Bumomo Bɔka 32
32
Kaba Bekyuli Bani Nlie Yordan Ɔƒɛ Katukɔ
1Uwi ɔmmɔ kemmo ni, Gad ku Ruben kaba bekyuli bebo bebuo pii. Na kalɛ bánu Yaser ku Gilead kalɔ ka kadia kete ɔmantɛ bakɔ bɔtumini ɔsu ni, 2kaba kamɛni bekyuli bésie Mose ku Eleasar ku Israelƒuɔ batɔnkune kudɔ. Na básu banini, 3“Ati bene, Atarot ku Dibon ku Yaser ku Nimra ku Hesbon ku Eleale ku Sebam ku Nebo ku Beon 4kɔlɔ kɔni Unwoti ɔ́gyu ɔ́tɔ úkpo úte Israelƒuɔ mmɔ kɔdia kute bebuo bɔtumini geen. Na ɔmɛni ɔsu bɔ́kɛ bebuo kaduɛ na kana lɛlɔ.” 5Na básu Mose bene banini, “Si ɔdubɔdia ni, na bɛnu-bu kɔnyana na biti kalɔ kammɔ bite-bu na buti bɔbla bula kadikɔ. Na ɔ́sɔ útamanku ka bɔvia Yordan Ketu lɛnɔ.”
6Amu na Mose úye Gadƒuɔ ku Rubenƒuɔ bamɛni ɔnini, “Ɔdia ka bina banwani bésie bakya kekpo na amii bɛsɔ bɛkya mɛni? 7Bi ɔsu na bɛɛyɔ́ ka bɛƒɛ Israelƒuɔ enu ka besie betéti kalɔ kani na Unwoti úti uute-ma mmɔ? 8Lɛni na bina bati bábla uwi ɔni lɛ́tala-ma lɛ́siku Kades-Barnea ka bésie bátánu kalɔ kammɔ. 9Uwi ɔni na bésie Eskol Kɔwɛ kemmo na bénye mmɔ bánu kalɔ kammɔ kemmo ni, bénwini bébo na bábaƒɛ Israelƒuɔ bammɔ enu kalɛ na basɔ balakana kalɔ kani Unwoti úti úte-ma kemmo buduo. 10Na limeyi lɛmmɔ Unwoti kɔnyi kɔ́kɔ katɔ na úse kenye ɔnini, 11‘Ka bekyuli bammɔ béteti bana kayi ƒui bátasiaku-mi ɔsu ni, banana bani ƒui nákɛ akwa aavlanyɔ ku kama na báta bási Egyipte kalɔ lɛlɔ ɔdi biala ulanu kalɔ kani líse kenye ka meti mete Abraham ku Isak ku Yakob mmɔ. 12Ɔdi biala ulanu-ka amu ntu Kenesini Yeƒune ubidi Kaleb ku Nun ubidi Yosua lɛti, ɔsika ama kani néti bana kayi ƒui básiaku Unwoti kama.’ 13Na ɔmmɔ ɔsu Unwoti úti kɔnyi kpakplaa ɔ́kya Israelƒuɔ na ɔ́ya na bakɛ baaka taamana ketele kalɔ kakwiidi kammɔ kemmo akwa aavlene sɔɔn útédu ka kaba kani bekyuli nábla likpidi na Unwoti anumi békpi báyii udu.
14“Aanu amii bekyuli bekpidi bamɛni lɛnɔ ka bɛsiaku bina bati ɔbladu ɔmmɔ kani kama na bɛɛyá na Unwoti kɔnyi kɔsɔ kɔkɔ-nwu katɔ kubu na Israelƒuɔ lɛlɔ. 15Si bínwini kama bɛ́kya Unwoti ni, ɔdubo bekyuli bamɛni ƒui bɔda bɔkya ketele kalɔ kakwiidi kamɛni kemmo, na amii náya na bekyuli bammɔ ƒui badubo bɔyii udu.”
16Mmɔ na báni béde Mose na básu-nwu banini, “Te-bu kuƒi na bɔtu ayu bute bula bebuo na bɔda lɛma linengudi bute bula beleku ku bebi na mɛni. 17Nsu abu bɔ́klibi lɛlɔ ka bɔtu akpagya na abu ku Israelƒuɔ butékpo kekpo biala wetédu ka ama lɛnɔ bákɛ bana keliekɔ. Na ɔƒɛni ni, bula beleku ku bebi badubɔsɔ bulie lɛma linengudi lɛni bɔ́tu awodu bɔ́mana mɛni kemmo kalɛ kalɔ kammɔ bekyuli balakana-ma lɛla lɛdi bubabla. 18Na bɔɔɔdubo bunwini busie bula kaduli utédu ka Israelni biala ɔ́kɛ nwuna kadikɔ. 19Na abu bulawia kadikɔ kadi bulásiku-ma kudɔ na Yordan ɔvi ɔmmɔ. Ɔsika abu bɔ́ɔkɛ bula kadikɔ na Yordan ɔƒɛ katukɔ kakɛ.”
