Yesaia 17
17
Unwoti Údie Lɛla Kpakplaa Ɔ́tina Na Damasko Lɛlɔ
1Damasko lɛlɔ kɔtɛ.
“Bɛnu! Damasko ɔma unengudi ɔdubɔyii udu
na ɔƒaamu ɔdubunwini alakpi kebu bonwu kadi.
2Na lɛma linengudi lɛni na nwuna amadɔ ƒui
lɛdubunwini baƒonu katɛnkɔ,
na ukyuli ɔdi ulabɔku-ma.
3Eƒraim ɔma unengudi,
ɔni na awodu bonwu aagyumana
ɔdubɔyii udu na ɔsɔ ulakya,
na Damasko lɛga kadikɔ
kabwɛ ƒui,
na Aram kadi nkyuli ɛlɛɛ bani mebu
badubɔyila bana bukeye aani Israelƒuɔ.”
Lɛni na Unwoti Ɔyikune Ƒui ɔ́su.
4“Na limeyi lɛmmɔ lɛlɔ ni,
ala ani ƒui na Israel ubo ɔsu na uukeye adubɔyii udu,
ɔsika ayaki adubo kalɔ kammɔ bɔda geen.
5Na kalɔ kammɔ kadubɔbla
aani kemo kani na
umonsene údie atu,
uwi ɔni na báaƒɛ edula
abunidi ƒui,
ani nnye ku ebi sɛɛn bédie-ka kemmo.
Lɛni geen na ɔdubuse aani Raƒaƒuɔ Kɔwɛ kemo
kani kemmo na bávi bála lɛmuyɔ ƒui.
6Nsu bana ɛlɛɛ badi badubo bubu
aani kalɛ na beeti ugyii
ku asɔsɔ
teede kɔdingyii ebi ƒui
na kebu ɛlɛɛ na kayɔlɔ
kɔgba akɔ.
Lɛni na Unwoti Israel Katɔti ɔ́su.”
7Uwi ɔmmɔ ni,
bekyuli badubunwini banu bana Udiene
Israel Katɔti ɔni nse kedee.
8Na basɔ belésie bana akpabi
ani na béti bana enu bávɔ béte lɛlɔ kudɔ,
na basɔ beleti anu balasia Asera ɔƒiɔgyii
ku nwuna lɛlɔ ala ku oloƒui bɔkyula akpabi
ani na ama alati bátu mmɔ.
9Na uwi ɔmmɔ kemmo ni, bana lɛma lɛni na baagyumana kpakplaa na Israelƒuɔ bábɔku-ma bédie mmɔ lɛdubo bɔbwɛ na línwini aku.
10Bɛ́yiƒala bina Katɔti ɔni mɔɔƒɔ́-mii ngba,
na bítenyimo bina kagyumanakɔ kpakplaa
kani ndi lɛtakpɛ lɛni lɛlɔ na bíkpo kama.
Ɔkɛnku ɔmmɔ ɔsu ni, ina ka bɛ́lɛ egyii abuni,
na bíye adingyii abuni bɛ́siku kaƒɔ bíbalɛ,
11na bɛ́nu-nya lɛlɔ ɔ́si ɔnta na áta álɛ lili kaduɛ ni,
bilákɛ-nya biléde ɔsika bɛdubuduo
lɛbibo ku bɔnɔ geen kemmo na nwuna kenye kelékulo.
12Binu bekyuli lisu kɔnyi kɔku kɔni ndubo,
kɔku kɔni nse aani ɛpu ɔni mɔɔnwanɛ lɛlɔ,
na uubó teebewi utubili!
Binu kalɛ na badubo ku kudu ku kɔnyi.
13Nsu ina ka bábla kudu ku kɔnyi badubo lɛni ni,
Unwoti ɔdubo-ma bɔbɔku busienku kama,
aani kalɛ na ɔƒɛƒɛɛ uuƒwi aƒata taayulaku abi,
iye kalɛ na ɔƒɛƒɛɛ uuduo kɔnwinimi kemmo taakya ligede.
14Bekisine bákya-bu liƒu ku bɔyia geen useyi uwi,
nsu kadi bugye ni, bana ƒui báyii bákya.
Bekyuli bani muukpóku-bu lɛyuƒɔla lɛdi mmɔ.
Currently Selected:
Yesaia 17: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
