Yesaia 18
18
Básu Kenye Kadi Básiku Kus Lɛlɔ
1Bɔbuɛ beete kɔlɔ kɔni lɛlɔ
na baalɔlɔ bani avwi
mɔɔbla kɔku mɛni bakya,
na Kus kalɔ kemmo
ntukpa adɔ,
2ama bani nátala batu na bakɛ ɛpu lɛlɔ badubo,
na beli lɛkɔlɔ lɛni bánwi ku ketu kemmo ligyii kemmo.
Biti usi momoomo na bisie kalɔ kani bekyuli nákuku
na bana ɔlɔgyii use suɛlɛ suɛlɛ na ɔɔdia bɔnu kudɔ.
Bekyuli bebo-ma lɛlɔ liƒu úsie ɔgyu ɔ́mana
na bana kɔnyi ku kalala kani na baabla bekyuli ɔsu,
bekyuli bani na ntukpa búle-ma kalɔ kemmo ƒui bɔ́vi.
3Amii bayawine ƒui,
ku amii bani na bilie kalɔ lɛlɔ mɛni,
bɛdubo bɔnu aƒlaga ɔdi
si bákɔliku-nwu katɔ
na abi lɛlɔ,
na binu kakpɛɛ kadi kɔku si bávwi-ka.
4Lɛni na Katɔti ɔ́su-mi ɔnini,
“Ndubulie mina keliekɔ ntaanu kpoo,
aani kalɛ na ɔƒɛ ɔɔyá na kadi kaabi,
iye edula ɔƒɛwi liwulu lɛɛyá na amii aayu.”
5Ɔsika asa na badubɔƒɛ edula ammɔ,
kugyii kɔni anwula
nénwini ebi
na égyie na édu bɔƒɛ mmɔ ni,
Katɔti ɔdubuti kewii na udie kɔgba wɛlɛ wɛlɛ kɔmmɔ,
na ɔmɛnɛ kɔgba kunengudi kɔmmɔ uwi kalɔ.
6Lɛni na bekpone bammɔ ɔlɔna ɔdubuwi ɔmana
ute baasɛ bani muuƒie na abi lɛlɔ ku bakumbuo,
na baasɛ bammɔ babaduli-ma kaƒɛndi
na bakumbuo bammɔ bɔduli-ma kɔyɔ uwi ƒui.
7Na uwi ɔmmɔ kemmo ni,
bekyuli bani nákuku ku ɔlɔna suɛlɛ suɛlɛ mɛni,
na bana lɛlɔ libo liƒu úsie ɔgyu ɔ́mana mmɔ,
na bana kɔnyi ku kalala kani na baabla bekyuli ɔsu,
na ntukpa búle-ma kalɔ kemmo bɔ́vi ƒui,
badubuti etela beboku Unwoti Ɔyikune Ƒui.
Na etela ammɔ adubuse Sion Kɔbi lɛlɔ kesii kani na baakpá Unwoti Ɔyikune Ƒui.
Currently Selected:
Yesaia 18: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
