Lɛkpa Ulu 5
5
Mose Úte-ma Katɔti Ɔda Bubo Leevu
1Amu na Mose ɔ́lɔ Israelƒuɔ bammɔ ƒui ɔ́sala na ɔ́su-ma ala amɛni.
Israel kadi bekyuli, binu ɔda bubo bɔni ƒui líti muute-mii ɔmwi mɛni. Bɛtɛya ɔda bubo bɔmmɔ na bɛnu ka bɛdi-mu lɛlɔ. 2Bula Unwoti Katɔti ku abu búnyimi linyese lɛdi na Sinai Kɔbi lɛlɔ. 3Na ɔɔɔdi bula bati kuuku ku Katɔti nényimi linyese lɛmɛni. Mmomu abu bani nli ngba mɛni ɔsu na únyimi linyese lɛmɛni. 4Na kɔbi kɔmmɔ lɛlɔ ni, amii alati binu ka Katɔti ɔ́tɛmiku-mii ɔ́siku lɛgyavonku lɛni mɔɔda kemmo. 5Nsu ka bɛɛyia lɛgyavonku lɛmmɔ na bilayɔ ka bɛkɔ bisie kɔbi kɔmmɔ lili ɔsu ni, ami nénye amii ku Katɔti ntɛ na lɛ́su-mii ala ani na Katɔti ɔ́su. Na ami nénye Katɔti ku bina ntɛ uwi ɔmmɔ kemmo na lɛ́su-mii ala ani Katɔti ɔ́su.
6“Ami ndi bina Unwoti Katɔti ɔni nédie-mii ɔ́lɛku Egyipte kalɔ lɛlɔ kesii kani nka bénye-mii lɛlɔ na bɛɛbla bana kabla.
7Bitese benwoti badi bitebunku-mi lɛlɔ.
8Bitavɔ iye bɛnwi lɛla lɛni nálɛ ala ani nkya kayaa iye kalɔ lɛlɔ iye ntu bɔni na kalɔ kemmo na bitaakpa. 9Na tebo kalɔ takya baƒiɔ badi lili kalɔ iye akpa ɔdi. Ɔsika ndi bina Unwoti Katɔti ɔni muukpó kɔgyulo. Na mɔɔní bekyuli bani muukisi-mii kɔtu ɔ́si bati ku bebi lɛlɔ útédu kaba katɛdi ku kenedi lɛlɔ. 10Nsu mɔɔbla lɛƒɔndia teete nkyuli ɛlɛ ɛlɛ bani mɔɔyɔ́-mi na baadi mina ɔda bubo lɛlɔ.
11Takpali Unwoti ƒula Katɔti lɛnyi keeke. Ɔsika Unwoti ɔdubɔni ukyuli ɔni mɔɔlɔ-nwu lɛnyi keeke kɔtu.
12Se lɛnwunameyi likpo na abla-ni kedee, aani kalɛ na ami ɔni ndi bina Unwoti Katɔti líbo-mii ɔda. 13Emeyi aku na ɔlɛka eti abla ƒula kabla. 14Nsu limeyi maatɛdi ndi ami Unwoti ƒula Katɔti Lɛnwunameyi lɛni kemmo na útalɛ ka abla kabla kadi, awɔ iye ƒula bebi iye ƒula kabla bablane iye ƒula bebuo iye baƒɔ bani nkya-a kudɔ babla kabla kadi. Na útalɛka bekyuli bani mɔɔbla kabla teete-ɔ babla kabla kadi lɛnwunameyi lɛmmɔ lɛlɔ aani kalɛ na awɔ lɛnɔ alábla kabla kadi. 15Na ɔlɛka binyimo ka uwi ɔni návi kemmo ni, bɛdi bekyuli bani na bénye-mii lɛlɔ ka bitaabla kabla teete-ma. Na ami ɔni ndi bina Unwoti Katɔti néti mina ɔyikun bonwu ku ɔlɔkplu kpakplaa na lídie-mii lɛ́lɛku mmɔ. Ɔmɛni ɔsu na muubó-mii ɔda ka bitabla kabla kadi lɛnwunameyi lɛlɔ.
16Bu ƒula ɔti ku ƒ'ini aani kalɛ na ami bina Unwoti líbo-mii ɔda na adubulie ngba gyɔlɔɔ na keyi kadubɔyɔku-ɔ na kalɔ kani na líti muute-ɔ lɛlɔ.
