Agba 28
28
1Ukyuli ɔdi ulábɔku bekyuli
bekpidi asa na ama
alati beekeli.
Nsu bekyuli babuni baakya kayi aani bagyata.
2Si ala bɔbla kalɛ kalɛ bɔ́ƒɔ
kalɔ kadi aban lɛgadi
kemmo ni,
baavumana lɛlɔ badine
uwi ndi uwi.
Nsu batɔnkune bani náda anu
na bebo lɛlati ni,
baayá na lɛla biala lɛɛbla siin.
3Lɛlɔ ɔdine ɔni mɔɔnya bawabane taakya ni,
use aani ɔnantu ɔni mɔɔna taavili na uubile edula.
4Bekyuli bani muuní ɔda bubo ni,
ama muumwi bekyuli bekpidi.
Nsu bekyuli bani mɔɔdi ɔda bubo lɛlɔ balátunaku-ma.
5Bekyuli bekpidi belenu ala bɔbla ulu lɛlɔ kalɔ.
Nsu bani mɔɔsiaku Unwoti kama geen ni,
beenú ɔmɛni kalɔ nwaa.
6Ɔdia si adi ɔwabane na aabla ala ulu lɛlɔ siin,
utulo si adi ɔlakɛne na udunkpi ɔ́ƒɔ-ɔ keliela kemmo.
7Ukyuli ɔni mɔɔdi ɔda bubo lɛlɔ ɔdi ubi ɔni mɔɔdá anu.
Nsu ubi ɔni mɔɔdiku bakpana bekpidi ku badivone kɔkpana ni,
ɔɔkya ɔti kɔƒa.
8Ukyuli ɔni mɔɔbla egulabi
na bekyuli bamba lɛlɔ
ɔkɛnku kuvonsia bonwu
ɔsu ni,
lɛkɛ lɛmmɔ lɛdubɔyii-nwu kɔnu
lisie ukyuli ɔni mbo lɛƒɔndia
ute bawabane kudɔ.
9Unwoti ulenu bekyuli bani naaadi ɔda bubo bɔmmɔ lɛlɔ
ina baakpali-nwu.
10Bekyuli bani mɔɔtɔ́lɔ bekyuli bani nse siin
taatákya likpidi kemmo ni,
ama alati bana kakpagyuɛ ndubo-ma budie.
11Balakɛne baanu lɛlɔ aani banundane kalɛ,
nsu bawabane baanu bana ayaki taati nwaa.
12Si ala aadianku bekyuli babuni ni, lɛlɔ lɛɛyɔ́ ukyuli biala.
Nsu si bekyuli bekpidi benye ala kenye ni, ukyuli biala ɔɔbɛ́.
13Bekyuli bani muuti ala teebi bana ekpidi ni,
ala aládianku-ma.
Nsu si bédie-nya kalɔ na béni-nya ni,
Unwoti ɔdubɔnu-ma kɔnyana.
14Kusɛ kusɛ ɔsiaku bekyuli bani na bana kasusu kese siin.
Nsu belikplune bésela betéduo ɔgbankpi bonwu kemmo.
15Ukyuli ukpidi ɔni mɔɔdi bekyuli lɛlɔ ni,
ɔdanku ɔgbankpi bonwu ute bawabane
aani kalɛ na ebuo ukpidi uuƒie bekyuli.
16Ɔgadine ɔni na ɔ́dɔlɔ kani mɔɔnya nwuna bekyuli taakya.
Nsu ɔga ɔni na ukisi si ukyuli uládi litemi geen lɛlɔ
iye ɔɔbɛ́ taaƒɔ ala bekyuli kudɔ ni, uulie ngba gyɔlɔɔ.
17Bekyuli ɔdune ɔni kasusu muukpóku-nwu ni,
kaakpanku-nwu teetéduo kaƒiɔtɔ kemmo.
Tada-nwu ulu!
18Bekyuli babuni ni, Unwoti ɔdubudie-ma,
na lɛla lɛdi lilabla-ma.
Nsu bani na bana kasiakɔ kese gontii ni,
Unwoti ɔdubɔyila-ma udu.
19Bekyuli bani mɔɔbla kabla kpakplaa
bebo adila pii na badi bemo.
Nsu si éni kabla na akɛ eebile uwi taavi ni,
ayaki adubɔda-a.
20Ukyuli ɔni mɔɔsia ala anu taabla-nya ulu lɛlɔ ni,
ɔdubɔkɛ lɛyuƒɔla bonwu.
Nsu ukyuli ɔni mɔɔwia ka unwini ɔlakɛne kɔnakunwi ni,
ɔdubuduo ɔgbankpi kemmo.
21Bekyuli anumi bɔnu taatu ala teenwini
ɔɔɔdia munu munu.
Nsu badi baaadaku-ni ka baƒɔ bodobodo kakɛ blii suɛ
na batuna babla likpidi.
22Ukyuli ɔni mbo sika lɛnungyie mɔɔwia ka ɔkɛ lɛkɛ pla,
nsu ɔɔɔgyi ka kɔwaba kemmo na úsela utéduo.
23Na lɛla biala kawɔlɔkɔ ni,
bekyuli baayɔ́ lɛla bɔsu bɔlɛku nwaa
utulo katɔlɔ bumwi.
24Bawɔne buyu na asu anini,
“Ɔmmɔ útebile lɛla lɛdi” ni,
use aani ukyuli bɔdu.
25Sika lɛnungyie muuboku kekpo.
Na anu buti bɔsia Unwoti lɛlɔ
mɔɔyá na keyi kaadianku ukyuli.
26Kɔdɔlɔ kɔdi ukyuli ɔni mɔɔkali ɔnii uláwia bɔlɛ.
Nsu bani mɔɔda lɛlɔ na lɛnunda kemmo ni, keliela kaatɛ-ma.
27Ukyuli ɔni muute bawabane ala ulayaki lɛla lɛdi.
Nsu ewida adubɔsiaku bekyuli bani mɔɔnu bawabane teedie lili.
28Si belikplune baadi bekyuli
lɛlɔ ni,
bɔbɛ na bekyuli baabɛ́.
Nsu si belikplune básiaku ɔgbankpi ni,
bekyuli bani nse siin beemomo.
Currently Selected:
Agba 28: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
