Yesaia 29
29
Ɔgbankpi Ɔ́lɛku Dawid Ɔma Unengudi
1Bɔbuɛ beete awɔ Dawid ɔma unengudi,
kesii kani básia lɛnyi banii Ariel,
ɔsika eeti ƒula akpala teeboku
lɛkwa ndi lɛkwa taabakpa.
2Nsu ina amu ndubɔya na ɔgbankpi ɔsiaku-ɔ
na adubo keku ku kɔnyana buwulo.
Na Yerusalem ɔdubo ubese aani Ariel ɔni kalɔ ndi
lɛkpabi lɛni na ubugya ɔ́ƒɔ-ni lɛlɔ ƒui.
3Ndubɔya na baka-a bakya lɛƒɛnyi ƒui lɛlɔ
na lɛya na batu kɔgyumanakɔ
kɔni nákuku bamana-a na lɛbla kunyekɔ
kesii kani na badubunye bayila ɔma ɔmmɔ udu.
4Na kaƒiɔtɔ kani kemmo na badubo-ɔ bɔva ni,
mmɔ na adubo kabɛnsɛ butaatɛmi
taasiku aani ukpine kɔyu
na kalɔ kemmo mmɔ na ɔtumu akɔ.
5Nsu ɔƒɛƒɛɛ kpakplaa ɔdubo ƒula bekisine bubo
bɔtɔlɔku kɔnakunwi aani ɔtumu ku aƒaƒaa.
6Na Unwoti Ɔyikune Ƒui ɔdububo,
na bɛdubunu ka katɔ keedu momoomo,
na kalɔ kaakunku, na ɔƒɛƒɛɛ kpakplaa uukpó,
na ogya ɔni mɔɔkyula ala uudie unyemi.
7Na kadi balalane bani ƒui muukpó Yerusalem
na baayá na uubó abi ni, badubo bɔyii udu
aani kalɛ na baatɛ teegye kɔna
na kɔyi-ɔ si kadi kégye.
8Kɔka ku utukwɛ ɔdubo kadi bekyuli
bani ndubo bɔta bukpo Yerusalem bɔda geen.
Na badubugye kɔna na ɔbla-ma aani bɔdi na bada
nsu badubɔta na banu ka kɔna kani na bégye
na kɔka ku utukwɛ ɔmmɔ ɔdubɔkɔ katɔ ubu.
9Amii bibulo bɔƒɔdi na bibile bina anumi
na bibulo bɔnu.
Na bɛkɛ bitaagbanta ina ka ɔɔɔdi ntɛ na bɛ́ni!
Na bɛdubɔnu liƒu lɛla lɛni ndubo libalɛ-mii lɛlɔ.
10Unwoti ɔ́ya na lɛlɛɛ lɛ́ƒɔ-mii anumi susuusu
na bɛ́lɛɛ bísie ɔgyu.
Na úti ala úbi bina lili ku anumi
amii bani ndi nwuna kenye bediene
ku bekyuli bani mɔɔnu ala taasu bekyuli.
11Na kenye kani na budie taatina bɔmɛni bɔdanku ƒui bɔdi lɛbɛla lɛni na Katɔti útile-mu kenye. Na si ɔdi ɔgyi bɔka muedi ni, ɔdubɔsu ɔnini, “Bétile bunweni bɔmmɔ kenye ɔsu bulakana bɔka.” 12Na bani na baaagyi bɔka lɛnɔ badubɔsu banini, “Bɔɔɔdubo bɔkana bɔka.”
13Unwoti ɔ́su ɔnini,
“Bekyuli bamɛni bada bana kenye kani baabu-mi,
nsu balayɔ-mi na bana kayi kemmo.
Keeke kani na baabla-mi kabla.
Baatina kayawi lɛlɔ ala aani si mina ɔda bubo bɔdi.
14Anwuɔsu nsɔ ndubo-ma buyu bɔtu ku liƒu ala
ani ndubɔbla-ma kalɛ kadi.
Ndubo banundane lɛnunda udu bɔyila.
Na lídie lɛ́tina ka bakutine lɛnunda lɛɛɛdi lɛla lɛdi.”
15Bɔbuɛ beete bekyuli bani mɔɔbla ala bɔbɛ kemmo
na baakali ka Unwoti ɔɔɔgyi,
na baabla ala lɛdisa kemmo na beeye banini,
“Ɔma mɔɔnu-bu? Na ɔma ndubo bɔti?”
16Bínwini ala bɛ́lɛ kekuma,
aani si lɛvɔti náƒɔ kuye litulo ɔvɔne,
munuu lɛkyami lɛni na bávɔ mmɔ
lɛdubɔkana na lɛsu ɔvɔne ɔnii,
“Ɔɔɔdi awɔ návɔ-mi?”
17Na uwi klukwii ɔdi kama ni,
Lebanon akumiɔ ƒui adubunwini edula mmo,
na edula ammɔ adubɔlɛ enye kemo
na ana bɔdia adubɔbla aani lɛku na nnye.
18Na uwi ɔmmɔ kemmo ni,
batutine muedi badubo buteenu
ala ani na baaká teete-ma taasiku ɔku ɔdi kemmo.
Na ɔbla banumbwɛne nwaa ɔni na ɔsɔ ulése-ma suu
aani lɛdisa kemmo na bakya.
19Na bawabane ku bani mɔɔyaki ala ƒui ni,
badubɔdi limeyi ku kɔvanu na bebo kudu momoomo
na Israel Unwoti Katɔti ɔni nse kedee ɔsu.
20Na balalane ku belikplune ƒui badubo udu bɔyii.
Na bani mɔɔsa lili likpidi na lɛsɛ ala bɔbla lɛlɔ
badubo bɔyii kɔnakunwi.
21Na ɔkɔ kenye bediene bani mɔɔnyi ɔkɔ
teedie ala kenye kalɛ na badu bekyuli
bani na nka bátaƒiɔ kɔtɔ lɛ́nɔ badubo bɔyii ƒui.
22Anwuɔsu na Unwoti ɔni nédie Abraham ɔ́su Israel kadi bekyuli ɔnini,
“Liƒu lɛsɔ lɛɛɛdubo mina kadi bekyuli bɔda
na kɔƒa lɛnɔ kɔsɔ kulékpo-ma.
23Ɔsika si bánu bana bebi pii bani na bebo
ku kalɛ na líte-ma kusɛ kusɛ na bákɛ ala pii ni,
badubo ami Israel Katɔti kedee butaabu
na beteemwi-mi.
24Na ukyuli biala ɔni na ɔ́yii ulu,
ɔsu na ɔɔƒiɔ́ na kɔyu kemmo ni,
ɔdubunu ala kalɔ na ɔbla-nwu nwaa.
Na bani na mɔɔkya unyeƒi
lɛnɔ ni,
badubunu mina ala ani na mɔɔtina-ma kalɔ
na badi-mu lɛlɔ.”
Currently Selected:
Yesaia 29: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
