Kɔnyana Buwulo 2
2
Unwoti Únwini Aani Ukisine
1Unwoti úti kɔnyi!
Anwuɔsu na ɔ́kya Sion kɔƒa.
Na nwuna kɔnyi kemmo ni,
úbo Sion ɔni ndi Israel bukeye ɔ́va kalɔ.
Na ɔ́sɔ úteti mmɔ ka ɔdi nwuna lɛgba kanyakɔ.
2Unwoti útanu Israel lɛma lɛmmɔ kɔnyana munu munu,
mmomu ɔ́bwɛ-ni na ɔ́yila
kɔgyumanakɔ kpakplaa kɔmmɔ ƒui udu.
Na úboku bagadine ku lɛgakadikɔ
kɔmmɔ ƒui kalɔ ɔkɛnku nwuna kɔnyi ɔsu.
3Unwoti úti kɔnyi kpakplaa geen ɔ́kya Israel
na ɔ́yila nwuna ɔyikun
na bekisine bammɔ bésusu-nwu
na ɔ́sɔ útekpo útete-nwu
Mmomu únwini aani ogya ɔni muubile ala,
na ɔ́kyula Israel kaba kemmo bebi bammɔ ƒui.
4Úbo nwuna kɔtaminta atula ɔ́lɛ-nwu
aani ukisine kalɛ.
Na ɔ́du nwuna bayɔne,
na ɔ́kyula kɔduli kɔni ƒui nkya Sion Kɔbi lɛlɔ.
5Unwoti ɔ́bla lɛlɔ aani ukisine,
na ɔ́da Israel úwi aani ɔma
ɔni nábwɛ,
na nwuna baga lɛgbanya
ku ɔma kɔgyumanakɔ kpakplaa ƒui kɔ́bwɛ.
Na ukyuli biala uuwulo keku
na Yuda kalɔ ƒui lɛlɔ ku kɔnyana.
6Ɔ́ya na bábwɛ Katɔti kakpakɔ kammɔ béwi kalɔ
aani kalɛ na kevoma kemo ɔban ɔɔbwɛ teewi kalɔ.
Na úbile lɛla biala na kesii
kani na uubo taabasiaku-bu mmɔ.
Na ɔ́ya na bɔ́da emeyi buni
ku Lɛnwunameyi bɔdi bɔ́ya na Sion ɔma kemmo.
Ɔkɛnku nwuna kɔnyi kpakplaa kɔmmɔ ɔsu ni,
úni bula baga ku bakpane ƒui.
7Unwoti údie nwuna lɛkpabi
ku kakpakɔ kammɔ ƒui atu,
na ɔ́ya na Sion bekisine bábaƒɛ
awodu ku libili lɛmmɔ ƒui.
Lɛsɛ ku kɔvanu kɔku kani na eenú yoo
taasiku kakpakɔ kammɔ kemmo
aani si limeyi lɛdi na baadi.
8Unwoti ɔ́lɛ ugyii
ka ɔƒɛ Sion awodu uwi kalɔ kpɛtɛ kpɛtɛ
ɔni na lɛtabi lɛdi lɛsɔ lilasia ɔkpanadi lɛlɔ,
na úubo kabuli úte kabla kammɔ kalɔ buse
ɔni na lɛla lɛdi lɛsɔ liletile kuƒi kɔmmɔ.
Na awodu ammɔ ku libili lɛmmɔ ƒui
lɛɛƒɛ teewi kalɔ ku kɔnyana
aani kalɛ na ukyuli uuwulo kɔnyana
na lɛlɔ lɛɛtɔ́-nwu.
9Sion lɛban kɔyakun ƒui kɔ́ƒɛ kúbi anumi kalɔ,
na abuala ani mɔɔbala kɔyakun kɔmmɔ
kenye ƒui kɔ́ƒɛ eku eku.
Na nwuna baga ku bagadine bammɔ ƒui
bénwini bekyuli beƒiedi na bakya kɔlɔ bamba kemmo.
Nwuna bakpane basɔ
balátina ala,
na nwuna kenye bediene bammɔ lɛnɔ
basɔ balakɛ linyesia lɛdi taasiku Unwoti kudɔ.
10Sion batɔnkune ƒui bába
lɛsɛ kpoo,
na beli kalɔ kplu beebó ɔtumu teewi lɛlɔ,
na benyimi adikpi.
Na nwuna begblebi basɔ beeebo lɛla lɛdi,
na babla utulo ka benye bataanu kalɔ kpoo.