20Amu na Mose údie kenye ɔnini, “Si lɛla lɛni bɛ́su mɛni lɛdi sɔsɔ na Unwoti anumi mɛni ka binye kagyumana ka bisie bitékpo, 21na bina banana bekpone badubɔvia Yordan besie betékpo na Unwoti ɔda bubo kalɔ wetédu ka Unwoti ɔ́di bina bekisine ƒui lɛlɔ ni, 22bibo kuƒi ka binwini bibo na lɛla lɛdi lɛsɔ lɛɛɛda-mii na Unwoti iye Israelƒuɔ anumi. Na kalɔ kamɛni kadubunwini bina kadikɔ na Unwoti anumi.
23“Nsu si bɛ́nyi ɔkɔ na bítesie bítetékpo bɔdi ni, na bɛnu bɛti ka bɛ́bla likpidi na lɛdubo-mii budie bute. 24Bɛda lɛma linengudi bite bina beleku ku bebi na bɛ́tu ayu bite bina bebuo. Nsu bɛnu ka bɛ́di kenye kani na bíse lɛlɔ.”
25Amu na Gadƒuɔ ku Rubenƒuɔ básu Mose banini, “Ati, ƒula kabla bablane na bɔdi, bɔdubɔbla kalɛ kani na ébo-bu ɔda. 26Na bula beleku ku bebi ku bebuo badubɔsɔ bakya Gilead mɛni. 27Nsu bula ƒui bunye kagyumana ka busie kekpo na Unwoti ɔda bubo kenye. Na bɔdubɔvia Yordan na butékpo aani kalɛ kani awɔ bula ati ásu.”
28Anwuɔsu Mose ubo ɔkpane Eleasar ku Nun ubidi Yosua ku Israelƒuɔ batɔnkune ɔda 29na ɔ́su-ma ɔnini, “Si Gadƒuɔ ku Rubenƒuɔ ɔnana biala ɔ́klibi lɛlɔ úte kekpo na bɛ́via Yordan Ketu amii ku-ma na Unwoti anumi na bítádi kalɔ kammɔ lɛlɔ ni, na biti Gilead kalɔ kammɔ bite-ma na kenwini bana kadikɔ. 30Nsu si bátavia Yordan Ketu na amii ku-ma bisie betékpo ni, na amii ku-ma bile Kanaan kalɔ kammɔ.”
31Amu na Gadƒuɔ ku Rubenƒuɔ bédie kenye banini, “Abu bɔdubɔbla lɛla biala na Unwoti úbo-bu ɔda. 32Na nwuna ɔda bubo lɛlɔ ni, bɔdubɔtu akpagya na bɔvia Yordan Ketu busie Kanaan kalɔ lɛlɔ butékpo. Kalɛ na bula kadikɔ kani nkya Yordan ɔƒɛ katukɔ kabla bula kadi.”
33Anwuɔsu Mose úti Amoriƒuɔ Ɔga Sihon ku Basanƒuɔ Ɔga Og lɛgakadikɔ kalɔ ku lɛma lɛni nkya amadɔ mmɔ ƒui úte Gad ku Ruben kaba ku Yoseƒ ubidi Manase kaba bekyuli. 34Na Gadƒuɔ básɔkɔ lɛma lɛdi bátu bámana kpakplaa ku awodu na lɛma lɛmmɔ ndi Dibon ku Atarot ku Aroer 35ku Atrot-Soƒan ku Yaser ku Yogbeha 36ku Bet-Nimra ku Bet Haran lɛma, na bátu ayu béte bana baƒonu. 37Na Rubenƒuɔ kaba bekyuli bátu Hesbon ku Eleale ku Kiriataim 38ku Nebo ku Baal-Meon ku Sibma lɛma. Na lɛma lɛni básɔku bátu mɛni básia-ni anyi.
39Manase ubidi Makir kaba bekyuli báta bésie Gilead na bétékpo bádi-ma lɛlɔ. Na bábɔku Amoriƒuɔ bani nlie mmɔ. 40Anwuɔsu Mose úti Gilead úte Makirƒuɔ bani ndi Manase kaba bekyuli na béti mmɔ bénwini bana kadikɔ. 41Na Manase kaba kemmo ubi ɔni balɔ Yair ɔ́ta na útékpoku bekyuli badi na akpaklɔ adi kemmo na ɔ́sia akpaklɔ ammɔ anyi ɔnii Yair Akpaklɔ. 42Na Noba lɛnɔ úsie na útékpoku Kenatƒuɔ ku bana akpaklɔ lɛma na úti nwuna lɛnyi ɔ́sia akpaklɔ ammɔ.
Currently Selected:
Bumomo Bɔka 32: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
