Yeremia 1
1
1Hilkia ubidi Yeremia ɔni ndi Katɔti bakpane akɔ unwi na ɔ́si Anatos ɔma kemmo na Benyamin kalɛkɛ lɛlɔ etemila na adi mɛni. 2Na ɔ́ƒɔ Unwoti linyesia lɛmɛni uwi ɔni na Amon ubidi Yosaia ɔɔdi lɛga na Yuda kalɔ lɛlɔ lɛkwa leevu-lɛtɛdi kemmo. 3Na linyesia lɛmɛni lɛdanku lɛla lɛni útálɛku uwi ɔni na Yosaia ubidi ɔnanabi Yehoiakim lɛnɔ úbo ɔɔdi lɛga laa útálɛ Sedekaia ɔni ndi Yuda Ɔga Yosaia ubidi ɔnanabi lɛga bɔdi uwi lɛkwa leevu-linwidi kemmo. Uwi ɔmmɔ na békpo bádi Yerusalemƒuɔ lɛlɔ na béƒie-ma bátɔlɔku na lɛkwa lɛmmɔ kɔbuli kɔlɔndi kemmo.
Unwoti Ɔ́ƒuna Yeremia
4Uwi ɔmmɔ ni, Unwoti ɔ́su-mi ɔnini,
5“Yeremia, asa na ndubɔvɔ-ɔ
lɛkya kaƒɔ kemmo
na bawɔ-ɔ ni,
lɛ́ƒuna-a líse ka ebo ebenwini kenye udiene
ete kadi bekyuli ƒui.”
6Mmɔ na lídie kenye nnini, “Unwoti Ɔyikune Ƒui, lɛɛɛgyi bɔtɛmi na ńtabi lɛlɔ lɛnɔ.”
7Amu na Unwoti ɔ́su-mi ɔnini, “Tasu anini, ‘Ńtabi lɛlɔ.’ Mmomu si lɛ́tala-a nnii tásu ukyuli ɔdi lɛla lɛdi ni, sie! Na asu-nwu lɛla lɛni na líbo-ɔ ɔda mmɔ. 8Tayia-ma, ɔsika ndubulieku-ɔ na lɛgyumana-a kpakplaa.”
9Amu na Unwoti údie nwuna kɔnu na útuku-mi kenye na ɔ́su ɔnini, “Líti etemila ani na adubo bɔsu mɔɔkya-a kenye. 10Nu, líti ɔyikun muute-ɔ ɔmwi na kadi bekyuli ku lɛgakɔdikɔ ƒui lɛlɔ. Na ekpeli-ma ebo na ebile-ma ɔyikun. Na ayila-ma udu na adi-ma lɛlɔ. Na asɔku kɔbamba atu enyene.”
11Ɔmmɔ kama ni, Unwoti údie lɛla lɛdi ɔ́tina-mi na úye-mi ɔnini, “Yeremia, bi na aanu?”
Amu na lidie kenye nnini, “Mɔɔnu kɔdingyii kagba kadi.”
12Mmɔ na Unwoti ɔnini, “Ásu na ɔ́tɛ, na lɛni na nnye mɔɔsia mina litemi anu kpakplaa ka lɛya na libo-nwu kemmo kalɛ na lɛ́su.”
13Ɔmmɔ kama ni, Unwoti ɔ́sɔ údie lɛla bamba lɛdi ɔ́tina-mi na úye-mi ɔnini, “Bi na aanu?”
Amu na lídie kenye nnini, “Mɔɔnu libui lɛdi ku ntu bɔni muuƒuƒuo na katɔ kakɛ na bɔɔyɔ́ buwiakun bubo-bu kudɔ.”
14Amu na Unwoti ɔ́su-mi ɔnini, “Ndubo bɔya na ɔgbankpi ɔsi kɔlɔ kɔni na katɔ kakɛ ubo bekyuli bani nli kalɔ kamɛni ƒui lɛlɔ. 15Na badubo bebese bana agaboku na Yerusalem ɔban kenye na benye bamana awodu ammɔ ƒui ku Yuda lɛma linengudi bamba lɛnɔ ƒui. 16Na ndubo mina bekyuli ƒui litemi bɔtɛku na lɛdu-ma kɔtɔ, ɔsika béni-mi na bénwini kama bákya-mi na baakyula oloƒui teete baƒiɔ bamba.
17“Yeremia, klibi lɛlɔ se! Sie na atásu bekyuli bammɔ lɛla lɛni na líti mɔɔkya-a kɔnu mɛni. Taya na bana lɛlɔ lɛbla-a liƒu si ɔɔɔdi lɛni ni, ndubɔya na liƒu ala adi abla-a na lɛya na ama benye bataanu-ɔ. 18Ɔmwi ni, lɛ́gyi ɔban lɛ́kya-a aani ɔma unengudi kagyumanakɔ kpakplaa. Na lɛ́bla-a aani lɛbuala lɛkpa ku abuala egyiedi kowodu kalɛ na enye asiaku Yudaƒuɔ ku bana baga ku batɔnkune ku bakpane ku bekyuli bammɔ ƒui. 19Badubo bunwini bunye banii beekpóku-ɔ, nsu balakana-a lɛlɔ bɔdi. Ɔsika ami Unwoti muusé-ɔ kenye ka lɛɛɛdubo bɔya na babla-a likpidi lɛdi.”
Currently Selected:
Yeremia 1: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
