Yesaia 19

Katɔti Ɔ́su Kenye Kadi Ɔ́siku Egyipte Lɛlɔ

1Linyesia lɛmɛni lɛdanku Egyipte kalɔ lɛlɔ.

Bɛnu! Unwoti uli liƒlukutu bonwu lɛdi lɛlɔ,

na ɔkɛ ku usi momoomo úsela Egyipte kalɔ lɛlɔ,

na lɛlɔ lɛɛtɔ́ Egyipteƒuɔ baƒiɔ ku liƒu bonwu.

Na Egyipteƒuɔ bammɔ alati báyɛyɛ,

na enu áƒɛ-ma na bɔyia ɔsu.

2Ɔsika Unwoti ɔnini,

“Ndubɔtu-ma lɛkya ama alati lɛlɔ lɛlɔ,

na ama Egyipteƒuɔ lɛti lɛti bekpoku lɛlɔ.

Ɔnwa ɔnanabi ɔdubukpoku ɔnwani ɔnanabi,

na ɔkpana ukpoku ɔkpana,

na ɔma ɔta na ukpoku ɔma

na kalɛkɛ kata kekpoku kalɛkɛ.

3Na enu adubɔƒɛ Egyipteƒuɔ.

Na libile bana kɔkwɛ ƒui,

na beye kasiakɔ basiku bana baƒiɔ ku bekpine,

ku bekebone ku bevone kudɔ banɔ.

4Na ndubuti Egyipteƒuɔ lɛkya

ɔga lɛlɔ ɔdine ulikplune kalɔ,

na ɔlalane ɔdi-ma lɛlɔ.”

5Nil Ketu kadubo bɔkwii kede kede,

na ntu bɔdi bɔsɔ bulakya-ka kemmo,

na kana kavikɔ kenwini kalɔkplu.

6Ntukpa bɔni nákya kenye Nil kemmo ƒui

bɔdubo bɔda na buteenwenyi buɛ buɛ.

Na Egyipte ntukpa bɔmmɔ butaakpɛ na bɔkwii ƒui,

na ketu kemmo egyii mmɔ ƒui

ekpi ayii udu na akwii enye,

7Na mmo bɔni na bése mmɔ ƒui bɔyii udu

ku ketu kenye ku amadɔ egyii ammɔ ƒui.

8Kɔbɛ bediene badubo kɔnyana buteewulo,

na bani mɔɔtu lɛdaa ku lɛsawu bewine ƒui

badubo enu butaaƒɛ ku kɔnyana.

9Lɛbuli lidu adi bedine badubɔyila lɛnunsia,

na bani mɔɔbla adi kpɛtɛ kpɛtɛ basɔ baláti kalɛ babla.

10Kayi kadubo bedine butaakpulu

na kayu kenye kabla bablane beƒu.

11Kɔdɔlɔ kútulo amii Soan ɔma kasusu betine,

na amii bani ndi Ƒarao kelisa benengu kasusu

kasɔ kalalɛ bekyuli kɔsia kɔdi.

Dɛ na ɔdi ɔdubɔkana na ɔsu Ƒarao ɔnii,

“Ami ndi banundane bammɔ akɔ unwi

na kuuku baga bammɔ kudɔ na lɛ́tɛya ala?”

12Wɛ na bina banundane bammɔ bávi ɔƒɛni amu?

Bɛya na basu-mii na binu

kasusu kani na Unwoti ubo na Egyipte lɛlɔ.

13Soan ɔma kasusu betine bénwini badɔlɔdi.

Na Memƒis ɔma benengu béƒu ku ɔkɔ etemila,

na bekyuli bani lɛlɔ na Egyipte úkpo kama

bákpanku-ma bésela batáyila.

14Unwoti ɔ́ya na lɛlɛɛ kɔyu

kɔni mɔɔbla ukyuli gyuma gyuma

mɔɔdi Egyipteƒuɔ lɛlɔ.