17Tadu ukyuli.
18Tadi kɔsɔnɔ.
19Teyu.
20Tada ukyuli ɔdi kenye.
21Taya anumi egyie-ɔ-na ƒula ukyulikpana ulekudi iye nwuna kaduli iye nwuna kabla ɔblane iye nwuna kalɔ iye nwuna ɔmantɛ bakɔ iye nwuna bebuo ala betine iye nwuna lɛla biala na ubo lɛlɔ!”
22Ɔda bubo bɔmɛni na Unwoti úti úte-mii uwi ɔni bɛ́sala binye kɔbi kɔmmɔ kaƒɔna. Na mmɔ bínu-nwu lɛdi bonwu bɛ́siku lɛgyavonku kemmo ku liƒlukutu bili bili kemmo na mmɔ use suu geen. Na únweni ala ammɔ ɔ́sia atabi anyɔ lɛlɔ na úti úte-mii. Na ɔ́sɔ útasu lɛla lɛdi útebunku ɔmmɔ.
Liƒu Lɛ́da Israelƒuɔ
23Uwi ɔni na bínu Unwoti lɛdi bɛ́siku kasuudikɔ mmɔ uwi ɔni na kɔbi kɔmmɔ kɔɔda mmɔ ni, bina benengu ku bina adua benengu ku baduɔti bébo-mi kudɔ na básu-mi banini, 24“Bɔ́nu bula Unwoti Katɔti ɔyikun ku bukeye uwi ɔni na búnu-nwu lɛdi bɔ́siku lɛgyavonku lɛmmɔ kemmo. Na ɔmwi limeyi lɛmɛni na bɔ́nu bɔ́ti geen ka ukyuli ɔkana ulie ngba ina Katɔti ɔ́tɛmiku-nwu. 25Nsu buuye bɔnii bi ɔsu na buuti bula ngba butákya ɔgbankpi kemmo? Ɔsika lɛgyavonku lɛmmɔ lɛdubo-bu ngba bɔyila. Na bɔɔtí nwaa ka bɔdubo bukpi si bɔ́sɔ búnu bula Unwoti Katɔti lɛdi. 26Na buuye bɔnii ukyuli ɔdi uulie ngba dii ka únu Katɔti ɔni nlie ngba lɛdi ɔ́siku lɛgyavonku kemmo? 27Anwuɔsu Mose, awɔ kani teesie na eteenu lɛla biala na bula Unwoti Katɔti ɔsu-bu. Na enwini abasu-bu. Na lɛla biala ɔdubo-bu bɔsu ni, bɔdubo-ni lɛlɔ bɔdi.”
28Unwoti ɔ́su-mi ɔnini, “Línu lɛla lɛni na bekyuli bamɛni básu-ɔ. Na lɛla lɛmmɔ lɛdia. 29Si lɛni na bekyuli bamɛni badubutaabla na beteeti ɔbu teete-mi na bataadi mina ɔda bubo ƒui lɛlɔ ni, lɛla biala lɛdubuteesie kaduɛ teete-ma, ama ku bana kaba bekyuli ƒui, ɔ́si ɔƒɛni úsela uwi ƒui.”
30Amu na Unwoti ɔ́su Mose ɔnini, “Teesie na atásu bekyuli bammɔ na benwini beteesie bana kɔkyakɔ. 31Nsu awɔ Mose amu adubɔsɔ bɔkya-mi kudɔ mɛni na ndubuti mina ɔda bubo bɔmmɔ ƒui lite-ɔ. Na atina bekyuli bammɔ ɔda bubo etemila ammɔ kalɛ badi-nya lɛlɔ na kalɔ kani lɛlɔ bésela betélie mmɔ.”
32Anwuɔsu Israelƒuɔ, bɛnu kaduɛ na bɛdi ɔda ɔni na bina Unwoti Katɔti úbo mɛni ƒui lɛlɔ. 33Bɛdi-mu lɛlɔ ƒui kalɛ na lɛla biala bɛdubɔbla lɛtɛ lite-mii na keyi kadubɔyɔku-mii na bilie ngba gyɔlɔɔ na kalɔ kani lɛlɔ bísela bitélie mmɔ.
Currently Selected:
Lɛkpa Ulu 5: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
