Yesaia 45
45
1Unwoti ɔ́su nwuna ukyuli ɔƒunadi Kores ɔnini,
“Ami nda-a kɔdianu kɔnu
kalɛ na libunku-ɔ na adi kadi bekyuli pii lɛlɔ.
Na abɔku baga pii alɛku bana lɛga kadikɔ.
Badubɔlɛmi lɛma linengudi lɛban kenye bewi-ɔ
na balakalɛ ɔdi belenyene.
2Ɔni na ntɔnku-ɔ mɛni ni,
ndubo abi ƒui bɔbwɛ
na ebo kalɔ.
Na ndubɔƒɛ abuala ani na béti bábala
abuala kɔyakun kɔlɛmikɔ
na lɛma linengudi lɛban ƒui kenye.
3Ndubuti akɛla ani nkya kabɛkɔ
ku kasuudikɔ ƒui lite-ɔ.
Na adubɔnu ati ka ami Unwoti Israel Katɔti nákpali-ɔ
na ébo-mi kudɔ ku lɛnyi lɛni na lɛ́sia-a.
4Kores, ina ka aaagyi-mi ni,
lɛ́kpali-ɔ ku lɛnyi lɛni na lɛ́sia-a
na líti ɔbu líte-ɔ geen na mina kadi bekyuli Israelƒuɔ
bani na lɛ́ƒuna na badi mina kabla bablane ɔsu.
5Ami lɛti kani ndi Unwoti!
Na ɔbambadi ɔdi ɔsɔ uuubo mina kalɛ.
Ami nábla-mii na bibo ɔyikun ina ka bɛɛɛgyi-mi.
6Na ɔƒaani ni, ukyuli biala ɔ́si ɔƒɛ katukɔ
útédu ɔƒɛ kanukɔ
ɔdubɔti ka ami ndi Unwoti ɔmmɔ
na baƒiɔ badi beeebo na badi lɛla lɛdi geen mina kalɛ.
7Ami nédie bukeye ku lɛdisa,
na ami muute kusɛ kusɛ
na ɔgbankpi lɛnɔ ɔɔsiáku ukyuli.
Ami Unwoti mɔɔbla ɔmɛni ƒui.
8“Ndubɔya na ala bɔbla siin
bɔsi katɔ
na liƒlukutu kemmo bubo aani kalɛ na ɔnantu ɔɔna.
Na ngba bɔƒɔ ku ala bɔbla siin bɔkwɛ aani livo
na bɔƒɔ kalɔ kammɔ lɛlɔ ƒui
kalɛ na ami Unwoti lídie-ka nnii use kalɛ.
9“Libui lɛvɔdi lilákyaku nwuna ɔvɔne unyeƒi.
Anwuɔsu ni, Israel, eeebo
kuƒi kɔdi
ka awɔ ku ƒula Udiene bɛkya unyeƒi ɔdi,
ɔsika lɛvɔbui kani na adi na ɔvɔne ɔ́vɔ-ɔ kalɛ na ɔɔyɔ́.
Na lɛvɔbui liléye nwuna
ɔvɔne ɔnini,
‘Bi ɔsu na ávɔ-mi lɛni iye átati-mi bɔvɔ
na átabla-mi lɛmɛni ku
lɛni ngye?’
10Bebi beeebo kuƒi ka beye bana bawɔne banini,
‘Dɛ na bɛ́bla na bɛ́wɔ-bu
na bɔdi bekyuli bani na bɔdi?’ ”
11Unwoti Israel Katɔti Kedee ɔni ndi bana Udiene ɔnini,
“Buye na ukyuli ɔdi ɔdubɔkana na use kayi
uye-mi lɛla lɛdi ɔ́siku mina kadi bekyuli lɛlɔ
iye lɛla lɛni ndubo libalɛ uwi ɔni mebo lɛlɔ?
12Ami nédie kayawi na lɛ́bla ukyuli lɛ́kya-ka kemmo.
Ami ɔlati néti mina enu na línene kayaa lɛ́ƒala katɔ
ku ala ekeyedi ani ƒui nkya kayaa mmɔ.
13Ndubɔya na Kores únwini ɔyikune
ɔni mɔɔdi lɛlɔ na ulu siin lɛlɔ.