11Mina anumi asɔ alanu
na keku ɔsu,
na mina kaƒɔ kébo-mi likpo
na ɔ́ya na mina lɛlɔ ekpo ƒui aadu-mi.
Ɔdu ɔ́ƒɔ-mi lɛlɔ kemmo ƒui,
ɔsika mina bekyuli báyii udu
na bebi ku bebiwɔ
báƒɔ lɛlɔ bewi ɔma unengudi ɔmmɔ lɛblɔnu ƒui lɛlɔ
beekpi ku kɔnyana ɔni na
lɛblala liiibo.
12Bebi beewulo kɔka
teeye bana beni adila,
na ɔmmɔ kama na bayuɛ aani bekpone
bani na báƒɔ ɔlɛ batɛ
lɛblɔnu lɛlɔ,
na baayula na bana beni
enu kemmo.
13Sion, dɛ na ndubɔkana-a
kɔnu bɔsia
na ƒula lɛbibo bonwu lɛmɛni kemmo?
O Yerusalem, ɔma unengudi ɔbuni,
bi na ndubɔkana na lɛsu lɛsiku-ɔ lɛlɔ?
Na dɛ na ndubɔkana-a budie bɔlɛku
kesii kani gbion aani ɛpu mɛni kemmo?
14Ƒula kenye bediene bátɔlɔ-ɔ
ku ɔkɔ kɔyu kemmo ala bɔnu
ku linyesia lɛni naaadi
litemi geen.
Bétedie ƒula bɔƒiɔ bátatina-a,
na enwini ƒula ekpidi kama na akɛ bɔƒɔ.
Mmomu bányi ɔkɔ
na bátɔlɔ-ɔ bátáyila.
15Belusiene bani mɔɔsia
mmɔ taavi
baakunku eli na bapii,
na beedumi-ɔ taama-a banini,
“Ɔma ɔbuni ɔni na bátaalɔ banii bɔdia ku bɔdia
na adi kadi ƒui lɛlɔyɔ na ɔdi mɛni ɔƒɛni?”
16Sion, ƒula bekisine beedumi-ɔ taama banii
“Útakɛ-ɔ kaduɛ, lɛni geen na bɔɔwia ɔ́si kukuuku
ka bubile-ɔ na bɔyila-a udu.
Na ɔmwi limeyi lɛmɛni na bɔ́kɛ-ɔ sɔsɔ.”
17Lɛla lɛni na Unwoti ɔ́su úse kuuku ka wabla ni,
ɔ́bla-ni lɛni kani,
na ɔ́yila-a udu
ɔni na útanu-ɔ kanyana,
na ɔ́ya na ƒula bekisine baakun lɛmɛnɛ
ka bana ɔyikun udu ɔdi ɔsɔ uuubo.
18Sion, wulo keku momoomo na ákpali Unwoti.
Biwulo imii usien ku ɔƒɛ
na bɔgba bɔvia bina awodu muedi.
Na enu ataƒɛ-mii na bitada buwulo lɛnɔ bitaya.
19Bɛta bilie usien umodi, na biteevele Unwoti
bɛnii ubunku-mii.
Na bidie bina ala ani muukpóku-mii ƒui bɛva-nwu anumi
aani kalɛ na beewilimi ntu teedie lɛbo kemmo.
Bivele-nwu na udie bina bekyuli
bani nwi lɛblɔnu ƒui lɛlɔ na kɔka kɔɔdú-ma
na baayɔ́ bekpi.
Yerusalem Údie Lɛlɔ Kenye
20Unwoti! Awɔ ɔlati,
bu ɔmɛni nu anii
áabla bekyuli badi ulikplu ɔmɛni udu dii!
Na ɔdia ka bebi beni beƒie
ama alati bebi bataakun?
Munuu bɔdia na ɔdia ka badu ƒula bakpane
ku kenye bediene na ƒula kakpakɔ ɔtɔ kemmo?
21Benengu ku banamu ƒui békpi bewi lɛblɔnu lɛlɔ
ɔni na badi mina bekyuli.
Na ɔkɛnku ƒula kɔnyi ɔsu ni,
bekisine bébeyi mina bakloƒu
ku begblebi ƒui bádu kalala kemmo.
22Unwoti kɔnyi kɔni na ákɛ ɔ́kya-bu
ɔ́ya na ásɔku mina bekisine mmomu éboku ƒula kadikɔ
aani ƒula bekyuli babune kalɛ.
Na bekisine bamɛni bádu mina bebi benengudi ku bebliidi ƒui,
na bana ɔdi útebu limeyi lɛmmɔ lɛlɔ.
Currently Selected:
Kɔnyana Buwulo 2: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
