Yesaia 54
54
1“Die lɛnu ku kɔvanu momoomo,
awɔ udinkɔ, ina ka átawɔ kudii,
ɔsika uleku ɔni na ɔgyani údie-nwu atu ni,
anwu ndubo bɔwɔ butulo.
2Bɛtu bina nvo na bubomo bubu.
Na bisienku kevo akpa ammɔ kama bibu,
na bɛni kɔbuli ewele ammɔ bisienku kama
na bibo-nya bɛlɛ kalɔ kpakplaa.
3Amii ku bina bawɔ ndubɔƒɔ
kadi bamba bekyuli
bammɔ kɔlɔ,
na kunwini bina kɔdi.
Na bana lɛma lɛni nábwɛ mmɔ linwini bina kuliekɔ.
4“Bitayia, na kɔƒa lɛnɔ kutekpo-mii,
na enu lɛnɔ ataƒɛ-mii,
ɔsika lɛɛɛdubo-mii kɔƒa bɔkya.
Bɛyiƒala bina lɛnamu uwi ekpidi ani na bɛ́bla.
Na kalɛ na bɛ́ƒɔ lɛlɔ bɛkya
aani bekpinele lɛnɔ ɔsɔ
utekpo-mii kɔƒa.
5“Unwoti Ɔyikune Ƒui,
Israel Katɔti,
mɔɔdi kayawi ƒui lɛlɔ.
Anwu ndi bina Udiene
ku bina ɔgya
na ɔdubudie-mii.
6Bina ala álɛ uleku ɔkɔdi
ɔni na ɔgyani údie ɔda na úduo kɔnyana,
na uuwulo keku
ka úni-nwu ɔsu.
Nsu Unwoti bina Katɔti ɔnii
ndubɔya na bɛsɔ binwini bibo!
7Uwi klukwii ɔdi kani na lídie-mii ɔda,
nsu ndubɔsɔ lɛƒɔ-mii
na lɛkya-mii kɔgbu
ku bɔyɔ geen.
8Uwi klukwii ɔdi kani
na línwini kama lɛ́kya-mii ku kɔnyi kati kati.
Nsu ɔ́si ɔƒɛni úsela uwi ƒui ni,
ndubɔnu-mii kɔnyana!
Ami ɔni ndi bina ɔgyumanane ku Unwoti
muusé-mii kenye kamɛni.
9“Líse Noa kenye kamɛni udu
dii nnii,
nsɔ lɛɛɛdubo ntu buti bɔkyula kayawi kudii.
Na ɔƒaani ni, líse kenye ka
nsɔ lɛɛɛdubo-mii kɔnyi
buti bɔkya
na lɛni-mii kɔtu kudii.
10Abi ku abinkpo ƒui adubɔkana na ayii
nsu ami ndubo-mii kɔnya butaanu uwi ƒui
na lɛbla-mii lɛƒɔndia.
Na kenye kani na líse
ka ndubɔya na keyi buɛɛ kebo bina kalɔ lɛlɔ ni,
neeebile linyese lɛmmɔ kudii.
11“Yerusalem, mɔɔnu ka eewulo kɔnyana
na enu áƒɛ-ɔ, na ɔƒɛƒɛɛ ɔɔda-a uubó taavinku.
Nsu ami Unwoti ndubɔsɔku ɔma unengudi ɔmmɔ lɛtu
ku atabi ani na áƒɔ kuye geen.
Na sika atabi kpakplaa
ani náƒɔ kuye
na baalɔ-nya Saƒir na ndubuti lɛkya ɔma ɔmmɔ kowodu ɔka kalɔ.
12Na ɔma ɔmmɔ kɔgyumanakɔ ni,
atabi udu adi náƒɔ kuye
na égyie
na badubuti batu-ku
na sika asɛɛ ebi ani na baakya ala bɔdia
na badubuti babla kɔyakun kɔmmɔ
na beti atabi kpakplaa ani na áƒɔ kuye
batu awodu ammɔ lɛnɔ.
13Ndubɔtina bina bebi ala
na bakɔ katɔ ku keyi buɛɛ.
14Ndubɔya na bɛbla bekyuli bani nse siin,
na baabla lɛla biala taasiaku ulu lɛlɔ,
na bilie kalɔ kpi
ɔni na bɛsɔ biláyia lɛla lɛdi,
na ala ani muukpóku-mii ƒui
adubusie kama ƒui
na bina kudɔ.
15Nsɔ lɛɛɛdubo bɔya na bekyuli badi bebekpoku-mii.
Na bani mabla lɛni muedi ni,
bɛdubuƒie-ma binwini bina kabla bablane.
16“Na bitayiƒala ka ami nédie bakywɛne
bani muuti abuala taakywɛ ekpola na aƒɛ agyabi lɛlɔ.
Na bekpone bani mɔɔkana na baabwɛ lɛma
na beebile ala ni, ami nédie ama lɛnɔ.
17Ekpola ani na bákywɛɛ
ka beti bekpo-mii
aladi-mii lɛlɔ.
Na enyekpi ani na bekyuli badubɔsu
basiku-mii lɛlɔ alabla-mii
lɛla lɛdi.
Yerusalem ɔdi bina ɔdi
na ndubute-mii kusɛ kusɛ na bɛdi lɛlɔ.
Ami Unwoti násu.”
Currently Selected:
Yesaia 54: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
