Yesaia 51
51
1Si bɛɛyɔ́ ka bitaabla ala siin
na biteenu Unwoti litemi ni,
na bilie ngba na bɛlɛ lɛtakpɛ
lɛni lɛlɔ na bámami-mii básiku.
2Abraham ku Sara na Katɔti ɔ́ƒuna
ka babla bina nana ati bene.
Na Unwoti úte Abraham ɔmɛni kusɛ kusɛ
na ɔkɛnku anwu ɔnana unwi pɛ ɔmmɔ lɛlɔ
na kaba bekyuli lidu lidu báƒɔ kayawi.
3Ina ka bébile Sion
na lɛla biala lɛsɔ liiise kaduɛ
na ɔma ɔmmɔ kemmo ɔƒɛni ni,
Unwoti ɔdubɔya na kaƒɔ bɔyala ku ebiti
ebo ɔma unengudi ɔmmɔ kemmo,
na ɔsɔ ɔdia bɔnu aani Eden ɔban
ɔni na Unwoti ɔ́bla.
Na mmɔ na lɛlɔ lɛdubɔyɔ Sion na udie lɛnu
na ɔtɔ ku ebiti uti ɔgya Unwoti enu.
4Unwoti ɔnini, “Amii ndi mina kadi bekyuli,
anwuɔsu binu-mi litemi.
Na ala ani na mɔɔtina kadi ƒui bekyuli ɔdubɔya
na mina ɔda bubo buti ala bɔbla ulu siin lɛlɔ uboku-ma
na unwini bukeye ute-ma
na bana keliela kemmo.
5Uwi ɔsɔ uletu asa na ndubɔda bɔlɛ
na bɛnu kalɛ na nse siin.
Ɔsika mina bekyuli bɔƒɔ uwi údu
na ndubɔtɛku bekyuli ƒui litemi.
Kadi bekyuli bani na ketu
ɔvi ƒui
benye baanu-mi ulu ka libo mbedie-ma.
6Bɛkɔliku anumi katɔ na bɛnu kayaa,
na binwini bɛnu kalɔ lɛnɔ.
Kayaa kammɔ kadubɔyii kakya
aani kalɛ na uyɔ ɔɔyii taakya,
na kalɔ lɛnɔ kayii udu
aani kalɛ na kɔdi kɔɔtɔ
taayii udu.
Na ukyuli biala na kayawi kammɔ kemmo
ɔdubukpi aani balɔlɔ.
Nsu mina ngba bɔƒɔ bulebo kawɔlɔkɔ kudii
na mina ala bɔbla siin lɛnɔ bulayii udu.
7“Anwuɔsu amii bani ngyi lɛbuni lɛni na ɔdi ka bɛbla
na bɛda mina ɔda bubo ku kayi ƒui ni, bise atu.
Enu ataƒɛ-mii si bekyuli beedumi-mii
na baatɛmi enyekpi
na bina lɛlɔ.
8Badubo udu bɔyii aani kalɛ na
kubweyi kɔɔkun adala teebile.
Nsu mina ngba bɔƒɔ
ku ala bɔbla ulu lɛlɔ siin ute bekyuli ƒui
bulebo kawɔlɔkɔ kudii.”
9Unwoti, buvele ta!
Ta na ada alɛ ku ƒula ɔyikun
na edie kɔnu na abla ɔyikun ala
aani kalɛ kani na ábla dii na kuuku uwi
ɔni na bula bati kuuku bélie.
Bɔgyi ka awɔ nádu Rahab,
ɛpu kemmo liƒu kebweyi bonwu kammɔ
ékulo eku eku.
10Na awɔ kani náya na ɛpu ntu bɔ́kwii
na kalɔ kekpludi kálɛ
na ƒula kadi bekyuli bani
na édie
bákɛ ulu básia mmɔ bálɛ.
11Unwoti, ƒula bekyuli bani ngba na áƒɔ
badubɔsɔ benwini na besie Yerusalem
ku bumwi lɛnu si bakɛ ulu bésela.
