Kɔnyana Buwulo 3
3
Lɛnunsia Lɛdi Líbu
1Ɔkɛnku kɔnyi kɔni na
Katɔti úti ɔsu,
líbo abi geen.
2Na ɔ́bɔku-mi útákya kesii
kani na bukeye bɔdi
bulakana buduo.
3Na limeyi ndi limeyi ni,
ami lɛti kani
na unye ɔɔní kɔtu taasia kama.
4Katɔti ɔ́ya na mina ɔlɔna
ɔ́yii udu,
na mina ekubi ese aani bɔbwɛ na ada kɔkɛ kɔkɛ.
5Ɔ́ta únye-mi lɛlɔ, na ɔ́ya na ɔgbankpi
ku lɛbibo lɛ́ka lɛ́mana-mi.
6Ɔ́ya na lɛ́sɔ nli kasuudikɔ mmɔ
aani ukyuli ɔni na úkpi kukuuku ƒui.
7Katɔti ɔ́gyi ɔban ɔ́kya-mi ɔni na naaakana bɔkɔ bɔvia-nwu,
na úbo-mi kɔgba úse
liku linwi.
8Na ina uwi ɔni na mɔɔva taakpali-nwu nnii
ubunku-mi muedi ni, úni na útakpete-mi.
9Katɔti úti atakpɛ bonwu bonwu ɔ́bala-mi ulu lɛlɔ,
na mina kasiakɔ kábla gontii.
10Na ɔɔtú-mi aani kalɛ na gyata uubi ulu lɛlɔ
taatu ebuo ɔni na uƒie.
11Na ɔ́tu úbada-mi, na ɔ́ni-mi ɔtɔlɔku ulu lɛlɔ
útáduli-mi kɔkɛ kɔkɛ.
12Katɔti ɔ́nu mina ligeen,
na úbo nwuna atula úbalɛ-mi,
13na áƒuaala-mi kayi álɛ.
14Lɛ́ta línwini lɛƒiankula líte ukyuli biala,
na baláda-mi lɛlɔ lɛma bɔkya taaya.
15Katɔti ɔ́ya na mina ngba búnwini ɔdu ɔdu búte-mi.
16Ɔ́bla aani si ɔtumu lɛ́kpi nkɛ,
na atabi na úte-mi ɔnii ntaanwanta
na ɔƒɛ-mi anyi.
17Liiibo bɔnwuna bɔdi na mina lɛlɔ kemmo
na nsɔ neeenyimo ebiti
adi lɛnɔ.
18Anwuɔsu lɛ́su mina lɛlɔ nnini,
“Ɔƒaamu ami ɔdi ɔ́sa!
Nsɔ lɛɛɛdubo ulu bɔnu nnii
Unwoti ɔdubɔbla lɛla lɛdi ute-mi.”
19Na si nnye mɔɔbla kasusu taasiku mina lɛbibo
ku kalɛ na ami lɛti nkɛ mɔɔka taamana ni,
ɔɔyá na mina lɛlɔ lɛɛbla-mi kɔnyana geen.
20Ɔmmɔ lɛlɔ kani na mina kasusu kasia uwi ndi uwi
na ɔɔyá na kayi kaakpulu-mi geen.
21Nsu muunyimo lɛla linwi
lɛni mɔɔyá
na nsɔ mɔɔkɛ́ kayi.
22Unwoti uleni lɛƒɔndia bɔbla kudii!
Ɔsika si ɔɔɔdi nwuna kɔnyana
kɔni na ɔ́nu-bu ɔsu ni,
nka bɔ́yii ku udu.
23Unwoti ɔdi ukyuli ɔni lɛlɔ na basia anu ka
ɔdubɔnu-bu kɔnyana ɔtanta biala.
24Na mina kayi ɔkwalɛ kemmo
ƒui ni,
mɔɔsu lɛlɔ geen nnini,
“Unwoti kani ndi ukyuli ɔni mɔɔwia.
Na nwuna lɛlɔ kani na ndubukpo kama!”
25Ukyuli biala ɔni néti nwuna
anu ɔ́sia
Unwoti lɛlɔ na uunú-nwu litemi ni,
Unwoti ɔɔbla-nwu lɛƒɔndia.
26Ɔdia geen ka bɔkɛ kayi na bunye butaanu
Unwoti anumi na udie-bu.
27Ɔdia ka bɔbla kagyoklo kaduɛ
uwi ɔni na bɔ́si bɔɔkɔ́.
28Na si etila ammɔ aayu-bu unu muedi ni,
na budie lɛlɔ lɛti,
na bɔsɔ bulie kpoo butaabla lɛla lɛmmɔ kasusu
si lɛni na Unwoti ɔ́tuna ka ubo-bu lɛlɔ.
29Si éboku lɛlɔ kalɔ buɛɛ ni,
adubɔkɛ lɛla lɛni na asia anu.
30Lɛni kani na adubɔtɛya ala si bekyuli beedumi-ɔ
na bana ebola éduo-ɔ lɛlɔ.
31Unwoti ɔɔɔdubo-bu buni
uwi ƒui!
