca hey tahe po kiis ciŋ laaɓɗi alu te ca hey yahrohe kur ki. 31Ca hey miske lool, po ɓooɓi alkoh ne kur ki laaɓɗeen. 32Ini tah fu heeƴca ca waas kanak Firawna, weɗ ne Kooh tufkiɗ ne ca hey raake, te a hey ca raakɗe findi wa uup gaawoh.

33Ɗiski wa nik ndii Firawna, waaka ɓo' ñaañiɗ, heɗ liiɓohaaɗ moɗiɗ, yi fu na hee tufkiɗe, a adgoh kur ki. 34Fu nam waak ɓi kilifa ɓi fu inah ne, ɓa hey ɓaye ŋ in ci na hee nguɗse ŋ kur ki, yatuus nu nik ɗah, yinooriŋ wa, ŋ kiis ciŋ laaɓɗi jen. 35Ŋ kiis ciŋ laaɓɗi na haye, ɓa nangɗoh pesoha ŋ kur ci yakak ci, fu deg ca yaah. 36Misra hey ɗaakke po kiis ci yasna-kanak ciŋ aɗi hay ɗah, ca telan ɓi kur ki raakiɗ pesoha po ɓa muc ŋ aɗi. »

Yuusufa adgohiɗ Misra

37Wa Yuusufa woo po a ƴutta, Firawnaana na dag caŋ ɗe jen hunnda ŋ woo kaŋ ɗe. 38Firawnaana woosa ɓa ne : « Ƴaari Fuuɗsiŋ Kooh#41:38 Fuuɗsiŋ Kooh : ngaŋ heber na gerek, feruuɗ ci na hotkeeɗi, na puuɗsi, na liiɓ ɓo', ceɗ ɓaah tiik. Ŋ heber wa nikka "ruwah", ŋ gerek, wa nikka "pnewma". Kon, ɓa woo "ruwahiŋ Kooh wala pnewmaaniŋ Kooh ɗah, wa yooɓɗi tokis. A mand na liiɓi nik ŋ ɗooƴ Kooh, a mand na in ci na hotkeeɗi. Ngaŋ teerndiŋ Tum ci 2:2-4 "pnewmaaniŋ" Kooh hayiɗ findi puuɗsi. A yi ɓoo teek "Fuuɗsi Hoolohngaani" wala "Fuuɗsiŋ Kooh" ŋ saafi-saafi, waaye in ci kaahay ceem jen, ca ɗii ŋ ɗooƴi. nik ŋ ɗooƴ ce yii, andi ɓoo minisiɗ raak mand na ɗe ? » 39A woosa Yuusufa ne : « Nik ne Kooh teeɓiɗ ɗa in cii jen ɗah, ali ɓo' minɗi mand na ɗa ; fu ñaañiɗ, fu heɗ haf, 40mbaa ɗah, ŋ hey ɗa adgiɗe, ɓi kur ki jen taambee ŋ woo kiŋ ɗa ; a tiikiŋ buuri ŋ nikoh dong weɗ ŋ uupohan ɗa. 41Mbaa, ŋ degiɗ Misra jen ŋ yaah ciŋ ɗa. »

42Firawnaana nihissa jaarndaŋ ɗe inhisohaana, a ɓekiɗta Yuusufa wa na kulɓa mbaseñ, a nammba ɗe tokiɗ ceen urus ŋ mbooh. 43A rapiɗta ɗe ŋ wotiira uup baah ɗal waŋ ɗe ɗah. Ɓi ɓo' adugka, ɓa weeɗa ne : « Haaƴɗukaat. » Firawnaana degoh Misra jen ɗaa ŋ yaah Yuusufa. 44Firawnaana woosa Yuusufa ne : « Ñam Firawnaani, waaye ali ɓo' tumanɗi in ŋ Misra jen, te fu hunɗi nga. »

45Firawnaana feriɗta Yuusufa tiik, Safnat-Peneya ; a onnda ɗe ɓitiɓ teeku Asnat, kuɓu Potifera, ɓoyi na seeƴkiɗohe ŋ kur-taaha na woyse On. Yuusufa taambohha nga, a adgohha Misra jen. 46Wa Yuusufa na ɓayse ŋ ɗiskaŋ Firawnaana, buuraŋ Misra, tel ɗe raak kiis ndaŋkiyaah-kaahay (30). A kurkohha ŋ ndeem, ne a taambiɗ Misra jen.

47Wa kiis ca yasna-kanak caŋ laaɓɗa hay, kur ka laaɓiɗta keeh-keeh. 48Yuusufa nangɗohha pesohaaca a ɓayoh ŋ kiis ca yasna-kanak caŋ laaɓɗa, a ɗaakka ca ŋ kur-taah ca ; waa nu nga ɗa, ini nguɗohu ŋ ɗisik ci wila ɗaakuusa nga. 49Yuusufa nangɗohha bele po ca laayya findi merhey mi ŋ yaah-cookmi. Kaɗta po ɓa inhisɗi findi ca hend, ɓa faɗta ɓeesa.

50Bala kiis caŋ aɗa hayan ɗah, Asnat kuɓu Potifera seeƴkiɗohaŋ kur ka na woyse On, raakeen kuɓu ƴaar kanak na Yuusufa. 51A teekka saawiŋ ɗe Manasse (tah alkoh) laam a woo ne : « Kooh oniɗ to ini na hee so tahe alkoh miskiɗ ciŋ ngo po caŋ kahan baab ɓoo sah. » 52A teekka taambɗoha Efrayim (ɓasil) laam a woo ne : « Kooh tumiɗ to ɓasil ŋ kur ki ŋ torhiɗohu. »

53Wa kiis ca yasna-kanak caŋ laaɓɗa nikee ŋ Misra coot, 54caŋ aɗa hayya findi Yuusufa woyohee wa. Kur ci jen nikka ŋ aɗ waaye pesoha raakeen ŋ Misra. 55Wa aɗa ree nga ɓi kur ka, ɓa kaɗta ŋ Firawnaana, ɓa meekseeɗa ɗe ñamaah. A woosa ɓa jen ne : « Kaɗaat ŋ Yuusufa, in nu a woo ɗu ɗah, ɗu tum ineem. » 56Misra jen nikka ŋ aɗ. Yuusufa rangissa in ca ɓa ɗaakkohe, a tooneeɗa bele laam aɗa miskeen lool. 57Ɓi ɓo' puloheeɗa ŋ kur ci wil Misra jen, ɓa heeɗa rome bele ŋ Yuusufa, laam, aɗa miskeen ŋ kehƴi jen.

Currently Selected:

Camba 41: YM

Highlight

Copy

Compare