Yesaia 50
50
1Ɔmmɔ kama ni, Unwoti úye nwuna kadi bekyuli ɔnini,
“Bi mɔɔtina ka lɛ́nyonu-mii
aani kalɛ na ɔnana ɔɔnyonu ulekudi?
Munuu bɛɛkali ka buti na líti-mii líye
aani kalɛ beeti bebi teeye banii beténwini
ukyuli ɔdi kabla bablane na kayu kadi kenye?
Oowo, mmomu bina likyulikpi
ku alaekpidi ɔsu na béƒie-mii
bátɔlɔku bésienku kaƒɔ.
2Líbo ḿbawia-mii na ńtanu ɔdi,
na lɛ́kpali-mii, nsu ńtenu bina ɔdi kɔku lɛnɔ.
Bɛɛbu bɛnii mina ɔyikun ɔni na liti lɛƒɔ-mii ɔ́sa
iye ɔ́yii udu na naaakana na maƒɔ-mii ngba?
Ami muudie lɛdi na ɛpu ku ntukpa ƒui
bɔɔkwii teenwini kalɔ kakwiidi
na kɔkpaku kuukpi na kuubun teenwenyi
ka básɔ bátakɛ ntu ɔsu.
3Ami mɔɔyá na kayaa kaabla suu
aani kalɛ na ukyuli ɔɔda kekwa uwi
kɔnyana adala si uuwulo kɔnyana.”
4Unwoti Ɔyikune Ƒui ɔ́tina-mi
lɛla lɛni na libimi kenye lɛsu na lɛkya ukyuli
ɔni na lɛlɔ lɛ́bla-nwu kpɛtɛ kpɛtɛ ogya.
Ɔɔgyila-mi ɔtanta biala na ɔɔlɛmi-mi atu
na muunú ala ani na ɔɔtina-mi.
5Ɔ́ya na muusé atu teenu-nwu litemi
na naaabla atu ɔkplu
iye linwini kama lɛkya-nwu.
6Mɔɔda mina kama teese na beebó kugyiimi
na baagyɔ-mi keduo linwini.
Na ina ka bédumi-mi
na bétuo lisuo béwi-mi anumi muedi ni,
ńtedeyi ńtesie kɔmadɔ kesii bamba kadi.
7Nsu ɔmɛni ƒui ni, Unwoti ɔɔɔdubo bɔya
na mina anumi ewi kalɔ,
anwuɔsu na ami lɛnɔ nnii lɛɛɛdubo lɛlɔ atu budie,
ɔsika ngyi nnii Unwoti ɔɔɔdubo-mi
bɔnyonu bɔkya-ma enu kemmo
na kɔƒa kukpo-mi.
8Mina ɔgyumanane unye-mi
kudɔ mɛni,
anwuɔsu ɔdi ɔɔɔdubo-mi
kudɔ bubo
bubadu-mi likpidi lɛdi kɔtɔ.
9Unwoti ɔdubo-mi bubunku
na udie ɔtina ka lɛla lɛdi lɛɛɛda-mi.
Na bani ƒui mɔɔdá-mi kenye badubo udu bɔyii
aani kalɛ na kubweyi kɔɔkun adi teebile.
10Bina ɔdi biala ulábu Unwoti litemi,
na bilenu nwuna kabla ɔblane litemi lɛnɔ.
Na lɛdisa akɔ ala bɔbla na bɛɛyɔ́
teetulo ka bɛvi na bukeye kemmo.
Na bítaƒɔ Unwoti bina Katɔti litemi lɛnɔ bítadi.
11Ukpo ɔni na amii alati bɛ́tu
bɛda ni,
bɛda-nwu na uteekeye teete-mii,
na bitaanu teesie.
Nsu bɛti nwaa ka Unwoti ɔlati
ndubo nwuna kɔnu budie
bɔni-mii kɔtu
na bibo abi geen.
Currently Selected:
Yesaia 50: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
