Bumomo Bɔka 33
33
Kalɛ Israelƒuɔ Bélie Bávi Na Bana Ulu Busie Kemmo
1Kalɛ na Israelƒuɔ bélie báta na bana esu esu kemmo uwi ɔni na Mose ku Aaron bátɔnku-ma na bésie ulu bási Egyipte kalɔ ndi ɔmɛni. 2Na Unwoti ɔda bubo kenye ni, Unwoti ɔ́ya na Mose únweni kalɛ na Israelƒuɔ bélie báta bélie bata na bana ulu busie kemmo na anwu ndi ɔmɛni.
3Israelƒuɔ báta bási Rameses ɔma na kɔbuli kudeedi limeyi leevu-lɛlɔndi lɛlɔ na Kukpi Lili Bɔvia Limeyi bɔdi kadi kegye. Na básia bálɛ ɔma ɔmmɔ kemmo ku kayi buse na Egyipteƒuɔ anumi 4uwi ɔni na Egyipteƒuɔ bákya bátaava bana bebi bedeedi, bani na Unwoti ɔ́du mmɔ, ɔsika Unwoti ɔ́ni bana baƒiɔ bammɔ kɔtu.
5Israelƒuɔ báta Rameses na bátáda keliekɔ na Sukot.
6Báta Sukot bátáda keliekɔ na Etam ɔni nkya ketele kalɔ kakwiidi kenye.
7Báta Etam mmɔ bénwini bébo Pi-Hahirot ɔni nkya Baal-Seƒon ɔƒɛ katukɔ kakɛ na bátáda keliekɔ na Migdol kudɔ.
8Báta Pi-Hahirot anumi mmɔ bátávia ɛpu bésie ketele kalɔ kakwiidi kemmo. Na bésie bávi Etam ketele kalɔ kakwiidi kammɔ emeyi atɛ na bátáda keliekɔ na Mara.
9Báta bási Mara bétéduo Elim kesii kani na abiɔ leevu-anyɔ ku ebo liti ku aavlanyɔ ákya, na báda keliekɔ na mmɔ.
10Báta Elim bátáda keliekɔ na Ɛpugyie kɔtu.
11Báta Ɛpugyie kɔtu bátáda keliekɔ na Sin ketele kalɔ kakwiidi kemmo.
12Báta Sin ketele kalɔ kakwiidi kemmo mmɔ bátáda keliekɔ na Doƒka.
13Báta Doƒka bátáda keliekɔ na Alus.
14Báta Alus bátáda keliekɔ na Reƒidim, na mmɔ ni, Israelƒuɔ bátakɛ ntu bɔni na bani.
15Báta Reƒidim bátáda keliekɔ na Sinai ketele kalɔ kakwiidi kemmo.
16Báta Sinai ketele kalɔ kakwiidi kemmo mmɔ bátáda keliekɔ na Kibrot-Hataawa.
17Báta Kibrot-Hataawa bátáda keliekɔ na Haserot.
18Báta Haserot bátáda keliekɔ na Ritma.
19Báta Ritma bátáda kelie na Rimon-Peres.
20Báta Rimon-Peres bátada keliekɔ na Libna.
21Báta Libna bátáda keliekɔ na Risa.
22Báta Risa bátáda keliekɔ na Kehelata.
23Báta Kehelata bátáda keliekɔ na Seƒer Kɔbi lɛlɔ.
24Báta Seƒer Kɔbi lɛlɔ bátáda keliekɔ na Harada.
25Báta Harada bátáda keliekɔ na Makhelot.
26Báta Makhelot bátáda keliekɔ na Tahot.
27Báta Tahot bátáda keliekɔ na Tare.
28Báta Tare bátáda keliekɔ na Mitka.
29Báta Mitka bátáda keliekɔ na Hasmona.
30Báta Hasmona bátáda keliekɔ na Moserot.
31Báta Moserot bátáda keliekɔ na Bene-Yaakan.
32Báta Bene Yaakan bátáda keliekɔ na Hor-Hagidgad.
33Báta Hor-Hagidgad bátáda keliekɔ na Yotbata.
