Yeremia 2
2
Israelƒuɔ Bálɛ Unwoti Kama
1Unwoti ɔ́su-mi ɔnii 2nsie Yerusalem na ntákɔ lɛsa nte ukyuli biala na mmɔ ka anwu Unwoti násu ɔnini,
“Uwi ɔni na adi uleku ɔni na líti ɔwɔdi ni,
áyɔ-mi na ásiaku-mi kama siin,
na bɔkɛ kalɔ kakwiidi kani naaadia edula mmɔ kemmo
ɔni na átalɛ-mi kama.
3Israel, ami lɛti pɛ ɔdi na ádi
aani mina edula edeedi ani na lɛ́ƒɛ lɛ́siku mina kemo.
Na ukyuli biala ɔni nákali ɔnii ɔɔƒɛ-ɔ ɔdi ni,
ɔgbankpi ɔ́siaku-nwu.
4“Yakob ɔtɔ bebi, bise atu na binu, amii Israel adua bekyuli ƒui. 5Lɛni na ami Unwoti muuye-mii nnini,
“Bi likpidi na bina bati kuuku bánu-mi lɛlɔ
ɔsu na bénwini-mi kama
na bésie basiaku ala bamba ani neeebo kɔsia ɔsu
na ama alati lɛnɔ básɔ beeebo-mi kɔsia kɔdi?
6Bátakana na beye banii, ‘Nte Unwoti
ɔni nákpanku-bu ɔ́lɛku Egyipte kalɔ lɛlɔ,
na ɔ́tɔnku-bu ɔ́siaku ketele kemmo
kalɔ kakwiidi kani kemmo na libu lɛ́ƒɔ tɛɛ mmɔ,
kalɔ kani kemmo na ntu buuubo na kese suu geen,
na ukyuli ɔdi ulásia mmɔ taavi kudii,
na ukyuli ɔdi uuulie mmɔ lɛnɔ?’
7Lɛ́kpanku-mii líboku kalɔ
kani na ala abuni áƒɔ-ka pii mɛni lɛlɔ,
kesii kani na egyiibi abuni ku ala abuni akya
na bɛkɛ bɛdi,
nsu bɛ́bla na kalɔ kammɔ keesé lɛlɔ
na bina ekpidi bɔbla ɔsu.
8Bakpane béteye banii, ‘Nte Unwoti?’
Ama bani mɔɔtina ɔda bubo ala bátanu-mi bátati.
Lɛlɔ badine aani baƒonu badane kalɛ báta bénye-mi lɛlɔ.
Kenye bediene básu ala bése na Baal baƒiɔ lɛnyi kemmo,
na bakɛ basiaku ala bamba aani neeebo kɔsia kama.
9“Anwuɔsu nsɔ ndubo-mii kɔtɔ bɔdu.
Lɛni na ami Unwoti mɔɔsu.
Na ndubɔdu bina bawɔ bawɔ lɛnɔ kɔtɔ.
10Bɛvia bisie Kitiƒuɔ ketu kɔtu na bitánu,
na bɛtala bekyuli na Kedar na bátásia anu kaduɛ,
na banu si lɛla lɛmɛni udu lɛ́ɛlɛ dii.
11Kadi bekyuli badi bávumana bana baƒiɔ dii
ina ka baƒiɔ badi beeebo ɔyikun?
Nsu mina kadi bekyuli bávumana mina bukeye ku ɔbu
béte ala keeke ani neeebo kɔsia.
12Lɛlɔ litaatɔ kayaa ala ƒui,
na liƒu bonwu litaada-mii!
Lɛni na ami Unwoti mɔɔsu.
13“Mina bekyuli, bɛ́ƒiɔ-mi na lilu inyɔ lɛlɔ.
Bíni ami ɔni ndi libiɔ lɛni mɔɔyu ntu buni,
na biidú ntu teewi abiɔ ani na bíku
na bɛ́tu bɛ́kya kalɔ kemmo na ásia kɔka
na ntu bulakana-nya kemmo buwi.
14“Israel kadi bekyuli, nka bátawɔ-mii
na bɛdi bekyuli bamba kabla bablane nɔɔ?
Bi ɔsu na bina bekisine békpo-mii
na béƒie-mii bátɔlɔku lɛni?
15Bina bekisine baakwanyi aani bagyata,
na báyila-mii udu,
na bébile-mii kalɔ,
na bákyula lɛma béwi ukpludi
na bekyuli basɔ beeebo-ni kemmo.
16Na ɔni na utulo ndi ka Memƒis ku Taƒanes lɛma bekyuli
békpeyi-mii eli útálɛ opokuo.
17Na amii alati kudɔ na ɔmɛni ƒui ɔ́si!
Anwuɔsu na ɔdi ka bɛdu lɛlɔ kɔtɔ.
Ɔsika bɛ́da ami Unwoti
ɔni ndi bina Katɔti kama bɔsiaku bɛ́ya.
18Bi na bɛ́kɛ na Egyipte
ka bɛnii nwuna Nil Ketu bɛdubo bɔni?
Munuu bi na bɛ́kɛ na Asiria ka
bɛnii nwuna Euƒrate Ketu na bɛdubo bɔni?
19Bina likyulikpi ndubo bunwini bina lɛtuni.
Na kalɛ na bɛ́ta bínye-mi lɛlɔ
na bíni-mi mɔɔdú-mii kɔtɔ.
Ɔdi likpidi ku kɔtɔ bɔdu kati kati
ka eni ami Unwoti Katɔti
ɔsika ɔɔtina ka biláyia-mi
munu munu.
Ami Unwoti kadi ƒui Katɔti násu.
20“Na kuuku uwi ɔni návi
kemmo ni,
bídie-mi atu na bíni ka lɛdi-mii lɛlɔ,
na bɛnii bɛsɔ bilabla-mi kabla.
