Agba 27
27
1Takun lɛmɛnɛ na kɔnaadi kadi kani mebo lɛlɔ,
ɔsika aaagyi lɛla lɛni mebo kɔnaadi.
2Temwi lɛlɔ.
Ya na bekyuli bemwi-ɔ mmomu.
3Lɛtabi libo unu na kɔnwinimi kuse gbɛn,
nsu kayi kemmo ɔlɛ ɔni na ɔdɔlɔdi ɔɔkya ukyuli kayi ni,
ubo unu utulo alakpa anyɔ ammɔ ƒui.
4Kɔnyi kɔdanku ulikplu na livoƒi lise aani ketu buyi.
Nsu ala ani na kogyulo kuubile ni,
ɔdi ulakana-ku kenye bunye.
5Si édie lɛla lɛdi álɛ ukyuli kɔnakunwi ni, ɔdia utulo
si anii aayɔ́ ukyuli na bɔbɛ kemmo.
6Si ƒula ɔkpana ɔ́kya-a ɔlɛ lɛlɔ ni, ɔdia utulo
ɔni na ƒula ukisine úbakya-a kɔgbu ɔnii bɔƒianku na ɔda-a.
7Si ukyuli úmo ni, uwɔ muedi ɔsɔ ulati-nwu emini.
Nsu ukyuli ɔni na kɔka kɔɔda momoomo ni,
ina dɛ na lɛla lɛdi libo ɔdu muedi ni, lɛɛyu-nwu emini.
8Ukyuli ɔni náyii ɔtɔ ulu ni, use aani
aasɛ ɔni náyii nwuna lɛyu ulu.
9Bɔlɛ bɔni na ƒula ɔkpana ɔ́lɛ-ɔ na bɔ́ƒɔ-ɔ anu ni,
buse aani ugyulo ƒɛƒɛɛ ɔni baakyula
iye nnɔmii ƒɛƒɛɛ bɔni baawɛɛ.
10Tenwini kama takya ƒula bakpana ku ƒ'ɔti bakpana
na adubɔkɛ bebunkune uwi ɔni na ala étulo-ɔ,
na elésie ƒula ɔtɔ kemmo bekyuli kudɔ.
Ɔsika ɔdia ka esie ƒula ɔkpana ɔni nde-ɔ kudɔ utulo ka
esie ƒula ɔtɔ kemmo ukyuli ɔni nkya ɔgyu kudɔ.
11Ubi, ɔɔɔdi ebiti blii ndubo-mi bɔda
si ákana na énwini ɔnundane.
Ɔmmɔ ɔdubɔya na lɛkana linye lɛsiaku bekyuli
bani mɔɔtu-mi kenye na beedie-mi bɔƒiɔ.
12Ukyuli ɔbuni ɔni mɔɔsia lɛlɔ
anu ni,
ɔɔkana na ɔɔnu ɔgbankpi
ɔni ndubo ubalɛ teemene na ɔɔgyumana lɛlɔ.
Nsu bekyuli bani na bana kasusu kásɔ ni,
baakɛ gyoli gyoli teetéduo ɔgbankpi ɔmmɔ kemmo.
13Sia anumi na aƒɔ lɛla lɛdi enyene kama asiku ukyuli
ɔni muunye ɔƒɔ ɔdi kayu kenye kudɔ.
Na si uleku ɔsɔnɔdine kayu kenye na ukyuli ɔdi ɔnii uunye ni,
ya na ɔka kayu kadi bɔƒɔ buse.
14Si áta ɔtanta tutuutu na aakpali ƒula ɔdukɛne
na aava teegyele-nwu ni,
ɔdubuti-nwu kɔnyi mmomu.
15Uleku unyeyɔne lɛlɔ liiƒí livo teetulo ɔnantu wɛɛwɛɛ
ɔni náƒɔ kadi limeyi limodi.
16Na si anii aabala-nwu ni, ubo ɔkplu utulo ka
abala ɔƒɛƒɛɛ na ɔda bukpo ɔya,
iye eti kɔnu edu nnɔ ada.
17Kalɛ na lɛbuala lɛɛdɔ́ lɛbuala ni,
lɛni kani na ɔkpana ɔɔklibi ɔkpana.
18Kabla bablane bani mɔɔnu kɔdingyii kɔdi lɛlɔ
bebo kuƒi ka badi-ku ebi.
Lɛni kani na kabla bablane
bani mɔɔgyumana
kabla ɔlati ɔdi kabla ka
katɛ ni,
badubo lɛyuƒɔla bɔƒɔ.
19Kalɛ na ukyuli ɔkana na ɔnu nwuna anumi na ntu kemmo ni,
lɛni kani na ukyuli kayi keedie ukyuli umodi ɔmmɔ udu taatina.
20Kukpi ku lɛla lɛni mɔɔyila lɛla lɛdi udu belemo.
Lɛni kani na kayawi ala ani mɔɔda ukyuli ɔkwɛ elemo-nwu.
21Ogya kemmo baakya sika ugyiedi ku ɔƒualadi
taanu-nwu bɔdia.
Lɛni kani na ukyuli bumwi buudie nwuna udu taatina.
22Si éti badɔlɔdi éwi kaawɛ kemmo
na égyuo-ma muedi ni,
alakana bana kɔdɔlɔ bule bɔsiku bana kɔdɔlɔ kudɔ.
23Sia ƒula bebuo anumi kaduɛ
na eti ƒula kayi ƒui anu-ma lɛlɔ.
24Ɔsika lɛlakɛ lilese uwi ƒui.
Na kagabwa lɛnɔ kelébi ukyuli lili taasi kaba útédu kaba.
25Si ékulo bebuo livo aklibi ese kama ni,
anwu asa adubɔkɛ adila ete-ma,
26na ƒula baƒonu badubɔbla linwini yuu na bedi adi.
Na adubuye ƒula bese lɛnɔ na eti eye katumalɔ.
27Na bese bammɔ badubɔyu anyi ntu pii
bete awɔ ku ƒula kaduli bekyuli ku kabla bablane.
Currently Selected:
Agba 27: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
