Yesaia 66
66
1Unwoti ɔnini, “Katɔ na líse
mina lɛgaboku.
Na kalɔ lɛlɔ mina lɛgba lɛnya.
Na ɔtɔ ɔmani udu na bɛdubɔtu bite-mi?
Na wɛ na ndubulie lɛnwuna?
2Mina kɔnu nábla ani bɛɛnu
mɛni ƒui
na ébo éte kalɛ na ese.
Ami Unwoti násu.
“Bekyuli bani mɔɔyɔ́-mi kaƒɔ ni,
ama ndi bani muuboku
lɛlɔ kalɔ
na bana ekpidi eeduo-ma,
na lɛlɔ lɛɛtɔ́-ma ku bɔyia si bénu-mi lɛdi,
na mina lɛlɔ kani na bana
anu asia.
3Nsu ukyuli biala nádu ɔmantɛ akɔ ka ɔkpa ute-mi ni,
use aani ukyuli ɔni nádu nwuna ukyuli ɔkpana.
Na ɔdi biala nádu koƒonubi ka ɔkpa ute-mi ni,
use aani ukyuli ɔni náƒɛ akpewe limɔ.
Na ɔdi biala néti kakpa edula ebi ka ubakpa ute-mi ni,
use aani ukyuli ɔni néti ɔplakuo ubugya uboku-mi.
Na ɔdi biala makyula oloƒui mete-mi
use aani ukyuli ɔni
mɔɔkpá baƒiɔ.
Amii alati bɛ́ƒuna ala ani na bɛɛyɔ́ bíte lɛlɔ
na binye bɛɛbla ala ani muusé lɛlɔ mɛni,
ka anya mɔɔda-mii kubiti ɔsu.
4Bíni bɛnii bilákpete-mii ɔni na mɔɔkpali-mii
na bilásia mina ala ani na mɔɔtina-mi kama.
Mmomu ala ani na nkisi ni, anya na binye bɛɛbla,
nsu bɛgyi nwaa ka bɛɛƒiɔ́-mi.
Anwuɔsu lɛtuni lɛni na
bɛɛyia geen
na ndubɔya na libo-mii lɛlɔ.”
5Amii bani mɔɔyia Katɔti na bɛɛbu-nwu si ɔɔtɛmi ni,
binu-nwu litemi.
“Na bina banwa bani
muudie-mii lɛti
na beekisi-mii na mina lɛnyi ɔsu baasu banii,
‘Unwoti udie nwuna ɔyikun keyi na bɔnu!
Na udie-mii na lɛlɔ
lɛyɔ-mii bɔnu.’
Nsu bani ƒui mɔɔsu ala amɛni udu ni,
badubo bunwini ku kɔƒa kɔni naaadia bɔnu.”
6Bise atu na binu kɔku ku kudu kɔni nda
na ɔma unengudi ɔmmɔ kemmo
ku kakpakɔ kammɔ kemmo.
Unwoti ablala na adi.
Anwu mɔɔƒɔ nwuna
bekisine kayu
kani ƒui námanku-ma.
7“Bíinu dii ka nka uleku ɔwɔ
asa na kawɔƒɔ kadu-nwu?
8Ɔma na ɔnii anwu únu lɛni dii
iye ɔbla kasusu ka ɔlɛ lɛni?
Baawɔ kadi ƒui bekyuli
limeyi linwi
iye anumi bubo kunwi kemmo?
Nsu Yerusalem anwu ni,
útenu tɔ kawɔƒɔ bɔdu
asa na ɔ́wɔ nwuna bebi.
9Ami Unwoti lɛɛɛdubo bɔya na kaƒɔ kedu bɔwɔ
na balawɔ-ka.
Na neeetile kawɔƒɔ kenye si ubi údu bɔwɔ.
10Bɛkɛ lɛlɔyɔ ku Yerusalem
na ebiti ada amii bani mɔɔyɔ́-nwu.
Bibo lɛlɔyɔ kudu momoomo
amii bani néwulo-nwu kɔnyana.
11Ɔsika bɛdubo bɔdi bumo
bɔsia kama
na lɛlɔ lɛyɔ-mii aani kalɛ na
bebiwɔ baanyimi anyii ntu teemo
na bana bawɔne lɛgba lɛlɔ
na baada-ma taamana kayi
na lɛlɔ lɛɛyɔ́-ma.”
