Agba 13
13
1Ubi ɔni na ɔ́da anu ni, ɔɔtuna na nwuna bawɔne
baatumini-nwu kalɛ na ɔ́manku.
Na ɔnamu ɔni muuti lɛla biala taakya bɔƒia ni,
ulenu litemi.
2Bekyuli babuni baadi
kɔsia kɔni na
kɔ́lɛ kɔ́si kasusu kabuni
kani bákya bekyuli kemmo.
Nsu bekyuli bekpidi ni,
ama kadɔ ku unyeƒi
kani baanu ulu teete.
3Bekyuli bani ngyi kalɛ baada
bana unyemi ni,
beelie ngba gyɔlɔɔ.
Na kenye bɔtu bɔlɛ ukyuli ɔɔkana na uubile lɛla biala.
4Bakɔsɔne baawia ala pii,
nsu ɛlɛɛ muutúku-ma kɔnu.
Nsu bekyuli bani mɔɔbla kabla kpakplaa ni,
bana kabla kadubɔtɛ na badi bemo.
5Bekyuli babuni bekisi ɔkɔ ala.
Na balalane ama ni, kɔƒa muubo-ma lɛlɔ
na anumi eewi-ma kalɔ.
6Ngba buni bulie buubunku ukyuli
nwuna ngba emeyi kemmo ƒui.
Nsu bekyuli bekpidi ama ni,
bana kalala ndubɔya na bayii udu.
7Bawabane badi baabla lɛlɔ aani balakɛne.
Na babambadi bani ndi balakɛne lɛnɔ
baabla lɛlɔ aani bawabane.
8Balakɛne baakana na baƒɔ kayu biala
na beti baƒɔ bana lili ngba.
Nsu bawabane ama ni, bana lɛlɔ lilégyie anumi
na beduo ɔgbankpi ɔmmɔ udu kemmo muedi.
9Bekyuli babuni ni, lɛlɔ lɛɛyɔ́-ma
na bana keliela keekeye uwi ndi uwi.
Nsu ɔƒɛ ɔɔsá taakya alaekpidi bablane na ɔɔbla-ma suu.
10Bekyuli bani mɔɔtalaku lɛlɔ katɔ baakya unyeƒi pii.
Na bekyuli bani muunú bɔlɛ baadá anu.
11Lɛkɛ lɛni baasia ulu gontii lɛlɔ taakɛ liiibo bɔyii.
Nsu lɛla lɛni na aakɛ́ blii blii na ulu lɛlɔ lɛɛwɔ teebu.
12Si ukyuli ɔ́yila lɛnunsia ni, kayi keekpóku-nwu.
Nsu si ƒula ala ani na eegyé kɔna taanu aasia-a ni,
eenú ngba emini na lɛlɔ lɛnɔ lɛɛyɔ́-ɔ.
13Bekyuli bani muuní ka bekyuli balɛ-ma ni,
ɔgbankpi kemmo kani na badubo buduo.
Na bani mɔɔbu bekyuli bɔlɛ ni,
badubo bukpo bɔlɛ.
14Banundane bɔlɛ buse aani libiɔ lɛni mɔɔyu ntu
na baaní teelie ngba ute-ɔ.
Na ɔɔyá na ekeli liƒu lɛni na kukpi kɔɔkya-bu.
15Ukyuli ɔni mɔɔbla kasusu buni na ala lɛlɔ ni,
bekyuli baabu-nwu.
Na ukyuli ukpidi anwu ni, nwuna kasiakɔ
atakpɛ lɛlɔ na kaasia.
16Banundane baaka kasusu bɔbla
asa na baabla ala.
Uuuse lɛni ku badɔlɔdi, na baakun lɛmɛnɛ lɛnɔ
taasia ɔmmɔ kama.
17Ɔtalane ɔni naaagyi kalɛ beesié lɛtu ni,
uuti lɛlɔ taatákya ɔgbankpi kemmo.
Nsu ɔtalane ɔni ngyi kalɛ na baasu kenye ni,
ɔɔyá na kayi kaayɔ́ bekyuli.
18Ukyuli ɔni na alayɔ ka bedie-ɔ bɔƒiɔ ni,
kɔwaba ku kɔƒa ndubo-ɔ buƒie.
Nsu si átuna anii bédie-ɔ
bɔƒiɔ ni,
bekyuli ƒui badubo-ɔ bɔbu.
19Ebiti aada ukyuli si ƒula ayɔla ani na aawia
ébo-nwu kemmo lɛni.
Nsu badɔlɔdi belenu kalɔ teenwini bana ekpidi kama
kalɛ na ubo-nwu kemmo ute-ma lɛni.
20Ukyuli ɔni mɔɔdiku banundane kɔkpana ni,
anwu lɛnɔ ɔɔdá anu.
Lɛni kani na ukyuli ɔni na badɔlɔdi
na ɔɔdiku kɔkpana ni, anwu lɛnɔ ɔɔdɔlɔ.
21Alaekpidi bablane ni, ɔgbankpi mɔɔbi taasiaku-ma.
Na kusɛ kusɛ ɔɔsia bekyuli babuni kama uwi ndi uwi.
22Bekyuli babuni ni,
ama muusé bana bebi ku bawɔ kama.
Nsu bekyuli bekpidi lɛkɛ ni,
liinwíni bekyuli babuni lɛdi.
23Ina ɔwabane ɔ́kya edula pii ni,
ama bani naaabla ala ulu lɛlɔ baakana
na baƒɔ kɔsia kɔmmɔ baatɔlɔku.
24Si éni na átatumini ƒula bebi ni,
ɔɔtina ka alayɔ-ma.
Na si aayɔ́-ma bɔdi ni, ɔlɛka enye kpakplaa
na ada-ma kalɛ na ɔ́manku.
25Bekyuli babuni ni, ala ani bebo eemó-ma.
Nsu bekyuli bekpidi ni, bana ala elemo-ma.
Currently Selected:
Agba 13: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
