Bumomo Bɔka 31
31
Israelƒuɔ Bétékpoku Midianƒuɔ
1Amu na Unwoti ɔ́su Mose ɔnini, 2“Ta na atáni Midianƒuɔ kɔtu na lɛla lɛni bábla Israelƒuɔ ɔsu. Na ɔmmɔ kama adubo bukpi.”
3Anwuɔsu Mose ɔ́su Israelƒuɔ bammɔ ɔnini, “Bɛta na bɛtu akpagya na bɛklibi lɛlɔ na bitékpoku Midianƒuɔ. Na bɛni-ma kɔtu na lɛla lɛni bábla Unwoti ɔsu. 4Na kaba biala kemmo ni, bidie nkyuli apim unwi na betékpo.”
5Ɔmmɔ ɔsu bédie nkyuli apim unwi bálɛku kaba biala kemmo. Na nkyuli mpim leevu-inyɔ bátu akpagya bétékpo. 6Mose ɔ́tala-ma na bésie bétékpo, na ɔkpane Eleasar ubidi Pinehas nákpanku-ma. Na anwu néti Unwoti Kevo kemmo ala kedee ku kɔkpɛɛ kɔni baavwi teete kati kadi ɔ́da. 7Na bétékpoku Midianƒuɔ bamɛni aani kalɛ na Unwoti úbo Mose ɔda. Na bádu banana bani ƒui nkya mmɔ. 8Na bádu Midianƒuɔ baga ɛlɔ na bani bádu mmɔ ndi Ewi ku Rekem ku Sur ku Hur ku Reba. Na bádu Beor ubidi Bileam lɛnɔ.
9Na Israelƒuɔ béti Midianƒuɔ beleku ku banamu ku bana bakɔ ku bebuo ku bana akɛla bátɔlɔku 10na bátu ogya bákya bana lɛma linengudi ku bana kuliekɔ ƒui. 11Na béti-ma ala ani ƒui na béƒie báƒɔ ku bekyuli beƒiedi bammɔ ku bebuo bátɔlɔku. 12Na béti-ma béboku Mose ku ɔkpane Eleasar ku Israelƒuɔ na bana keliekɔ na Moab kalɔ kani nwi ƒiaa úsie Yordan Ketu na Yeriko kakɛ.
Bekpone Bammɔ Básɔ Bénwini
13Mose ku ɔkpane Eleasar ku kadi batɔnkune bammɔ báta na bátásiaku bekpone bammɔ na kabanye. 14Mmɔ ni, Mose ɔ́kɛ kɔnyi ɔ́kya bekpone batɔnkune bani ntɔnku bekpone esu enengudi ku ebliidi ammɔ ƒui bani nási kekpo bébo mmɔ.
15Úye-ma ɔnini, “Bi ɔsu na bítadu beleku bammɔ ƒui? 16Ɔɔɔdi beleku bamɛni násiaku Bileam kasusu kama na Peor? Na ɔmɛni ɔ́ya na Israelƒuɔ báta bénye Unwoti ɔda bubo lɛlɔ na ɔlɛ úbasiaku Unwoti bebi? 17Ɔmɛni ɔsu bɛdu banana bammɔ ƒui ku beleku bani na ama ku ɔnana báatɛ dii. 18Nsu bɛda uleku biala na ɔɔɔgyi ɔnana bise bite lɛlɔ.
19“Na bina akɔ ɔdi biala na ɔ́du ukyuli ɔdi iye úti kɔnu útuku ukpine ɔmmɔ ɔdi ulie kakyakɔ kama emeyi maatɛ. Na limeyi lɛtɛdi ku maatɛdi lɛlɔ ni, amii ku bekyuli beƒiedi bammɔ ƒui bɛbla lɛlɔ sɛɛn. 20Na bina lɛwu ku lɛla biala na lɛdi bebuo ɔku iye ese linwini iye kegyiikɛ ni, bɛbla-ni sɛɛn.”
21Ɔkpane Eleasar ɔ́su bekyuli bani nási kekpo bébo mmɔ ɔnini, “Ala ani na Unwoti ɔda bubo bɔni na úte Mose bɔdanku na ɔlɛka bɛbla ndi ɔmɛni. 22Sika ugyiedi iye ɔƒualadi iye abualagyie iye abuala geen iye abuala kpɛtɛ kpɛtɛ 23ku lɛla biala na lɛkana ogya kenye bunye ni, ɔlɛka bakya-ni ogya kemmo babla-ni sɛɛn na baƒɔ-ni ku abuala bɔƒɔ ntu. Na ala ani na aladia ogya bɔkya lɛnɔ ɔlɛka babla-nya lɛlɔ bɔƒɔ ɔdi na abla sɛɛn. 24Na limeyi maatɛ lɛlɔ ni, ɔlɛka bɛƒɔ bina adala. Na ɔmmɔ kama bɛdubɔbla sɛɛn na bɛkana bitéduo bina kakyakɔ.”