32Ɔɔyá na buubó abi geen,
nsu lɛni kani na ɔɔnu kɔnyana,
ɔsika ubo bɔyɔ ute-bu
uwi ndi uwi.
33Lɛlɔ lilayɔ Unwoti ka ɔya na buteebo abi
na buteenu ɔlɛ lɛnɔ.
34Bɛsɔ bitataakɔ taanya
batɔntɛne eli teesusu.
35Na bitebulo ukyuli kuƒi bute ka ɔbla ala ulu lɛlɔ.
Katɔti Ɔyikune Ƒui ɔɔnu
lɛla biala.
36Na ɔgyi uwi ɔni na ɔdi úni ka
ɔtɛ ukyuli ɔbambadi
litemi siin.
37Ukyuli ɔdi ulakana lɛla lɛdi bɔbla
si Unwoti útete-nwu kuƒi kɔmmɔ.
38Lɛbuni lɛdi o-o likpidi
lɛdi o-o ni,
Katɔti Ɔyikune Ƒui
muudie lɛdi
asa na uubo-nwu kemmo lɛni.
39Ka bɔmu bulie ngba ɔsu ni,
utalɛ ka buteeni lɛla lɛdi
si báni-bu kɔtu na bula
ekpidi ɔsu.
40Mmomu ɔlɛka bɔsia anu kalɛ na bɔti ngba bulie bɔmmɔ,
na bunwini bubo Unwoti kudɔ.
41Na si bɔ́kɔliku enu katɔ bɔɔkpali Katɔti ni,
ɔlɛka buti bula kayi lɛnɔ bute-nwu na bɔsu bɔnini,
42“Bɔ́bla alaekpidi bɔ́ƒiɔ, na bɔ́ta búnye-ɔ lɛlɔ,
na éteti tɔ átakyiɛ-bu!
43“Kɔnyi kɔ́ƒɔ-ɔ lɛlɔ kemmo ƒui
na asiaku-bu aadú-bu
ɔni na kɔnyana bɔnu bɔdi buuubo.
44Ábɛla lɛlɔ ákya liƒlukutu
lɛdi kama,
na liitile ulu ka bula bɔkpali budu-ɔ kudɔ.
45Áya na kadi bamba bekyuli bada-bu beebó teewi
aani kebu alakpi.
46“Na bula bekisine beewida-bu.
47Bákywɛ-bu kɔkpagyuɛ
na liƒu bonwu kemmo kani
na bulie,
na báka-bu bákya beesusu,
na bayila-bu udu.”
48Báyila mina bekyuli udu!
Na imii sɔɔn nda-mi anumi.
49Na balada baláya lɛnɔ úti útédu
50uwi ɔni na Unwoti únwini ɔ́nu-bu
ɔ́siku katɔ mmɔ na úbunku-bu.
51Ɔtɔtɔ ukpidi ɔɔgyú-mi si lɛ́nu ala ani udu
na bekisine bábla bula ɔma unengudi ɔmmɔ begblebi.
52Ńtabla lɛla lɛni na ukyuli ɔdi
ɔsu ɔnii
anwuɔsu na ɔlɛka ukisi-mi.
Nsu basiaku-mi baabwi-mi
aani aasɛ ka badu-mi.
53Na baawia lɛnɔ ka bedi-mi bakya libiɔ kemmo
na bebo-mi atabi na likpi.
54Ntu búyi bɔ́via-mi lili,
na lɛ́bu nnii
mina kawɔlɔkɔ na kadi mmɔ.
55Nsu ubu kemmo mmɔ nkya
na lɛ́kpali awɔ mina Unwoti.
56Lívele-ɔ nnii enu-mi bɔkpali
na ebunku-mi ku kɔvanu
na lɛ́su nnini,
“Bunku-mi! Ƒɔ-mi!”
Na énu éte-mi sɔsɔ.
57Ébo uwi ɔni geen lɛlɔ na mɔɔwia-a kebunku,
na ásu-mi anini,
“Da bɔyia ya!”
58Édie-mi na áƒɔ-mi ngba.
59Unwoti, ánu ala ani udu na mina bekisine bábla-mi,
anwuɔsu tɛ litemi lɛmmɔ na edie lɛla biala atina siin.
60Agyi likpidi lɛni lili na bása na mina lɛlɔ.
61Sɔsɔ na ɔdi ka agyi kalɛ na beedumi-mi
ku kɔkwɛ kukpidi kɔni na baakya-mi lɛlɔ.
62Baatɛmiku lɛlɔ kabɛnsɛ,
na bada kenye etemila beekpóku-mi limeyi limodi.
63Bebo uwi ina bi kabla lɛlɔ na benye ka bedumi
na bataakya-mi lɛlɔ lɛma.
64Unwoti, ƒɔ-ma lɛla biala
na bábla-mi kayu!
65Ya na ƒula ewida asiaku-ma
na aya na bebo abi geen.
66Bɔku-ma die kalɔ kammɔ ƒui lɛlɔ kede kede
na ƒula kɔnyi kemmo útédu ka
basɔ balanu bana ɔdi.
Currently Selected:
Kɔnyana Buwulo 3: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
