Etemila 4
4
1Lɛ́nu lɛla bamba lɛnɔ lɛ́ka lɛ́mana na lɛ́nu ulikplu ku kalala kani udu na bekyuli baabla bekyuli na kalɔ lɛlɔ.
Na keku buwulo sɔɔn kani nda,
nsu kɔnu ɔsiane ɔdi uuubo.
Na bani mɔɔbla udu ɔmɛni lɛnɔ
bebo ɔkplu geen.
2Ɔmmɔ ɔsu na lɛ́su kɔnakunwi nnini,
“Bekpine bebo bɔnwuna betulo bayawine.
3Na bani na bétemonku-ma
bɔwɔ ni,
bana ɔdi ɔsɔ ɔdia utulo ƒui,
ɔsika ama bátanu likyulikpi ala
ani mɔɔlɛ́ na kayawi mɛni kudii.”
4Na lɛ́nu kabla kani lɛlɔ na bekyuli benye ku ala enengudi ani na baabla na bɔɔnu ƒui kási lɛlɔ kogyulo bukpo ku lɛnungyie lɛni nkya bekyuli ɔsu. Na ɔmmɔ ƒui uuubo kalɔ kadi, ɔsika use aani kalɛ na baabi taasiaku ɔƒɛƒɛɛ.
5Ɔdɔlɔdi muuti enu taasia nwuna kayi na anu ka ɔkɛ ɔɔví,
na anwuɔsu lɛnɔ na kɔka kɔɔdú-nwu.
6Lɛdilabɔ blii lɛni na ákɛ ádi ku atu bɔyɔ ni,
ɔdia utulo si étésusu lɛlɔ na ému-nya ada
na use aani kalɛ na baabi taasiaku ɔƒɛƒɛɛ.
7Lɛ́nu lɛla bamba lɛnɔ na liiibo kalɔ bunu bɔdi na kalɔ lɛlɔ.
8Ukyuli ɔdi ɔ́kya ɔni na
uuubo ubi ɔnanabi
iye ɔnwani ɔdi,
nsu ulada lɛlɔ butu taaya,
na nwuna akɛla ani na ubo lɛnɔ
elemo-nwu.
Amu na úye lɛlɔ ɔnini, “Ɔma geen ɔsu na muubó abi,
na líni lɛla lɛbuni biala líte lɛlɔ ku kalɛ na lɛkya lɛlɔ ebiti muedi?”
Bi keyi udu na kadi mɛni
na ukyuli ulenu lɛla lɛdi kalɔ?
9Nkyuli inyɔ kelie kadia ketulo ukyuli unwi.
Ɔsika lɛlɔ lɛdubɔyɔ-ma
si bása baadi lɛla lɛni na bákɛ.
10Ɔƒɛni si ɔdi nébuli ni,
ɔkpanadi ɔdubo-nwu bubunku na ɔta.
Nsu si anwu lɛti kani na ɔdi ni,
nwuna bɔta bɔdubo-nwu bude.
11Na si badi inyɔ na báyu bátɛ ni,
bana lɛlɔ ogya ɔdubɔƒɔ ɔda-ma gugungu.
Nsu si awɔ ukyuli unwi na ɔdi
ntɛ ni,
dɛ na adubɔƒɔ ogya ada lɛlɔ gugungu?
12Baakana na badi ukyuli unwi lɛlɔ si biikpó.
Nsu si bibo inyɔ ni,
bɛdubɔsala na bɛdi lɛlɔ.
Anwuɔsu baasu banii kabuli
kani na bámii básala
ɛtɛ ni,
kalatuna bukulo pla.
13Si adi okloƒu ɔwabane na áda anu ni, ɔdia ƒui utulo ɔga ɔdɔlɔdi ɔni na ulie na ulaƒɔ bekyuli kasusu. 14Na okloƒu ɔmmɔ udu ni, ina aban ɔtɔ katɛkɔ na ɔ́si úbo iye bawabane kaduli na báwɔ-nwu bákya na baaadi baga liku bekyuli muedi ni, ɔkana na unwini ɔga. 15Lɛ́ɛnu dii ka kayawi bekyuli ƒui básiaku okloƒu ɔmmɔ udu na ɔga ɔdi kukpi kama. 16Na ɔdi ulakana nwuna basiakune bɔka. Nsu na uwi ɛlɛɛ kama ni, bekyuli bani na bébebo kama ɔdi ulayɔ-nwu litemi. Na ɔmɛni ƒui úlieku ɔƒɛƒɛɛ kama bukeli taasia.
Currently Selected:
Etemila 4: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
