Agba 12
12
1Si aayɔ́ atɛya ala ni, ɔlɛka atuna na batumini-ɔ.
Kɔdɔlɔ kɔdi-ɔ si alayɔ anii bedie-ɔ bɔƒiɔ.
2Lɛlɔ lɛɛyɔ́ Unwoti na bekyuli babuni lɛlɔ.
Nsu ulátunaku balalane kɔkwɛ kukpidi kɔni na baakya.
3Ulikplu ala bɔbla buléboku keliela buni ku atu bɔyɔ.
Mmomu bekyuli babuni muudie lidu teesie ɔgyu.
4Uleku ɔbuni ɔni lɛlɔ basia
kayi ni,
anwu ndi ɔgyani lɛlɔyɔ
na use aani kagabwa na kebi ɔnana ɔmmɔ lili.
Nsu uleku ɔni mɔɔbla kɔƒa
ala ni,
ɔɔƒɛ ɔgyani enu, na ɔyikun ɔɔsá-nwu.
5Kɔkwɛ kɔni na ukyuli ɔbuni ɔɔkya kɔɔsia ulu lɛlɔ.
Nsu ɔlalane bɔlɛ bɔdanku ɔgbankpi.
6Ɔlalane etemila ese aani kalɛ na ebuo ukpidi ɔɔbɛ́
taatɛ kuludɔ kalɛ na uƒie lɛla lɛdi.
Nsu ukyuli ɔbuni etemila aaƒɔ́ ukyuli ngba.
7Bekyuli bekpidi beekpi taayii udu ƒui,
nsu bekyuli babuni bebi ama beenye kpakplaa uwi biala.
8Ukyuli ɔni na ubo kasusu kabuni lɛlɔ
lɛɛda bekyuli ƒui ebiti,
na beení bani nsiaku
kalala ulu.
9Si bekyuli balanu-ɔ banii adi ukyuli
nsu ebo kabla bablane ni,
ɔdia utulo ukyuli ɔni mɔɔkɔliku lɛlɔ katɔ ɔnii ɔƒɔ kuye,
nsu uuubo lɛla lɛni na ɔdi muedi.
10Bekyuli babuni ni, baawia bana bebuo
bani na baatumini muedi bɔdia.
Nsu lɛƒɔndia lɛni na ulikplune ɔɔbla ukyuli ni,
lɛdanku kasusu kekpidi.
11Bekyuli bani mɔɔbla kabla kpakplaa
bebo adila pii na badi bemo.
Nsu si éni kabla na akɛ eebile uwi taavi ni,
ɔdi kɔdɔlɔ.
12Beyune ni, bana lɛlɔ ala ani na buyu
na bétéyu-nya muedi eegyie bana lɛlɔ anumi.
Nsu bekyuli babuni ni, ama alati mɔɔnwu bana ebi.
13Bekyuli bekpidi ni, bana kenye etemila
muudie-ma teete.
Nsu bekyuli babuni ama baalɛ́ ɔgbankpi ɔmmɔ kemmo.
14Bekyuli baakana na baasia bana kenye etemila lɛlɔ
na baakɛ́ ala pii.
Lɛni kani na bana enu kabla lɛnɔ kaayá
na baakɛ́ kɔsia pii.
15Badɔlɔdi mɔɔkali banii
baláwia ka
ukyuli ɔdi ɔkya-ma kasusu.
Nsu banundane beesé atu teenu bekyuli bamba bɔlɛ.
16Ɔdɔlɔdi uuubo kɔnyi buti.
Nsu ukyuli ɔni náda anu ni,
si ina bédumi-nwu muedi ɔɔkɛ́ kayi buɛɛ.
17Ukyuli ɔni muudie lɛla lɛni na ɔ́nu kenye ulu lɛlɔ ni,
ɔɔsu litemi geen lɛmmɔ.
Nsu ukyuli ɔni muudie lɛla lɛni na útanu kenye ni,
ɔdi ɔkɔ ɔnyine.
18Bekyuli badi beedie ala taalɛ bekyuli
na aatu kayi.
Nsu banundane etemila aabwi bekyuli
bani kayi muunú ɔlɛ.
19Litemi geen liláyii udu uwi ɔdi kudii.
Na likpidi lɛnɔ liiibo keyi bɔlɛ.
20Ɔkɔ etemila aaƒɔ́ bekyuli bani muuti
likpidi kasusu kayi kemmo ƒui.
Na bani lɛnɔ na keyi buɛɛ kasusu na beeti ni,
lɛlɔyɔ mɔɔkya-ma kayi kemmo.
21Ɔgbankpi kpakplaa ɔdi ulébo bekyuli babuni lɛlɔ.
Nsu balalane ni, ɔgbankpi ulalɛ-ma ɔtɔ kemmo.
22Unwoti ukisi bekyuli bani naaadi bana linyese lɛlɔ.
Na bani mɔɔbla taasiaku-mu lɛlɔ baayɔ́-nwu kaƒɔ.
23Banundane belebo bana lɛlati kudu.
Nsu badɔlɔdi ama beedie bana kɔdɔlɔ keyi.
24Si aabla kabla kpakplaa ni,
adubɔtɔnku bekyuli.
Na si aabla kɔkɔsɔ ni, adubunwini kabla ɔblane
ete bekyuli bamba.
25Ukyuli ulalɛ lili si kasusu keekpóku-nwu.
Na etemila ani muusé kayi aayá na lɛlɔ lɛɛƒɛnimi-nwu.
26Bekyuli babuni baakya bana bakpana kasusu kabuni.
Nsu bekyuli bekpidi ama baatɔ́lɔ bana bakpana taatáyila.
27Kɔkɔsɔ kɔɔdi bekyuli lɛlɔ ɔni na ebuo ɔni bádu muedi
ukyuli bamba muuƒulo-nwu teete-ma.
Nsu bani mɔɔsia bana
kabla anu ni,
baada-ka kaduɛ.
28Bekyuli babuni kasiakɔ kaakpanku-ma
teesienku ngba kemmo, na ɔɔɔdi kekpine.
Currently Selected:
Agba 12: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
