Yesaia 55
55
1“Amii bani ƒui na
utukwɛ ɔɔda ni,
bibo na bibani ntu!
Na amii bani na kɔka kɔɔda na biiibo egulabi adi ni,
bibo na bibeye bɛdi ƒaa kayu taƒɔ taƒɔ!
Bɛni ntɛ bɔbuni ku anyi ntu ƒaa
nsu bitaƒɔ kayu kadi.
2Bi ɔsu na biibile egulabi
na lɛla lɛni naaadi adila
geen lɛlɔ
na binye biitú lɛlɔ na lɛla lɛni neeemo ukyuli lɛlɔ?
Bise atu na binu-mi litemi kaduɛ,
na bɛdubɔdi emini biala
na bɛɛyɔ́,
na bɛkɛ adila abuni ƒui
bɛdi bimo.
3“Bise atu kaduɛ na bibo-mi kudɔ,
na bɛkɛ ngba bilie.
Na kenye kani na lɛ́su Dawid líse ni,
ndubuse amii lɛnɔ kenye kammɔ,
na lɛyɔ-mii uwi ƒui na bɛnu
kalɛ na mɔɔdi mina litemi lɛlɔ
uwi ndi uwi.
4Lɛ́bla-nwu na ɔdi kadi bekyuli ƒui ɔtɔnkune
na anwu nádi mina kenye udiene úte-ma.
5Na kadi bekyuli bani na nka bɛɛɛgyi-ma dii
iye ama bati-mii ni,
bɛdubɔlɔ-ma biboku bina kudɔ
na benu kalɔ na bɛnu ka bakɛ ku usi.
Na ami Unwoti bina Katɔti ndubo ɔmɛni bɔbla,
ɔsika línyene-mii kenyekɔ kenengudi na biikeye.”
6Bɛwia Unwoti ɔƒɛni, ɔsika bɛdubɔkana na bɛnu-nwu.
Na bɛkpali-nwu,
ɔsika ude-mii na ɔdubunu-mii bɔkpali.
7Bɛda bina kalala ku likyulikpi ala bɔbla bɛya,
na binwini kama bɛkya-nya
na Unwoti ɔdubuti-nya ƒui ɔkyiɛ-mii.
8Unwoti ɔlati násu ɔnini,
“Mina kasusu ku kasiakɔ ƒui kávumana ku amii bɔdi.
9Na kalɛ na kayaa kágyunku kalɔ kakaaka ni,
lɛni na mina kasusu kágyu kakaaka
kásiku bina ɔdi kudɔ.
10Ɔnantu ku etubankɛ
aana taasi kayaa taayu kalɔ.
Na ɔdi ulásɔ teenwini taakɔ katɔ
na ulete kalɔ kammɔ bɔba
na ɔya na bɛkɛ edula ebi pii
ani na bɛkya na bɛkɛ adila bɛdi bimo.
11Lɛni na mina etemila ese
na si lɛ́su lɛla lɛdi ni,
etemila ammɔ alásɔ teenwini teebo-mi kudɔ
na lɛla lɛmmɔ lilebo-nwu kemmo kalɛ na lɛ́su-ni.
12Na bɛdubɔkɛ ebiti na bɛdi limeyi
na binwini bisie ɔma ku keyi buɛɛ.
Na bina lɛlɔyɔ lɛdubɔya na ɔbla
aani abi ku abinkpo ammɔ muudie ɔnu si bɛɛví,
na ɔbla aani enukpɛ na egyii ammɔ aagyá.
13Na egyii abuni enengudi ani mɔɔdia ala buti
taabla adubɔkwɛ enye kesii
kani na nka liyu alakpi nákya mmɔ.
Na egyii ammɔ ndubunye mmɔ uwi ƒui,
na atina kalɛ na Unwoti uukeye na ubo ɔbu.”
Currently Selected:
Yesaia 55: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