34Báta Yotbata bátáda keliekɔ na Abrona.
35Báta Abrona bátáda keliekɔ na Esion-Geber.
36Báta Esion-Geber bátáda keliekɔ na Kades na Sin ketele kalɔ kakwiidi kemmo.
37Báta Kades bátáda keliekɔ na Hor Kɔbi na Edomƒuɔ kalɔ ɔmii lɛlɔ.
38Na Unwoti ɔda bubo lɛlɔ ni, ɔkpane Aaron ɔ́kɔ úsie Hor Kɔbi lili kesii kani na útékpi na lɛkwa aavlenedi kuna kɔbuli kɔlɔndi limeyi lideedi lɛlɔ ɔni na Israelƒuɔ bálɛ Egyipte kalɔ lɛlɔ.
39Na Aaron ɔ́kɛ akwa eti anyɔ ku aavlanyɔ-ɛtɛ (123) asa na úkpi na Hor Kɔbi lili mmɔ.
40Uwi ɔmmɔ kemmo ni, Kanaan ɔga ɔni mɔɔdi Arad ɔma lɛlɔ na ulie Negev únu ka Israelƒuɔ bási badubo.
41Israelƒuɔ báta Hor Kɔbi lɛlɔ bátáda keliekɔ na Salmona.
42Báta Salmona bátáda keliekɔ na Ƒunon.
43Báta Ƒunon bátáda keliekɔ na Obot.
44Báta Obot bátáda keliekɔ na Iye-Abarim na Moab ɔmii lɛlɔ.
45Báta Iyim bátáda keliekɔ na Gibon-Gad.
46Báta Gibon-Gad bátáda keliekɔ na Almon-Diblataim.
47Báta Almon-Diblataim bátáda keliekɔ na Abarim Kɔbi lɛlɔ na Nebo.
48Báta Abarim Kɔbi lɛlɔ bátáda keliekɔ na Moab kalɔ ƒiaa lɛlɔ na Yordan kakɛ kani kede Yeriko.
49Na báda keliekɔ na Yordan Ketu ɔ́si Bet-Yesimot útédu Abel-Sitim na Moab kalɔ ƒiaa lɛlɔ.
50Na Moab kalɔ ƒiaa kani ntɛ késie Yordan Ketu ɔ́via ɔ́si Yeriko ni, Unwoti ɔ́su Mose ɔnini, 51“Kɔ lɛsa na asu Israelƒuɔ anini, ‘Si bɛ́via Yordan Ketu na bitéduo Kanaan ni, 52na bɛbɔku bekyuli bani ƒui nlie kalɔ kammɔ kemmo na bina anumi. Na bibile bana ala anwidi ku ala ani béti ogya banwami babla baƒiɔ na bibile bana baƒiɔ bani na bátu bálɛ abi eli mmɔ ƒui. 53Na biti kalɔ kammɔ na bilie mmɔ, ɔsika ami Unwoti néti kalɔ kammɔ muute-mii ka biti-ka bɛbla bina kadikɔ. 54Bɛtu egulabi na bɛnu kalɔ kammɔ bule. Na kaba kani bekyuli mmomo ni, bite-ma kadikɔ na kemomo. Na bani nse blii suɛ ni, bite ama lɛnɔ blii suɛ. Na lɛla lɛni nédu ɔdi biala na kalɛ na bɛ́tu egulabi ammɔ bɛ́nu kenye ni, mmɔ ndubɔbla bana kadikɔ. Na si atu egulabi ammɔ kesii kani nésie kaba biala kakɛ ni, ti-ka ute kaba kammɔ. Na ele-ka na kaba bati bammɔ kenye.
55“ ‘Na si bíni na bítagya-ma bítalɛku ni, badubunwini kugyiikɛ bakya-mii anumi na benwini atula alɛ-mii lɛƒɛnyi. Na badubo-mii buteekpoku na kalɔ kammɔ kemmo. 56Na lɛla lɛni na nka ndubo-ma bɔbla ni, amii mmomu na ndubo-ni buti bɔbla.’ ”
Currently Selected:
Bumomo Bɔka 33: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
