Yesaia 28
28
Eƒraim Lɛbibo
1Bɔbuɛ beete Eƒraim ntɛ banine
bani nti lɛlɔtina lɛka aani kagabwa,
na lɛkɛ ku ala abuni
ani na baanu ka Israel
ubo ɔsu.
Baasíku ala amɛni na ɔkwalɛ ɔni nélie lɛmwi
na kesii kani na baabla-nya mmɔ,
na baaní ntɛ bɔmmɔ teekpi.
Nsu ala ammɔ aayii udu,
aani kalɛ na egyii anwula aayɛyɛ kalɛ.
2Bɛnu, Unwoti ɔdanku ukyuli ɔni na úbomo,
na ubo ɔyikun ku ɔlɔkplu,
aani etubankɛ ku ɔnantu ku ɔƒɛƒɛɛ kpakplaa
ɔni muubile ala, na ɔdubo ubetiku-ma ku kɔnyi.
3Na lɛlɔtina lɛka kagabwa kani na beti ni,
bekyuli badubɔkɔ banya-ka lɛlɔ bavi.
4Na nwuna bɔdia bɔni muukeye
nsu uuubo bɔyɛyɛ
na ɔkwalɛ ɔni nélie lɛmwi
mmɔ ni,
útavumana ku kɔnwingyie ebi ani mɔɔka bugyie.
Na si ukyuli ɔdi ɔ́nu-nya
na ɔɔkpɔɔlɔ-nya ɔdi udie kɔnakunwi.
5Si uwi ɔni na ala amɛni álɛ lɛni áwɔlɔ ni,
Unwoti ɔni ndi kadi ƒui Unwoti
ɔdubunwini kagabwa kani muukeye
ku lɛka lɛni bédi na lɛɛdia bɔnu
na nwuna nkyuli ɛlɛɛ bani mebu lili.
6Na ɔdubunwini kɔyu kɔni mɔɔtɛ litemi siin
ute bani mɔɔtɛ bekyuli etemila.
Na anwu ɔmmɔ ndubɔbla ɔlɔkplu ku ɔyikun
ute bani nnye ɔban kenye ka babɔku kekpo biala.
7Na Katɔti bakpane ku Katɔti kenye bediene ƒui
benye baabla ntɛ ekpila na ntɛ kpakplaa bɔni ɔsu.
Na baagbánta si baanu kɔyu kemmo ala
iye baadi kasusu kpakplaa kadi na lɛla lɛdi lɛlɔ.
Na ntɛ bɔ́ya na béƒu bakɛ.
8Bana ala kasiakɔ ƒui kɔdala sɔɔn náƒɔ-ku
na kesii kadi kétebu
na kɔbɔ ala
ani muusé lɛlɔ átaƒɔ mmɔ.
9“Na ɔma bene na ɔdubo ala bɔtina?
Na ɔma bene na uudie ala kalɔ taatina?
Bani mɔɔnyimi lɛnyii
munuu bani na basia lɛgba?
10Unye ɔɔká ɔda bubo bɔmmɔ taasia kama
egyu egyu kɔlɛ kɔlɛ.”
11Na ka banii belénu litemi ɔsu ni,
kadi bamba bekyuli na Unwoti ɔdubɔya
na babatɛmi bete-ma.
12Ɔsika anwu ɔlati ɔ́su-ma ka bekyuli bani ƒui
na lɛla lɛdi liikpóku ni, bebo-nwu kudɔ
na badubɔkɛ bɔnwuna, nsu béni na belenu.
13Ɔmmɔ ɔsu béti Unwoti ɔda bubo
aani litemi keeke ku ala bɔka taasia kama
egyu egyu banii bla lɛmɛni ku lɛni ngyie kani.
14Anwuɔsu binu, amii bani mɔɔdi bekyuli lɛlɔ,
na bɛda Katɔti litemi bɛɛƒianku na Yerusalem.
15Bɛɛkun lɛmɛnɛ taasu bɛnini,
“Abu ku kukpi bínyimi ka kɔsɔ kuládu-bu,
na bɔsɔ buleduo kaƒiɔtɔ kemmo
iye si lɛbibo ku kawɔlɔkɔ lɛbibo kpakplaa lɛmmɔ lídu ni,
ɔdubɔvia-bu lili, ɔsika búti ɔkɔ bɔ́nyi búnwini
katamikukɔ na búti katuala bɔ́bla kabɛkɔ.”