Na ebiti adubunwini aani kagabwa
kebi-ma lili, ɔni na lɛbibo
ku bukpoku bɔdi bɔsɔ bulebo-ma lɛlɔ,
na beduo kɔnyana kemmo kudii.
12“Ami ndi Unwoti ɔni nése-mii kayi
Na bi na bekyuli keeke badi?
Bekyuli bani nse aani livo lɛni mɔɔyɛyɛ
na ɔlɛka bitaayia-ma?
13Ami nébimi kayaa lɛ́ƒala katɔ
na lɛ́kya kowodu kalɔ ɔka líte kalɔ kammɔ ƒui.
Nsu amii bɛ́yiƒala ami bina Unwoti ku Udiene,
na bekyuli bani néti kɔnyi bákya-mii
na baawia ka badumi-mii mmomu
na bilie bɛɛyia uwi ndi uwi,
nsu wɛ na bakya ɔƒɛni?
14Ukyuli biala na béƒie,
na ulie uuwulo keku na uunú ɔlɛ ɔƒaani ni,
uwi uletu ɔdubɔkɛ bɔnwuna,
na lidie-nwu na kukpi abuli
ani nda-nwu mmɔ kemmo
na ɔsɔ ulénu kɔka kɔdi lɛnɔ.
15Ndubo bana ƒui bubunku,
ɔsika ami ndi bina Unwoti Katɔti Ɔyikune Ƒui.
Na ami mɔɔyá na ɛpu uubó lɛdi ku kɔku.
16Lɛ́tina-mii lɛla lɛni na bɛsu
na nda-mii na mina lɛkɔkɔ kemmo kɔkɔɔ.
Ami nébimi kayaa lɛ́ƒala katɔ
na lɛ́kya kowodu kalɔ ɔka líte kalɔ kammɔ ƒui.
Na mɔɔsu ɔƒaani nnini,
‘Yerusalem bekyuli ni, ami ɔdi na badi.’ ”
17Yerusalem kadi bekyuli, bɛta! Bɛta binye,
ɔsika Unwoti lɛtuni lɛni na úte-mii
na bɛ́ni aani ntu na ɔɔƒɛɛ kemmo
límo-mii lɛ́vili ɔƒaamu.
Bɛ́ni lɛla biala útédu eku ekplodi
na bɛsɔ bilakana na bisie ligeen.
18Na bina bebi pii bani na
bɛ́wɔ mmɔ
ɔdi uuubo na ɔtɔnku-mii
iye udie kɔnu ɔda-mii lɛnɔ.
19Kɔka ku kekpo kɔ́du-mii ƒui.
Na nsɔ naaakana-mii kɔnu kɔdi bɔsia lɛnɔ.
20Bina Unwoti Katɔti úti kɔnyi ɔ́kya-mii,
na ɔkɛ ɔmmɔ ɔsu bina bebi ƒui
bewi lilu lɛlɔ bávi kesii biala
na kablakɔ kadi kasɔ keeebo-ma
aani akwa ɔni na kakpagyuɛ kéƒie
na ɔsɔ ulakana lɛlɔ bunene na abuli ammɔ kemmo.
21Bɛkya ɔgbankpi kemmo na ɔgbankpi ɔmmɔ ɔɔda-mii
nsu ɔɔɔdi ntɛ na bɛ́ni, anwuɔsu bise atu na binu kaduɛ.
22Bina Unwoti Katɔti ɔni muubunku-mii
na ɔɔgyumana-mii ɔnini,
“Lɛ́ƒɔ mina kɔnyi kɔni nse aani ntɛ ɔɔƒɛɛ
ɔni kemmo na bɛ́ni lɛbibo bíkpi aani ntɛ mmɔ.
Na basɔ belenye-mii lɛlɔ banii
bɛni lɛbibo lɛmmɔ udu lɛnɔ.
23Mmomu ɔdubunwini usie bina bekisine
bani nésusu-mii bákya bana lɛgba kalɔ aani ɔtumu kudɔ.”
Currently Selected:
Yesaia 51: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