12Unwoti úse kenye úse ɔnini,
“Ndubɔya na keyi buɛɛ kaƒɔ Yerusalem
ɔma unengudi ɔmmɔ ƒui
na akɛla pii asi kadi kadi bekyuli kɔlɔ lɛlɔ ebo
na abábu na Yerusalem
aani ketu kani mɔɔgbá na kalákwii.
Na ɔdubɔbla aani ubi ɔni na
uni ɔɔgyú taada nwuna enu kemmo
na ɔɔƒianku-nwu ku ebiti.
13Ndubɔyala-a kaƒɔ, Yerusalem,
aani kalɛ na ubi uni ɔɔbla ubidi.”
14Uwi ɔni na bɛdubɔnu ka
ala amɛni aalɛ́ lɛni ni,
bina kayi kadubɔyɔ buɛɛ
na bɛlɛ lili
aani kalɛ na livo lɛɛlɛ́ lili.
Na bɛdubɔnu kalɛ na Unwoti ɔɔƒɛnimi kɔnu
taakya nwuna kabla bablane bani mɔɔbu-nwu.
Nsu nwuna bekisine bani mɔɔta teenye-nwu lɛlɔ ama ni,
nwuna kɔnyi muubo-ma lɛlɔ.
15Bɛnu! Unwoti uli nwuna kɛɛkɛ kemmo ɔdubo ku ogya
na use aani ɔƒɛƒɛɛ ɔni mɔɔkya ligede.
Ɔkɛnku kɔnyi kati kati ɔdubo
na ɔdubo bekyuli bɔbɔku ku ogya unyemi
ɔni mɔɔda gaganga.
16Ɔsika ogya ku kewii na Unwoti ɔda ɔdubo
ubatɛku bekyuli litemi
na Unwoti kewii kammɔ kadubo bekyuli pii bɔdu.
17Unwoti ɔnini, “Bekyuli banii muukisi lɛlɔ na baasiaku lɛlɔ lisu teesie alakpi akɔ taatákpa baƒiɔ na baakun baplakuo ku besi ku bayikpɛ ku ala bamba ani muusé lɛlɔ ni, bana ƒui badubɔnuku-ni na bana kɔwɔlɔkɔ kamɛni.
18“Ngyi bina ablala ku kakali ƒui. Na uwi údu ka libo na ndubɔsala kadi ƒui bekyuli ku adi lidu batɛmine ƒui na lɛya na banu kalɛ na muukeye.
19“Ndubo akɔla budie taatina ala bɔbla na lɛtina-ma mina ɔyikun ɔni na mbo na bani nébu beli na bana akɔ ni, ndubuti-ma limene Tarsis ku Pul ku Lud ku Mesek ku Tubal ku Yavan ku ntuntɛ kalɔ na ɔgyu kakaaka na lɛya na besie batákɔ lɛsa bete kadi bani bekyuli nétenu-mi tɔ kɔku kalɛ na muukeye. 20Na badubɔlɛku bina banwani bɔsiku kadi bekyuli ƒui kɔlɔ lɛlɔ beboku ami Unwoti aani akpala kalɛ na Yerusalem. Na badubulie bapɔnkɔ ku bebuo ala betine ku kɛɛkɛ lidu lidu ku bebuo ala betine ku keƒu lɛlɔ bebo. Badubo-ma bɔkpanku buboku aani kalɛ na Israelƒuɔ beeti bana kakpa edula etela taakya akyami ani na bédie bése sɛsɛɛ úte emeyi amɛni udu kemmo teeboku-mi na mina kakpakɔ. 21Na bana akɔ na ndubɔƒuna badi na benwini bakpane ku Lewiƒuɔ.
22“Kalɛ na katɔ kawɔdi ku kalɔ kawɔdi kani na ndubɔbla kadubɔkya uwi ƒui ni, lɛni kani na ndubɔya na ƒula lɛnyi ku bɔwɔ basɔ balása kudii. 23Na lɛla lɛni na ami Unwoti mɔɔyá na bɛti ni, limeyi lideedi biala na kɔbuli kemmo ku lɛnwunameyi biala lɛlɔ ni, ɔdi biala ubo na ubakya-mi lili kalɔ. 24Mina bekyuli badubusie na batánu bekyuli bani náta bénye-mi lɛlɔ kalɛ na beklubi baakun-ma ɔlɔna na beklubi bammɔ belekpi kudii. Na ogya ɔni mɔɔkyula-ma mmɔ lɛnɔ uleni kudii na lɛla lɛni na badubɔnu mmɔ ɔdi lɛla lɛni muusé lɛlɔ.”
Currently Selected:
Yesaia 66: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
