Agba 22
22
1Si élie ngba buni na bekyuli baalɔ-ɔ lɛnyi buni ni,
ɔdia utulo lɛlakɛ linengudi.
Ɔsika si bekyuli bényene-ɔ keliekɔ kenengudi na ƒula lɛnyi ɔsu ni,
ɔdia utulo ka akɛ sika ɔƒualadi ku ugyiedi ƒui.
2Balakɛne ku bawabane ƒui badi likeke na ulu unwi lɛlɔ,
na anwu ndi ka Unwoti nédie bana inyɔ.
3Ukyuli ɔbuni ɔni mɔɔsia nwuna lɛlɔ anu ni,
ɔɔnu ɔgbankpi ɔni mebo taatualaku anumi
na uunye lɛlɔ kagyumana.
Na bani na bana kasusu kásɔ ni,
bɔkɛ kani na baakɛ gyoli gyoli
teetéduo ɔgbankpi ku lɛbibo kemmo.
4Lɛlɔ kalɔ buboku ku Unwoti bɔyia ulu geen lɛlɔ
ɔɔyá na lɛlakɛ ku ɔbu ku ngba buumomo ukyuli.
5Ɔkɔ banyine ni, liyu ku ɔgbankpi mɔɔkya-ma ulu lɛlɔ.
Na ukyuli ɔni na ngba bɔ́ƒɔ-nwu kuye ni, uláda udu ɔmmɔ.
6Tina ƒula bebi kasiakɔ kabuni na si bábi lɛlɔ ni,
na balasia kesii bamba.
7Kalɛ na balakɛne baadi bawabane lɛlɔ ni,
lɛni na bekyuli bani muuvó ala bekyuli kudɔ
beenwíni kabla bablane teete-ma.
8Bekyuli bani na litemi lɛlɔ tadi ulu lɛlɔ ebi
na baavá na bekyuli akɔ ni,
ɔgbankpi ebi na badubo bɔƒɛ.
Na bana liƒu lɛni baakya bekyuli
na baadi-ma lɛlɔ kenye kadubo buklo.
9Bekyuli bani mbo lɛƒɔndia na beete bawabane ala ni,
kusɛ kusɛ ɔdubɔsiaku-ma.
10Bɛbɔku bekyuli bani muudumi bekyuli
taama bɛlɛku bina akɔ,
na kekpo ku kadɔ ku bekyuli budumi bɔdubɔyii ƒui.
11Ukyuli ɔni mɔɔwia ka nwuna kayi kemmo kese sɛɛn
na ɔɔtɛmi lɛƒɔndia etemila ni, ɔdi ɔga ɔkpana.
12Unwoti ɔɔgyumana ukyuli ɔni mbo lɛlati,
na uubile ɔkɔ ɔnyine kɔkwɛ kɔni na ɔɔkya.
13Ɔkɔsɔne ubo kɔkɔsɔ kɔkwɛ pii
na uuti teete lɛlɔ kuƒi na ɔɔsu ɔnini,
“Ɔƒɛni kalɛ si lɛ́lɛ lísie ntábla lɛla lɛdi ni,
ndubo gyata bɔsiaku na ulu lɛlɔ na ɔdu-mi!”
14Uleku ɔyalɛ kenye kemmo kágyu voo aani ubu bonwu ɔdi.
Na bekyuli bani naaabla Unwoti lɛyɔla ni,
ama ndubo bɔnu buduo ubu ɔmmɔ kemmo.
15Ɔnamu ɔni na ɔƒɛni na ɔ́si
ɔɔkɔ́ ni,
adɔlɔla éyi-nwu lɛlɔ
kemmo tɛɛ.
Nsu si átumini-nwu kaduɛ ni,
ɔmmɔ ƒui ɔɔlɛ́-nwu lɛlɔ.
16Ukyuli ɔni na bawabane
na ɔɔnya taakya asa
na ɔɔkɛ́ taadi
iye balakɛne na uute ala
kalɛ na ɔkɛ lɛla lɛdi
bana kudɔ ni,
kɔwaba ndubo-ma buƒie.
Banundane Básu Ala Avlaatɛ Adi
17Se atu na enu banundane butemi. Ya na ƒula kayi kasia mina ala ani mɔɔtina-a lɛlɔ. 18Ɔsika ɔdia geen ka aya na etemila amɛni eduo-ɔ kayi kemmo ƒui na asia-a unyemi lɛlɔ. 19Mɔɔtina-a ala ɔmwi. Geen ni, awɔ mɔɔtina lɛla lɛdi kalɛ na ƒula anu ƒui asia Unwoti lɛlɔ. 20Línweni ala avlaatɛ adi líte-ɔ, na bɔlɛ ku lɛlati ala sɔɔn na adi. 21Na ulu ɔmɛni lɛlɔ na adubɔsia na ati litemi geen lɛmmɔ. Na adubɔkana na edie lɛla biala kenye ulu lɛlɔ atɔ asia ete bekyuli bani nákya-a kabla kadi kɔnu.
– 1 –
22Tasia ulu ɔdi lɛlɔ na eyu bawabane anii kɔwaba kɔda-ma ɔsu. Na tasia ulu ukpidi ɔdi lɛlɔ na akɛ bekyuli bani mɔɔyaki lɛla lɛdi lɛlɔ kɔsia na litemi katɛkɔ. 23Ɔsika Unwoti uukpó teete-ma. Na ukyuli ɔni makya-ma ɔlɛ ni, Unwoti lɛnɔ ɔdubɔkya-nwu ɔlɛ.
– 2 –
24Da lɛlɔ mami na bekyuli bani muuti kɔnyi pla pla lɛlɔ. 25Na si ɔɔɔdi lɛni ni, awɔ lɛnɔ adubɔtɛya-ma na eti ƒula kɔyu akya ɔgbankpi kemmo.
– 3 –
26Tatákyaku ukyuli ɔdi ɔku kɔnu anii eenye-nwu kama na kayu kadi ɔsu. 27Si átakana kayu kammɔ bɔƒɔ ni, ƒula atɛla muedi badubɔni-nya bedie-ɔ kalɔ.
– 4 –
28Teyu ƒula ɔdɔsane ɔdi lɛlakɛ anii aavumana ɔmii ugyii ɔnii na ati bene bálɛ kenyekɔ.
– 5 –
29Bekyuli bani na ánu ka bebo kogyoklo geen ni, baga kabla na baabla na ɔɔɔdi bekyuli keeke.
Currently Selected:
Agba 22: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
