Yesaia 52
52
1Yerusalem, ta nye!
Sion ɔma kedee, nye lɛgba lɛlɔ kpakplaa
na ada lɛlɔ ku ƒula adala abuni ƒui.
Ɔsika baƒɔ bani nébo bébebile ɔma kedee ɔmmɔ kemmo
basɔ baaadubo keliekɔ kadi bɔkɛ na ƒula kemmo
ɔƒɛni amu.
2Sion, ta na ɔtumu akɔ kesii kani na elie!
Na ada ukyuli kalɔ bɔkya kabuli
kani nda-a ɔkwɛ mmɔ edie.
3Unwoti ɔnini,
“Béye mina bekyuli, nsu ɔɔɔdi egulabi kenye.
4Kuuku ni, bísie bítélie Egyipte kalɔ lɛlɔ aani baƒɔ.
Mmɔ na Asiriaƒuɔ bábla-mii kalala ku ulikplu ala.
5“Na kadi bamba béƒie-mii bátɔlɔku
ɔni na nka bítabla lɛla lɛdi.
Bina batɔnkune bédumo geen na ɔlɛ bunu ɔsu.
Na limeyi ndi limeyi ni,
baakpali-mi lɛnyi teewida.
6Mina kadi bekyuli, bɛdubo-mi bɔnu bɔti
ukyuli ɔni udu na ndi
ku ami ɔni mɔɔtɛmiku-mii
ɔni na nkya-mii akɔ mɛni.”
7Bi mɔɔdia bɔnu lɛni!
Bɛnu abi lɛlɔ na binu bekyuli bani ndubo
babakɔ litemi buni lɛmmɔ lɛsa
kalɛ na bana bubo kɔku kɔɔda kubiti.
Baakɔ́ keyi buɛɛ ku ngba bɔƒɔ lɛsa banini,
“O Sion, ɔƒɛni amu ƒula Katɔti ndi bina ɔga.”
8Bise atu na binu ka bina bagyumanane
beedie ebiti lɛnu ku lɛlɔyɔ.
Na badubɔnu ku bana anumi
uwi ɔni na Unwoti únwini ɔdubo Sion.
9Yerusalem, awɔ ɔni na bábwɛ béwi kalɔ,
ta na awɔ lɛnɔ atu kɔgya
ku ebiti,
ɔsika Unwoti ɔ́yala nwuna bekyuli kaƒɔ
na úbo ɔnii ubedie Yerusalem.
10Unwoti údie nwuna ɔyikun bonwu keyi
ɔ́tina kadi bekyuli ƒui.
Na ɔƒaani ni, ukyuli biala ɔdubɔnu ɔti
bula Unwoti Katɔti ɔni mɔɔƒɔ́ ukyuli ngba.
11Bɛda Babel ɔma unengudi
ɔmmɔ biwi
na bɛlɛ-nwu kemmo!
Na bitetuku lɛla lɛni muusé
lɛlɔ lɛdi.
Na bɛƒɔ bina adala ƒui
amii bani nti Unwoti lɛlɔ ala ani nse kedee.
12Bitasu bɛnii biikeli,
ɔsika ukyuli ɔdi ɔɔɔdubo-mii kama bɔsia.
Israel Unwoti Katɔti ɔlati ɔdubo-mii bɔtɔnku
na ɔgyumana-mii anumi ku kama ƒui
ɔsiku bina bekisine bukpoku biala kudɔ.
13Unwoti ɔ́su ɔnini,
“Mina kabla ɔblane ɔdubo lɛlɔ bɔdi!
Na bekyuli badubo-nwu bumwi
ku ɔbu unengudi ƒui.
14Liƒu bonwu lɛ́da bekyuli pii
na lɛla lɛni nálɛku-nwu ɔsu.
Na bani ƒui nánu-nwu ni,
liƒu lɛ́da-ma lítulo,
ɔsika úbo abi
na nwuna bɔnu bɔsɔ bulátina
aani si ukyuli na ɔsɔ ɔdi muedi.
15Mina kabla ɔblane ɔmɛni ndubɔya
na kadi bekyuli bamanku kalɛ na bakpa-mi.
Na ɔdubɔbla baga kalɛ kadi na babla kpoo,
na beboku eli kalɔ. Na lɛla lɛni na bétenu
iye banu kudii ni, badubɔbla kasusu
basiku-nya lɛlɔ na ɔbla-ma nwaa.”
Currently Selected:
Yesaia 52: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
