Kɔnyana Buwulo 4
4
Unwoti Ɔ́ni Yerusalem Kɔtu
1Bébile sika ugyiedi ɔni
náƒɔ kuye útulo ƒui
na ɔsɔ ulékeye kalɛ na uukeye.
Na bégyingya Katɔti kakpakɔ asɛɛ ebi
ani náƒɔ kuye mmɔ béwi kuyeya na lɛblɔnu lɛlɔ.
2Na Sion bebi bani na nka báƒɔ kuye betulo sika
ugyiedi ni,
bekyuli baanu-ma aani lɛvɔti akyami ani naaadi
ku lɛla.
3Beƒiebuo muedi baanyuɛ
bana bebi,
nsu mina bekyuli bese aani aasɛ bonwu ɔdi
ɔni muudie nwuna bebi atu.
4Utukwɛ ɔ́du bebiwɔ ɔni na bana linyemi
lɛ́du lɛ́ma bana kenye kemmo.
Na banamu bakɛ beevele adila,
nsu ukyuli ɔdi ulete-ma.
5Na bani mɔɔdi balakɛne adila ku lɛmwi ku lɛmwi muedi ni,
batɛ beekpi ku kɔka na lɛblɔnu lɛlɔ.
Na bani nási bákɔ na kɔduli kɔbuni kemmo
na baaagyi ayaki adi ni,
ɔƒɛni amu beli kɔwaba kemmo.
6Unwoti ɔ́ni mina kalɔ bekyuli kɔtu útulo
kalɛ na ɔ́ni Sodom ɔma unengudi ɔmmɔ bekyuli kɔtu,
na ɔ́ya na bábwɛ-ma ɔma uwi klukwii ɔdi kemmo kani,
na ɔdi uuubo na ubunku-nwu.
7Yerusalem batɔnkune bétebie na beekeye
aani etubankɛ iye aani si nnɔmii báwɛɛ.
Na bebo ɔlɔkplu na baadia bɔnu aani asɛɛ ebi
ani náƒɔ kuye na aatu anumi.
8Nsu ɔƒaani ni, bana ɔlɔgyii
ɔ́nwu tonto
aani kɔma nnɔ batondi bɔni na beewi ulu.
Na ukyuli biala ulánu-ma taati.
Ɔsika bana ɔlɔna ɔ́kwii ɔma-ma ekubi lɛlɔ,
na ɔ́kwii útulo kekyweni.
9Si bádu ukyuli ku kewii ni,
ɔdia utulo ka kɔka kutaada-a na ukpi.
10Ngba bulie na ɔma unegudi kemmo bubo ɔkplu geen,
na ɔni na bebi beni béƒulo ama alati bebi bákun.
11Unwoti úti kɔnyi kpakplaa ɔ́kya Sion geen
ɔni na ɔ́ya na bekisine bákyula ɔma ɔmmɔ béwi kalɔ kpɛtɛ kpɛtɛ.
12Na ɔga ɔdi uuubo kalɔ
kamɛni lɛlɔ
iye kadi badi bátati banii bekisine badi
badubɔkana na babwɛ beduo ɔma ɔmɛni
lɛban kayakun kemmo kudii.
13Yerusalem Katɔti kenye bediene ku bakpane
bábla ekpidi bonwu bonwu geen ɔni náya
na bekyuli bani nátabla lɛla lɛdi muedi békpi,
anwuɔsu na Unwoti ɔ́ni ɔma ɔmmɔ kɔtu lɛni.
14Sɔsɔ geen na ɔdi ka bekyuli ubugya ɔ́ƒɔ
kenye bediene bammɔ ku bakpane bammɔ enu.
Na ukyuli biala ɔsɔ ulayɔ ka
ɔni ude-ma
uwi ɔni na bakɛ beesié taasɔ na lɛblɔnu ƒui lɛlɔ.
15Mmomu bekyuli ƒui baava taabɔku-ma banini,
“Bɛgyu-bu lɛlɔ mɛni biteesie, na bitetuku-bu!
Ɔsika biisé lɛlɔ, na bítamanku ka amii lɛnɔ
bɛbla Katɔti bekyuli akɔ badi.”
Ɔmmɔ ɔsu ɔlɛka batɔlɔ mmɔ na beténwini baƒɔ na kalɔ bamba.
Nsu mmɔ lɛnɔ ni, kalɔ kammɔ bekyuli básu-ma banini,
“Bilakana bula kalɔ mɛni lɛnɔ bulie!”
16Unwoti ɔlati nábɔku úgyingya-ma lɛni,
na ɔ́da-ma údie nwuna kasusu.
Na ukyuli ɔdi ɔsɔ uleboku lili kalɔ ulete-ma
na babla bakpane ku kenye bediene bammɔ
lɛƒɔndia lɛdi.
17Anumi kani mɔɔkpulu-bu ka bɔ́ɔnu ulu bɔ́nɔ
ka nka kadi kadi kebebunku-bu
na bekpo bula bekisine ku-bu, nsu bétebo.
18Bekisine báka-bu bákya na lɛblɔnu linengudi ƒui lɛlɔ,
na bɔsɔ buuubo kasiakɔ.
Bula uwi údu ka bɔyii udu.
19Bátu bási bébo-bu lɛlɔ ku usi
ɔni ntulo
kalɛ na kɔdigbo aasɛ ɔɔyu teebo kalɔ.
Na bábwi-bu bási abi lɛlɔ,
na bákywɛ-bu kɔkpagyuɛ bése
ka beƒie-bu na kalɔ kakwiidi kemmo.
20Ɔtɔnkune ɔni na Unwoti ɔ́ƒuna úte-bu
kani nsɔ ndi-bu lɛnunsia
ka anwu ndubɔƒɔ ute-bu na bɔkɛ keliekɔ kadi
na kadi bamba bekyuli bammɔ akɔ,
nsu anwu muedi bana kɔkpagyuɛ kɔmmɔ kɔdi
kani nédie anwu lɛnɔ.
21Amii Edomƒuɔ, bɛkana na bɛdi limeyi
na bɛkɛ ebiti ɔƒɛni amu ƒaa.
Nsu amii lɛnɔ bɛdubo bibebo abi
na bɛkɛ bitaagbanta taavi ku kasɔngya.
22Sion kadi bekyuli báaƒɔ bana ekpidi ani na bábla kayu,
na badubo bɔsɔ bunwini buteesie bana ɔma.
Nsu amii Edomƒuɔ ni, Unwoti ɔdubo-mii kɔtu bɔni
na udie bina alaekpidi keyi.
Currently Selected:
Kɔnyana Buwulo 4: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
