Camba 40
40
Yuusufa toksiɗ heeƴ caŋ ƴaaɓa kanak ca
1Weɗ kaɗoh po wa raakka mbeh, dag kanak, toonnja buuraŋ Misra. Ɓa nikee ƴaara adgohee ɓooɓa meeɗ taambkoh anaah caŋ ɗe, na ya adgohee utoh mbuuruuca. 2A ayrukka ɓa lool. 3A ɗaakɗukka ɓa ŋ kasoonaŋ daga adgohee ƴaaɓa niiɗee kahan ce, ŋ ɗiska Yuusufa taƴu. 4Ƴaara degga ɓa ŋ yaah Yuusufa, a taambkoheeɗa ɓa. Ɓa nikka nga po, 5wa raakka wek, ɓa kanak, ɓa heeƴca ; heeƴ nu nga ɗah, raakka ini wa tokis.
6Wa Kooh wiis na ɓaaɓa, Yuusufa kaɗta ɓa marka, a raakka ɓa feyuuɗ. 7A woosa ɓa ne : « Ɗu soos ye an woti ? » 8Ɓa woosa ɗe ne : « Ɓoo heeƴ heeƴ yaa nu nga ɗah, te ɓoo raakɗi ɓoyi joy ɓoo ca toksiɗ ŋ ndii. » Yuusufa woosa ɓa ne : « Hanaa a Kooh na tokse heeƴ haa ? Naandsukaat to ca ŋ hot. »
9Weɗi ƴaara adgohee ɓooɓa meeɗ taambkoh anaah caŋ Firawnaana naandsukoh waŋ ɗe an : « Ŋ heeƴ tas kidig reseñ ŋ fikiiso, 10wa raakka naak kaahay ; wa kifissa, wa possa, wa rimmba, ca ruunnda ŋ ɗiski ɗiski. 11Raak ko na kaasiŋ Firawnaani ŋ yaah, ŋ ɓeennda ŋ rim ci, ŋ pooƴca masmiŋ ca ŋ kaasi, ŋ eɗta ɗe wa ŋ yaah. » 12Yuusufa woosa ɗe ne : « Heeƴi tokis inii : Naak ci kaahay ci, ca neeh kaahay. 13Ndii na neeh kaahay, Firawnaani hey ɗa rapɗe po ɗiskaŋ ɗe, ƴut ɗa, a dokin ɗa ŋ pangkiŋ ɗa. Fu eɗissee ɗe kaasiŋ ɗe findi fu meeɗ tumoh. 14Waaye, in ciŋ ɗa baah ɗah, kanaa so alkoh. Amboh ho, fu woo Firawnaani ini kaɗ nga so ne fu puliɗ to ŋ kasoonii. 15Ŋ uupu hatil ŋ kur kaŋ Heber ca, ŋ ɓayuusa kur kii. Te ndii, ŋ namɗi tum ini joy yo tah taƴu. »
16Wa ƴaara adgohee utoh mbuuruuca hot ne toksaŋ Yuusufa na heeƴa neɓiɗ, a nammba woo ne : « Na so, ŋ heeƴiŋ ngo, ŋ raan waah kaahay tumiɗ mbuuru. 17Wi nikee ŋ ɗafki riifee na mbuuru nu nik ne Firawnaani na haɓɗiɗasse wa ɗah, waaye sel ci ñameeɗa ca ŋ waahi, ŋ hafiŋ ngo. » 18Yuusufa woosa ɗe ne : « Heeƴi tokis inii : Waah ci kaahay ci, ca neeh kaahay. 19Ndii na neeh kaahay, Firawnaani hey ɗa rapɗe po ɗiskaŋ ɗe, ƴut ɗah, a ap ɗa, a keɗ ɗa ŋ kidig, sel ci ñamee ɗa. »
20Wa degga neeh kaahay Firawnaana yakɗeeɗa noha a rimohu, a haɓɗiɗta dag caŋ ɗe kañam neɓiɗ. A rapiɗta ƴaaɓa kanak ca taƴsee ŋ kasoona po ŋ ɗiskaŋ ɗe, dag ca hoteeɗa nga. 21A dokinnda ya adgohee taambkohoh anaah ca ŋ ɗiska a nikee ne a eɗissee ɗe kaasiŋ ɗe. 22A appa ƴaara adgohee utoh mbuuruuca, a keɗta ɗe ŋ kidig ; wa taamboh ɗaa, ina Yuusufa woyee raakka. 23Waaye ƴaara adgohee ɓooɓa meeɗ taambkoh anaah caŋ Firawnaana, alkohha Yuusufa jameet.
Currently Selected:
Camba 40: YM
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc
