Yesaia 44
44
1“Israelƒuɔ, binu,
ami náƒuna-mii aani
mina kabla bablane.
2Ami ndi bina Udiene.
Na ami návɔ-mii na kaƒɔ kemmo
na ami kani ndubo-mii
lɛlɔ bɔnu.
Liƒu litada-mii,
mina kabla bablane baƒunadi na bɛdi
na mina kayi kasia-mii
lɛlɔ geen.
3Ndubɔya na ɔnantu ɔna uwi kalɔ kani mɔɔwia ntu
na ntukpa bɔlɛ kalɔ kakwiidi kammɔ kemmo.
Na ndubuti mina Kɔyu lite
bina bawɔ
na mina kusɛ kusɛ ɔsiaku bina kaba kemmo bebi.
4Na badubɔlɛ lili aani livo ku ketudɔ egyii
ani mɔɔlɛ́ lili gyɛnglɛɛ.
5Na badubɔkun lɛmɛnɛ na
ɔdi ɔsu ɔnii,
‘Unwoti ɔdi na ndi.’
Na ɔbambadi ɔsu ka
‘Yakob kaba ubi na ndi.’
Na ɔbambadi unweni ɔsia
nwuna kɔnu lɛlɔ ɔnii,
‘Unwoti mbo-mi.’
Na bana ƒui badubɔsu ka
Israelƒuɔ na badi na Unwoti mbo-ma na ɔɔɔdi baƒiɔ.
6“Ami ndi Unwoti Ɔyikune Ƒui, udeedi ku ukplodi,
Israel Katɔti unwi ɔni
kani nkya,
na ndi bina Ɔga ɔni
náƒɔ-mii ngba.
7Ɔma na ɔnii anwu use aani
mina kalɛ?
Ukyuli ɔmmɔ ɔlɛ ubo
na ubedie lɛlɔ kenye.
Ɔda ɔlɛ-mi anumi na ɔsu ala ani ƒui na lɛ́su líse
ɔ́si mina kuuku uwi
bekyuli lɛlɔ
ku ani nsɔ masia ɔmmɔ kama,
na ubimi ana ƒui kemmo
na bunu.
8Lɛ́ɛsu-mii ɔ́si kukuuku nnii,
bɛsɔ bitayia na bitaatɔ
kpakpaakpa ku liƒu munu munu na bítenu?
Ami lɛti kani ndi Katɔti
na ɔdi ɔsɔ ɔɔɔdi katamikukɔ kpakplaa
aani lɛtakpɛ bonwu mina kalɛ.”
9Bekyuli bani ƒui mɔɔnwí ala
na baavɔ́ ala teete lɛlɔ
aani baƒiɔ,
baaadi bekyuli badi ama alati,
na ala ani na bánwi mmɔ
na béti anu básia-nya lɛlɔ lɛnɔ aaadi lɛla lɛdi.
Baƒiɔ bakpane ƒui badi banumbwɛne
bani naaagyi lɛla lɛdi.
Na bana lɛla tati bɔmmɔ
ndubo bɔya na anumi ewi-ma kalɔ geen.
10Dɛ na baanwí lɛla iye baavɔ́ lɛla
teese lɛlɔ anii ataakpa
nsu kɔsia kuuubo-nwu kemmo
ka ulakana lɛla lɛdi bɔbla ɔsu?
11Bekyuli bani mɔɔnwí baƒiɔ bamɛni
ku bani mɔɔkpá-ma badi bekyuli keeke
bani na bana kawɔlɔkɔ kadubɔbla kɔnyana geen.
Nnye ngya-ma na litemi katɛkɔ
na badubo babasiaku-mi na ulése-ma buɛɛ.
12Ala ɔkywɛne ni, ogya liwulu
ku lɛbuala lɛni na uuti
teebo ala
na uuti taakywɛ baƒiɔ bamɛni.
Ɔyikun ɔni nkya-nwu kɔnu
na uuti teetu lɛbuala bamba
na ɔɔkywɛɛ baƒiɔ bammɔ udu ɔni na ɔɔyɔ́.
Nsu si kɔka ku utukwɛ use kalɔ ɔɔda-nwu ni,
ɔyikun ɔmmɔ ɔɔsá na lɛlɔ lɛɛbla-nwu kpɛtɛ kpɛtɛ.
13Na ligyii ɔnwine ni, ugyii likuku na ɔɔkɔ́ku
na ɔta ukyuli ɔni udu na ɔɔwia ɔnwi ɔsia-nwu lɛlɔ.
Ɔmmɔ kama na ubeyi
ugyii ɔmmɔ
na ɔnwi ukyuli udu ɔni
na ɔɔwia
na beti-nwu batálɛ bana kakpakɔ na ɔƒiɔtɔ.
14Na lɛku kemmo egyii kpakplaa lidu kemmo
na ɔnwine ɔɔƒuna teeti taanwi ala ammɔ udu.
Na uwi pii banwine bammɔ alati
baalɛ egyii ammɔ na ɔnantu ɔna ubo-nya
asa na abi lɛlɔ na ɔdia bɔnwi.
15Egyii ammɔ kakɛ kadi na beeti taakya ogya
na eete liwulu iye baanwá adila.
Na likuku lɛkladi na ɔnwine uuti taanwi baƒiɔ
bani na ɔɔkya lili kalɔ teete ɔnii ɔɔbu.
16Kugyii kɔmmɔ kakɛ kadi nkya ogya ɔɔda,
na uute ukyuli ɔmmɔ liwulu
na lɛlɔ lɛɛbla-nwu gugungu.
Na agyabi ammɔ lɛlɔ na úƒi
lɛna ɔɔkun
na lɛɛyu-nwu emini.
17Ɔmɛni ƒui kama ni,
na ukyuli ɔmmɔ ɔlɛ akɔnkɔ ute ligyiiku lɛkladi
lɛni na ɔ́nwi ɔnii ɔɔbu
taasu ɔnini,
“Gyumana-mi! Awɔ ndi mina baƒiɔ bayikune.”
18Bekyuli bani ƒui mɔɔbu baƒiɔ ni,
anumi ábwɛ-ma na balánu
na kasusu lɛnɔ kékpi-ma
na belenu lɛla lɛdi kalɔ.
19Beeebo kasusu kani na bati beye lɛlɔ banini,
“Ligyiiku lɛmɛni kakɛ kani na líti lɛ́kya ogya
líƒulo adila ku lɛna na kakɛ kakladi
na líti lɛ́nwi lɛla lɛni
neeebo kalɔ
na lɛɛɛdi lɛla lɛdi mɛni.
Bi ɔsu na ɔlɛka ntaabu ligyiiku?”
20Bi ɔsu na ɔlɛka ukyuli ɔdɔlɔ
laa lɛni
utédu ka unye utaabu
lɛla lɛni na bakana bakyula benwini ntɔ
na ulanu taati ka ɔkɔ ala bɔbla na adi mmɔ,
na ɔmmɔ uláƒɔ-ma ngba
ka baaadi baƒiɔ bayikune ɔsu?
21O Israel kadi bekyuli,
bitaakali ala amɛni taanu,
ɔsika mina kabla bablane
na bɛdi,
na budie na lídie-mii nnii bitaabla mina kabla.
Anwuɔsu lɛɛɛdubo-mii bɔyiƒala kudii.
22Binwini bibo-mi kudɔ,
ɔsika lɛ́ƒɔ-mii ngba na lídie bina ekpidi ƒui bina lɛlɔ
aani kalɛ na liƒlukutu lɛɛyii takya kayaa.
23Bidie lɛnu ku ebiti, amii bani nkya katɔ ƒui ku bani nkya kalɔ lɛlɔ,
ɔsika Unwoti nábla ala amɛni.
Na abi ku lɛku kemmo egyii ƒui asalaku-mii
na lɛlɔyɔ lɛnu lɛmɛni kemmo.
Unwoti údie nwuna kadi bekyuli Israelƒuɔ,
na ɔ́tina kalɛ na uukeye na badubo-nwu bɔbu.
24“Israel, bɛnu bɛti ka ami ndi
Unwoti,
na mina kudɔ na ngba ƒui
bɔɔlɛ́ taasi.
“Ami náƒɔ-mii ngba,
na ami nédie lɛla biala
na lɛkya katɔ úbalɛ kalɔ
lɛlɔ ƒui.
25“Ami muubile ɔkɔ kenye bediene ala bɔsu
na mɔɔyá na bekebone baadɔlɔ
na banundane lɛlati liinwíni kɔdɔlɔ lɛla
lɛni kemmo na kasusu keeebo.
26Ndubɔya na mina kenye bediene ala ani básu banini,
‘Bekyuli badubo bumomo na baƒɔ Yerusalem ƒui
na Unwoti ɔsɔku ɔma ɔmmɔ ɔda ubo-nwu kemmo.’
27“Ami muudie lɛdi taakya ɛpu
ku ntukpa ƒui na bɔɔkwii.
28Ami násu nnii,
‘Kores ndubɔtɔnku mina bekyuli
aani baƒonu ɔdane kalɛ
na babla lɛla lɛni
mɔɔyɔ́-mi kaƒɔ.
Na badubɔsɔku Yerusalem ku kakpakɔ kammɔ batu.’ ”
Currently Selected:
Yesaia 44: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
