Yesaia 16

1Moabƒuɔ, biti baƒonu bɛsiku Sela ɔma

aani lɛlɔ bɔdi kayu bitéte kalɔ kammɔ lɛlɔ ɔdine

na bɛsia kalɔ kakwiidi kammɔ bisie Sion Kɔbi lɛlɔ.

2Moabƒuɔ beleku bese aani baasɛ

bani na bábɔku bálɛku ayu kemmo

na batɛ Arnon Ketu kaviakɔ mmɔ.

3“Bɛbla kasusu kabuni kadi bɛsiku-bu lɛlɔ,

na bɛlɛ ugyii ka bɛdubɔgyumana-bu

bula bekisine ɔsu aani kugyii ɔyuli

ɔni nse aani usien si kadi kábi yayaaya,

na bɛbɛla abu bani na baabɔku.

4Bɛya na abu Moabƒuɔ bekeline

bɔkɛ kakyakɔ na bina kudɔ,

na binwini katamikukɔ bite-bu

na bula bekisine ɔsu.”

Bekyuli bekpidi uwi ɔdubo bɔsa,

na bekyuli udu bɔyila bɔwɔ ulu.

Na bekyuli bani nkɛ mɔɔbɔku bekyuli bamba

na baayila-ma udu uwi ku ɔyikun ɔsa,

na bayii udu na kalɔ kammɔ ƒui lɛlɔ.

5Ɔmmɔ kama ni, badubuse lɛga kadikɔ kadi bese,

na kadanku bɔyɔ ute

bekyuli ƒui.

Na ukyuli ɔni mɔɔdi litemi lɛlɔ ulu lɛlɔ

ndubo lɛga lɛmmɔ bɔdi.

Na ɔ́si Dawid ɔtɔ kemmo.

Na anwu mɔɔtɛ litemi na ulu geen ɔmmɔ lɛlɔ.

Na ɔɔbabla taasia anu taabla lɛla biala siin.

6Mmɔ na ama básu banini,

“Búnu Moab kadi bekyuli lɛlɔtina.

Na bɔ́ti kalɛ na beekú lɛlɔ na balábu,

ku kalɛ na baakɔliku lɛlɔ katɔ ukpludi.”

7Anwuɔsu bɛya na Moab kadi bekyuli

bakɛ beteewulo kɔnyana taavi,

na bana lɛlɔ lɛni mɔɔkywí-ma ɔsu.

Na badubo buwulo na emini ani bádi ɔsu,

na bana ɔma unengudi na Kirhaset.

8Edula mmo bɔni na Hesbon bɔ́yɛyɛ,

na adingyii mmo bɔni na Sibma lɛnɔ bɔ́yɛyɛ.

Na egyiibi ani lɛbuli nébimi lísie Yaser muedi

kalɔ kammɔ lɛlɔ badine bésusu-ku bébile.

9Ɔmmɔ ɔsu na muuwulo ku Yaser,

na egyiibi ani náyii udu na Sibma ɔsu.

O Hesbon, muuwulo teete awɔ ku Eleale ƒui.

Ɔsika bɛsɔ bɛɛɛdubo egyiibi bɔkɛ bude ana udewi

na ebiti ada-mii ku lɛlɔyɔ.

10Egyiibi mmo bɔmmɔ bɔsɔ buláda kubiti,

na elénu ka ɔdi ɔɔtu ɔnu ɔdi iye lɛlɔyɔ kɔvanu kɔdi,

na ɔdi uuubo ntɛ kebulokɔ uláka egyiibi adi ntu,

ɔsika lɛlɔyɔ ƒui kenye kékulo.

11Mina kayi keewulo ku Moabƒuɔ kɔnyana

aani si ɔbentaa na nda muudie kɔnyana lɛnu,

na Kirhaset litemi liikpóku-mii geen.

12Moabƒuɔ béetu lɛlɔ bésie bana baƒiɔ kɔdu

na bátákpali na abi lɛlɔ, nsu kekeeke.

13Geen ni, ala amɛni udu na Unwoti ɔ́su úse na Moab kadi bekyuli lɛlɔ úbavi kukuuku. 14Nsu ɔƒɛni ni, Unwoti ɔnini, “Na akwa atɛ kemmo pɛpɛɛpɛ aani kalɛ na kabla ɔblane ɔɔká nwuna emeyi ani nébu na nwuna ɔtɔlati kudɔ na ɔbla-nwu kabla ni, Moab kalɔ kemodi ku nwuna akɛla ku nwuna bumomo ku lɛnyi lɛni na ɔ́ƒɔ na uukeye mmɔ lɛdubo bɔyii ku udu. Na bana ɛlɛɛ kani mebu na basɔ balákɛ ɔyikun ɔdi lɛnɔ.”

Currently Selected:

Yesaia 16: lef

Highlight

Copy

Compare