Na ndubɔya na nwuna kasiakɔ
ƒui kabla-nwu kpɛtɛ kpɛtɛ.
Ami ndi Unwoti Ɔyikune Ƒui!
Na Kores na lɛ́ya na ɔdubɔsɔku Yerusalem
mina ɔma unengudi bɔtu
na ɔya na mina bekyuli bakɛ bɔnwuna
na belie ku atu bɔyɔ.
Nsu ɔɔɔdi lɛyuƒɔla lɛdi kenye.
Lɛla lɛni na ami Unwoti lɛ́su na lɛdi mmɔ.
14“Egyipteƒuɔ ku Kusƒuɔ ku Sebaƒuɔ
bani nákuku kangya kangya mmɔ akɛla
adubunwini amii adi.
Na badubunwini bina kabla bablane
na bibo-ma kɔgba bɛda bitaavinku
na basiaku-mii kama.
Badubɔkya lili kalɔ bete-mii
na bevele-mii basu banini,
‘Sɔsɔ na ɔdi ka Katɔti ɔsiaku-mii
na anwu lɛti lɛnɔ ndi Katɔti ɔmmɔ.’ ”
15Awɔ ɔni mɔɔƒɔ́ Israelƒuɔ ngba ni,
sɔsɔ na ɔdi ka adi Katɔti ɔni mɔɔbɛla lɛlɔ.
16Bekyuli bani ƒui mɔɔvɔ́ baƒiɔ ni,
badubo-ma kɔƒa bɔkya na anumi ewi-ma kalɔ.
17Nsu Unwoti ɔdubudie Israel na bakɛ ngba uwi ƒui
ɔni na kɔƒa kulékpo-ma iye anumi
ewi-ma kalɔ kudii.
18Unwoti lɛti kani ndi Katɔti!
Anwu nédie katɔ ku kalɔ
kesii kani na bekyuli bakana bulie,
utulo ka udie ketele kalɔ kakwiidi sɔɔn
kani kemmo na lɛla lɛdi liiibo.
Unwoti lɛti kani ndi Katɔti,
na ɔbambadi ɔdi ɔsɔ uuubo.
19Unwoti útatɛmi útasiku kasuudikɔ
iye ɔsu Yakob kaba kemmo bebi ɔnii
bawia-nwu kama ulu kekeeke.
Mmomu litemi geen na Unwoti ɔɔsu ɔnini,
20“Bɛsala-mi kudɔ amii bani nébu
na kadi biala bekyuli akɔ na kɔlɔ kɔmmɔ kemmo!
Na bɛnu bɛti kalɛ na ɔdi kɔdɔlɔ
ka binye bitaabu baƒiɔ iye ala anwidi
na bitaakpali-ma bɛnii ama mebunku-mii
aani bina Unwoti, nsu balakana-mii bɔƒɔ.
21Bɛta na bɔsa na litemi katɛkɔ,
munuu ńtasu-mii ɔ́si kukuuku lɛla lɛni ndubo libalɛ?
Ami lɛti kani ndi Katɔti ɔmmɔ!
Na ɔdi ɔsɔ uuubunku-mi.
Ami kani mɔɔƒɔ́ bekyuli ngba
na ami kani mɔɔbla ala ulu siin lɛlɔ.
22“Bɛlɔ kayawi bekyuli ƒui na bebo-mi kudɔ
na bakɛ ngba bɔƒɔ.
Ami lɛti kani ndi Katɔti!
Na badi baasɔ baaadi lɛla geen lɛdi.
23Líse kenye kpakplaa kani na kalavumana kudii,
na ukyuli biala ɔdubo lili kalɔ bɔkya bɔbu-mi.
24Na bana ƒui badubɔtuna
ka sɔsɔ na ɔdi ka ami lɛti kani mɔɔbla ala ulu siin lɛlɔ.
Na ɔdi biala na úti kɔnyi
ɔ́kya-mi ni,
kɔƒa kɔdubo-nwu bukpo geen na unwini ubo-mi kudɔ.
25Ami Unwoti ndubo bɔya
na Israelƒuɔ badi lɛlɔ na lɛya na baƒɔ lɛnyi geen.”
Currently Selected:
Yesaia 45: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