Na ɔƒaani ni, baƒiɔ bammɔ na bɛɛkpá
na biisié lɛlɔ kudɔ ɔnana ku uleku
na egyii bonwu ammɔ ɔyuli kalɔ na abi eli.
21Na nka bɔƒuna na lɛ́ƒuna-mii lɛ́lɛ
aani kɔdingyii kɔni na naaaƒianku
nsu ɔƒɛni amu bíbulo ebi buni bɔnwu.
Israel Ekpidi Ádɔli-ma Na Aadú-ma Kɔtɔ
22“Bina ekpidi áya na bɛ́dɔli geen
na ina bi ɔkwayɛ na bíti bɛ́kpi
bikuo lɛlɔ kalɛ kalɛ muedi ni,
bɔdɔli bɔmmɔ bulálɛ-mii lɛlɔ na mina anumi.
Lɛni na ami Unwoti Katɔti mɔɔsu.
23“Dɛ na bɛdubɔkana na bɛsu bɛnini,
‘Bulese lɛlɔ na bútakpa Baal baƒiɔ lɛnɔ’?
Amii alati bɛnu ala ani na bɛ́bla na Hinom Kɔwɛ kemmo,
kalɛ na bɛkɛ biikeli teesie taasɔ
aani baƒlumu bakɔdi bani náƒɛ kɔnu.
24Bise aani bebuo ala betine beledi
bani nkɛ kalɔ kakwiidi kemmo ƒaa,
na bana enwu eti kayaa beenwenyi ɔƒɛƒɛɛ teenu,
na bani mɔɔwia-ma bakɔ belebo abi asa baanu-ma.
25Bina lɛgbanvuo lɛni bɛkya lɛ́ɛsa lɛ́wɔlɔ,
na bina ɔkwɛ kemmo kákwii
ɔni na bɛkɛ bɛɛkɔ́ taayu aƒiodu.
Lɛ́va lɛ́kpali-mii nnini,
‘Bɛsɔ binwini.’
Nsu bídie kenye bɛnini, ‘Oowo! Bɔɔyɔ́ baƒiɔ taagya.’
26“Kalɛ na kɔƒa kuukpó uyune si béƒie-nwu ni,
lɛni na kɔƒa kɔdubo Israelƒuɔ bukpo,
amii ku bina baga ku bakpane ku kenye bediene ƒui.
27Amii bani mɔɔsu egyii bɛnii, ‘Amii ndi bula bati,’
na bɛɛsu atabi bɛnii, ‘Amii náwɔ-bu.’
Ɔsika bina kama na bínwini bɛɛtina-mi
na ɔɔɔdi bina anumi.
Nsu ka ala eekpóku-mii ni, bɛ́kpali bɛnini,
‘Bo na ebebunku-bu!’
28Biteesie bitéwulo
bɛkya baƒiɔ bani na bɛ́bla bíte lɛlɔ mmɔ
si badubɔkana-mii bubunku.
Bémomo aani kalɛ kani na bina lɛma limomo.
Israel Ɔ́ta Únye Unwoti Lɛlɔ
29“Bi ɔsu na bɛɛdú-mi kɔtɔ
ka bina ƒui bɛ́ta bínye-mi lɛlɔ?
Lɛni na ami Unwoti mɔɔsu.
30Lɛ́du bina bebi líti lɛ́ni-mii kɔtu
nsu bíni na bítenwini bítebo-mii kudɔ.
Bina kuwii na amii alati bíti bɛ́du bina kenye bediene
aani bagyata bani néti kɔnyi.
31“Bise atu na binu lɛla lɛni na mɔɔsu.
Budie na lídie-mii atu na kalɔ kakwiidi kammɔ kemmo
na bɛ́sɔ bɛkya lɛdisa kemmo?
Mina bekyuli na bɛdi, nsu bɛ́kana na bɛ́su-mi bɛnini,
‘Lɛla lɛni na abu bɔɔyɔ́ na bɔdubo bɔbla,
na bɔɔɔdubo-ɔ lili kalɔ bɔkya.’
32Uleku utidi uláyiƒala nwuna asɛɛ bɔkya
si uwi ɔni na bésela-nwu kawɛɛkɔ.
Nsu amii bɛɛyiƒala-mi limeyi ndi limeyi.
33Bɛgyi ulu biala lɛlɔ na bɛkana na bɛsia na bɛkɛ bayɔne
ɔni na bɛsɔ bɛɛtina beleku bekpidi bammɔ lɛla lɛdi.
34Bɛ́du bekyuli bani nátabla-mii lɛla lɛdi kekeeke.
Na ina ka bana ubugya ɔ́ƒɔ-mii adala lɛlɔ muedi ni,
35bɛ́mu binye bɛɛsu kpakplaa ka likpidi lɛdi lɛɛɛma-mii lɛlɔ.
Na bɛɛwia ka lɛda kɔnyi buti taakya-mii lɛya.
Anwuɔsu ami ku-mii bɔdubo litemi katɛkɔ bulie
na bɔnu ukyuli ɔni ɔdi nátɛ.
36Uwi ɔni na Asiriaƒuɔ bákya-mii kakya
na bátakana-mii bubunku ni,
bíkeli bísie Egyipte.
Nsu bɛɛɛdubo kebunku kadi bɔkɛ na mmɔ lɛnɔ.
37Na bɛdubo lɛlɔ bɔƒɔ bɔkya kɔnyana bonwu kɔdi kemmo,
ɔsika lɛɛɛdubo bɔya na bɛkɛ katamikukɔ kadi na bana kudɔ
kesii kani na bina anu asia mmɔ.”
Currently Selected:
Yeremia 2: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
