Agba 23

– 6 –

1Si awɔ ku lɛlɔ ɔdine bɛ́sala bɛɛdi ni, taanu kaduɛ na lɛla lɛni na uusé-ɔ anumi lɛlɔ. 2Na si aayɔ́ bɔdi pii ni, na akɔsi bɔdi! 3Na ala mini mini ani na ɔɔla teebese-ɔ anumi akɔsi-ɔ ɔkwɛ bɔda. Ɔsika ɔƒɛni kalɛ katɔlɔ lɛkwɛ lɛdi lɛkya-nwu kemmo.

– 7 –

4Tetu lɛlɔ anii eenwíni ɔlakɛne. Bi ɔsu na ɔlɛka eteebile lɛlɔ uwi? 5Ɔsika lɛlakɛ lɛɛyii na ukyuli anumi, na lɛɛtɔlɔ aani kalɛ na aasɛ uuveyi taatɔlɔ!

– 8 –

6Bekyuli bani na bebo lɛnumi ni, awɔ ku-ma bitelie bitadi. Na bana adila mini mini atada-a ɔkwɛ. 7Badubɔsu-ɔ banini, “Di na ani,” nsu ɔɔɔdi ku bana kaƒɔ ƒaa. Benye baabu ala ani na aadi akunta kalɛ na édu. 8Na adubo ala abuni ani na béte-ɔ mmɔ ƒui bɔdala budie. Na adubɔyɔ ka nka átagya-ma enu na lɛƒɔndia lɛni na banii bábla-a mmɔ ɔsu.

– 9 –

9Tebile ƒula uwi na badɔlɔdi lɛlɔ anii aalɛ-ma, ɔsika lɛnunda litemi lɛdi biala lɛɛɛdubo-ma anu bɔƒɔ.

– 10 –

10Tagyu bati ɔmii ugyii ɔdi na eƒie bekpinebi kalɔ aƒɔ anii beeebo ubunkune ɔdi ɔsu. 11Ɔsika bana Ɔƒɔne ubo ɔyikun geen. Na anwu ɔmmɔ ɔlati ndubɔwia-a litemi.

– 11 –

12Nu ka ábla ásiaku ala ani na bátina-a lɛlɔ. Na aklibi atu ese na enu lɛlati ala.

– 12 –

13Tada ƒula bebi bɔtɛmiku kalɛ na badia taya. Baaadubo bukpi si ébo-ma kugyiimi. 14Si áni-ma kɔtu ɔlɔna lɛlɔ ni, ɔkana udie-ma na kukpi kemmo.

– 13 –

15Mina ubi, lɛlɔ lɛdubɔyɔ-mi geen si nka ebenwini ɔnundane. 16Sɔsɔ ni, mina kayi kadubɔma si línu ka aatɛmi etemila geen ani nkɛ ulu lɛlɔ.

– 14 –

17Alaekpidi bablane lɛlɔ litegyie-ɔ anumi. Mmomu taayia Unwoti uwi ndi uwi. 18Ɔsika ƒula ngba emeyi ani ndubo adubɔyɔku-ɔ, na alasia lɛla lɛdi anu alanɔ.

– 15 –

19Ubi, se kɔtu na enu litemi na ada anu. Na aya ƒula kayi kasia ulu ɔbuni lɛlɔ. 20Tasiaku ntɛ bekpine ku adikpi badine ɔbladu kama! 21Ɔsika kɔwaba ulu lɛlɔ na bakɛ bésela. Lɛlɛɛ bɔlɛɛ pii mɔɔyá na beenyimi adikpi.

– 16 –

22Ƒ'ɔti ɔni néte-ɔ ngba na ébo kayawi kamɛni kemmo ni, nu-nwu litemi. Na si ƒ'ini ɔ́bi lɛlɔ na uli ɔtɔ ni, teni lɛla lɛni na wasu wasiku lɛla lɛni na ɔ́nu dii lɛlɔ. 23Ƒɔ litemi geen bɛla se lɛlɔ, na teti-ni teye. Na ada anu na aya batumini-ɔ kalɛ na anu ala ati kaduɛ. 24Ubi ɔti ɔni mbo bebi babuni ni, ɔɔnu lɛla lɛni ɔsu na ɔlɛka ebiti ataada-nwu. Bi nsɔ ntulo bɔdia si ebo bebi bani na báda anu. 25Anwuɔsu ni, bebi, bɛya lɛlɔ lɛyɔ bina bawɔne. Na bɛya na ebiti ada uleku ɔni náwɔ-ɔ.

– 17 –

26O mina ubi, ti ƒula kayi te-mi. Na ƒula anu asia lɛnunda ulu ɔni mɔɔtina-a lɛlɔ. 27Uleku ɔyalɛ ni, ubu voo na ɔdi. Na uleku ɔsɔnɔdine ni, ɔgbankpi na ɔdanku. 28Bɔbɛ na ɔɔbɛ́ teenye taagya bekyuli aani uyune. Na ɔɔnu ulu teete ɔnana ɔni malɛ ulekudi kama.

– 18 –

29Ukyuli ɔmani udu na kayi kaakpulu? Na ɔmani muukpóku lɛlɔ na ɔkɛ ɔɔdɔ anwu lɛti uwi biala? Na ɔma mɔɔƒɔ́ lɛlɛ lidu lidu na anumi égyie-nwu kɔɔ? 30Ukyuli ɔmmɔ ulata ntɛ bɔdi kalɔ kudii, ɔsika bɔdi biala bɔdia-nwu. 31Taya na kalɛ na ntɛ avlɔvɔ eeƒuƒuo na aadia bɔnu na bɔɔyu emini lɛnɔ atɔlɔ-ɔ. 32Ɔsika kawɔlɔkɔ ni, bɔdubo-ɔ lɛlɔ bɔdu aani si kɔlakpi nádu-ɔ, na utulo kɔlakpi kɔni ugyulo kenye mbo ɔkplu geen! 33Adubo ana buteegye taanu liƒu ala, na ataatɛmi aani ubuokpine. 34Na adubo butaagbanta aani ukyuli ɔni nnye ɔkɔlɔ kemmo na ɛpu anumi, na úƒie ɔkɔlɔ kemmo lɛbuli lɛmmɔ ɔda. 35Na adubo bɔsu anini, “Báƒiɛmi-mi ugyii, nsu útabla-mi lɛla lɛdi. Na uwi ɔni beebó-mi muedi ńtati. Uwi ɔmani na ndubɔta na lɛsɔ ntáni bɔdi?”

Currently Selected:

Agba 23: lef

Highlight

Copy

Compare