16Unwoti ɔnini,
“Binu! Lɛ́ƒuna lɛtabi lɛni náƒɔ kuye na Sion,
na ɔdi lɛtabi kpakplaa
lɛni mabala kowodu likpo.
Na ukyuli biala ɔni maƒɔ madi ni,
enu alaƒɛ-nwu kudii.
17Na aani ɔtune kalɛ ni,
litemi bɔtɛ ulu lɛlɔ ndubɔdi mina kabuli
kani na ndubuti lɛkɔku kowodu kɔmmɔ bunye.
Na ugyii ɔni mɔɔtina kowodu kavikɔ ligeen
ndubɔtina kalɛ na mɔɔbla
ala siin.
Na ɔƒɛƒɛɛ ku ɔnantu ku etubankɛ na ndubɔya
na ana na agbala bina ɔkɔ ala bɔbla ƒui
bɔni ndi bina katamikukɔ ku kabɛkɔ mmɔ
na ɔyila lɛla biala.
18Na lɛla lɛni na bínyimi ku kukpi
ku kaƒiɔtɔ mmɔ ƒui ɔbla kekeeke.
Na si kawɔlɔkɔ lɛbibo kpakplaa lɛmmɔ lídu ni,
lɛdubo-mii bubo bɔva kalɔ.
19Na kɔlɛ kɔlɛ kɔni na lɛbibo lɛmɛni lɛdububo ni,
lɛni kani na lɛdubo-mii buteetiku
lɛdigye ku ɔƒiiwi ku usien lɛnɔ.”
Na si uwi ɔni na bɛdubunu kenye kamɛni kalɔ ni,
ɔdubɔya na liƒu libendi lɛda-mii geen.
20Na bina kɔtɛnkɔ kɔsɔ kuléduku-mii
na binene lɛlɔ bɛtɛ.
Na bina kɔyɔ adi asɔ alábɛbɛ
na bɛni bibi lɛlɔ.
21Ɔsika Unwoti ɔdubɔta kɔnakunwi ku kɔnyi
aani kalɛ na ɔ́bla dii na Persim Kɔbi lɛlɔ
ɔni na úsie Gibeon Kɔwɛ kemmo.
Na ɔdububo ubabla nwuna kabla,
na bɛgyi ka kaaatɛ kalɔ!
Na bɛgyi lɛnɔ ka nwuna ablala udu bamba uuubo.
22Anwuɔsu bɛda bina edumi ku lɛma bɛya
si ɔɔɔdi lɛni ni, bina lɛbuli lɛni nényimi-mii
lɛdubo bɔbi bubu,
ɔsika línu kadi ƒui Unwoti Katɔti
lɛla lɛni na únyimi úse
ɔ́si kalɛ na ɔdubɔkyula kalɔ kana ƒui lɛlɔ.
23Bise atu na binu lɛla lɛni na mɔɔsu-mii,
na bɛƒɔ mina etemila ani ndanku nte-mii.
24Edula ɔkyane ɔni nnye uugúlu kalɔ ka ɔkya edula ni,
bunye kani na uunye
teegulu kalɔ kammɔ
na ulakya edula ammɔ?
Munuu si unye ɔɔtu kalɔ kammɔ
teenwini kani na ɔ́sa?
25Si ɔ́klibi kalɔ ɔ́wɔlɔ ni,
ɔɔɔdi edula lidu lidu ku kutu akyala edula lidu
na ɔɔkya adi biala ku ana kakyakɔ?
26Unwoti nátina umonsene ulu ɔbuni
ɔni lɛlɔ na ɔkya edula.
27Na edula biala ku ulu ɔni lɛlɔ na baasia teedie-nya.
Kutu akyala ƒɛƒɛɛ ebi ni, belebo-nya
kedenkɛ lɛlɔ teedie-nya ebi.
Na kɛɛkɛ bonwu ulavi-nya lɛlɔ teewiile-nya.
Mmomu ugyii iye lɛbuala na beebó-nya
teedie ebi ammɔ.
28Bɔkɔ na baakɔ́ edula ebi ɔlaaƒɔ
taabla bodobodo
Anwuɔsu belebo-nya kedenkɛ
lɛlɔ taabwɛ na ɔbla ɔlaaƒɔ
na kewiilekɔ mmɔ.
29Ala ɔtinane unengudi geen
na Unwoti Ɔyikune Ƒui ɔdi
na úti lɛnunda bonwu úte umonsene.
Currently Selected:
Yesaia 28: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