Anwuɔsu na baagbánta

na bana lɛla biala na baabla kemmo,

aani kalɛ na ntɛkpine ɔɔdada

na nwuna kɔdala akɔ.

15Egyipteƒuɔ basɔ beeebo lɛla lɛdi bɔbla,

bati o-o, beni o-o, bebi o-o,

ɔdi ɔsɔ uuubo lɛla lɛdi bɔbla lɛnɔ.

16Na limeyi lɛmmɔ lɛlɔ ni, Egyipteƒuɔ badubɔta babla aani beleku, na lɛlɔ litaatɔ-ma geen ku bɔyia na Unwoti Katɔti kɔnu kɔni na ɔ́talaku katɔ ɔnii ɔɔƒiɛmi-ma ɔsu. 17Na si bénu ka ukyuli ɔdi ɔ́lɔ Israel lɛnyi muedi ni, liƒu lɛdubuƒie-ma na kayi kemmo na lɛla lɛni na Unwoti ɔ́ɔklibi lɛlɔ úse ka ɔbla Egyipteƒuɔ ɔsu.

18Ɔmmɔ kama ni, Egyipteƒuɔ lɛma linengudi ɛlɔ badubɔtɛmi Kanaan lɛdi na badubuse kenye ka béti lɛlɔ béte Unwoti Katɔti kadi ƒui Unwoti. Na lɛma lɛmmɔ akɔ unwi baalɔ banii Ɔƒɛ ɔma unengudi.

19Na batu lɛkpabi na Egyipte kalɔ kemmo ntɛntɛ, na balɛ likpose lɛkpa lɛdi na lɛkpabi lɛmmɔ kɔmadɔ na ɔmii lɛlɔ. 20Likposela lɛmɛni muudie kenye ka Unwoti Katɔti ɔdubo butaanu na Egyipte kalɔ kammɔ lɛlɔ na si báva bákpali-nwu na bekisine bukpoku ɔsu ni, na Katɔti uti ɔƒɔne ɔdi umene-ma na ubebunku-ma na bakɛ bɔƒɔ. 21Na mmɔ na Egyipteƒuɔ badubɔnu bɔti ukyuli ɔni na Unwoti ɔdi na bataakpa-nwu na bataakyula akpala ku etela bamba lɛnɔ teete-nwu. Badubuse kenye bete-nwu na badi linyese lɛmmɔ lɛlɔ lɛnɔ. 22Unwoti ɔdubo Egyipteƒuɔ bubo bɔkya ɔlɛ, nsu anwu kani ndubo-ma lɛlɛ lɛmmɔ bunyimi na ɔbwi-ma. Ɔsika ɔdububo-ma kalɛ na benwini bebo-nwu kudɔ, na si békpi-nwu kɔtɔ ni, na unu-ma buvele na ɔbla lɛla lɛni na bévele-nwu ute-ma na ɔbwi-ma.

23Uwi ɔmmɔ ni, ulu unengudi ɔdi ɔdubo bɔtɛ bɔsi Egyipte usie Asiria na Asiria ku Egyipte kadi bekyuli besie basɔ betenku lɛlɔ. Na kalɔ akpa anyɔ amɛni bekyuli bakpa Unwoti basala. 24Na uwi ɔmmɔ kemmo ni, Israel ku Egyipte ku Asiria kalɔ bekyuli badubɔbla kadi akpa atɛ bani ndubo bɔsala na benwini kusɛ kusɛ bete bayawine ƒui. 25Unwoti Katɔti ɔdubute-ma kusɛ kusɛ na ɔ́su ɔnini, “Kusɛ kusɛ ɔdubɔsiaku Egyipte mina kadi bekyuli ku Asiriaƒuɔ bani ndi mina enu kabla ku badi mina bekyuli na Asiria kadi bekyuli ku Israel kadi bani bekyuli na lɛ́ƒuna líte lɛlɔ.”

Currently Selected:

Yesaia 19: lef

Highlight

Copy

Compare