Kalɛ Ɔlɛka Bele Ala Eƒiedi Ammɔ
25Amu na Unwoti ɔ́su Mose ɔnini, 26“Awɔ ku Eleasar ku kadi batɔnkune bammɔ bɛka bekyuli beƒiedi ku bebuo bani ƒui na bekpone bammɔ béti beboku mmɔ. 27Na bile ala ammɔ ƒui kemmo inyɔ. Na biti lɛkpa linwi bite bekpone bammɔ na bele. Na bele lɛkpa linyɔdi lɛmmɔ bete Israelƒuɔ bakladi. 28Na ala ani ndi bekpone bani nésie kekpokɔ adi na badi bekyuli ku ɔmantɛ bakɔ ku baƒonu ku bese ni, bedie unwi na eti leevu biala na báka ala ammɔ adi biala kemmo bete Unwoti aani lɛlɔ bɔdi enugya etela sɛsɛɛ. 29Na beti ala ammɔ bete ɔkpane Eleasar na uti ɔbla kuyii sɛsɛɛ kɔdi ute Unwoti. 30Na lɛkpa lɛni lɛdi kadi bekyuli bammɔ ɔdi ni, bedie unwi na liti biala na báka na ala ammɔ ɔdi biala kemmo na badi bekyuli ku ɔmantɛ bakɔ ku bebuo ala betine ku baƒonu ku bese iye bebuo bamba. Na biti-ma bite Lewiƒuɔ bani mɔɔbla kabla na Unwoti Adi Kevo Kemmo mmɔ.” 31Anwuɔsu Mose ku ɔkpane Eleasar bábla básiaku kalɛ na Unwoti úbo-ma ɔda.
32Na ala ani na bekpone bammɔ békpo na béƒie bátɔlɔku bumomo ndi baƒonu mpim eti leevu-ɛtɛ ku aavlanyɔ-ɛlɔ (675,000), 33ɔmantɛ bakɔ mpim liti ku aavlanyɔ-inyɔ (72,000), 34bebuo ala betine mpim liti ku leevu-unwi (61,000), 35beleku bani na bátatɛ tɔ ɔnana kudɔ kudii mpim avlaatɛ-inyɔ (32,000).
36Na ala ammɔ kakɛ kani béle béte bekpone bani nésie kekpokɔ mmɔ bumomo ndi
baƒonu mpim eti aku ku avlaatɛ-maatɛ ku eti leevu (337,500),
37na nwuna kemmo Unwoti enugya etela adi baƒonu eti leevu-ɛtɛ ku aavlanyɔ-ɛlɔ (675),
38ɔmantɛ bakɔ mpim avlaatɛ-ɛku (36,000),
na Unwoti enugya etela adi liti ku aavlanyɔ-inyɔ,
39bebuo ala betine mpim avlaatɛ ku eti leevu (30,500),
na Unwoti enugya etela adi liti ku leevu-unwi,
40na bekyuli bammɔ badi mpim leevu-ɛku (16,000),
na Unwoti enugya etela adi avlaatɛ-inyɔ.
41Na Mose úti enugya etela ani ndi Unwoti kakɛ úte ɔkpane Eleasar aani kalɛ na Unwoti úbo-nwu ɔda.
42Na kakɛ kani nésie Israelƒuɔ kudɔ na Mose údie úse sɛsɛɛ ɔ́siku bekpone bammɔ ɔdi kudɔ ndi 43baƒonu mpim eti aku ku avlaatɛ-maatɛ ku eti leevu (337,500), 44ɔmantɛ bakɔ mpim avlaatɛ-ɛku (36,000), 45bebuo ala betine mpim avlaatɛ ku eti leevu (30,500) 46bekyuli mpim leevu-ɛku (16,000), 47na kakɛ kani nésie Israelƒuɔ kudɔ ni, Mose údie ukyuli unwi ku ebuo unwi ɔ́lɛku liti biala kemmo na úti úte Unwoti aani kalɛ na Unwoti úbo-nwu ɔda. Na úti bekyuli ku bebuo bammɔ úte Lewiƒuɔ bani mɔɔbla kabla na Unwoti Adi Kevo kemmo.
48Amu na bekpone batɔnkune bani mɔɔtɔnku bekpone esu enengudi ku ebliidi bésie Mose kudɔ 49na bátásu-nwu banini, “Ƒula kabla bablane báka bekpone bani nkya-bu kalɔ ka bɔ́si kekpo búbo. Na ka bɔ́ka-ma bɔ́nu ni, ina unwi útayii. 50Anwuɔsu búti sika ugyiedi ku likpose kɔkwɛnimi ku asɛɛ lidu lidu ani na ɔdi biala ɔ́kɛ búboku Unwoti kalɛ na udie likpidi kɔtu bɔni bula lɛlɔ.”
51Amu na Mose ku Eleasar báƒɔ sika ugyiedi ɔmmɔ ku nwuna lɛlɔ ala ammɔ ƒui. 52Na ana bumomo bɔni na báƒɔ básiku bekpone esu enengudi ku ebliidi ammɔ batɔnkune kudɔ ƒui unu ɔdubɔbla aani edula ebi aƒo anyɔ ku kakɛ unu na Mose ku ɔkpane Eleasar béti ala ammɔ béte Unwoti aani etela. 53Nsu bekpone bakladi ɔdi biala ɔ́kɛ lɛla lɛdi úte lɛlɔ na kekpokɔ mmɔ. 54Na Mose ku Eleasar báƒɔ sika ugyiedi ɔni bekpone bammɔ béti beboku-ma mmɔ, na ama lɛnɔ béti-nya bésienku Unwoti Adi Kevo mmɔ aani enyimo likposela etela.
Currently Selected:
Bumomo Bɔka 31: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
