Lɛkpa Ulu 4

Mose Úbo Israelƒuɔ Ɔda Ka Badi Katɔti Litemi Lɛlɔ

1Bɛdi ɔda bubo bɔni ƒui mɔɔtina-mii mɛni lɛlɔ kalɛ na bɛdubɔkana na bilie kalɔ kani na Katɔti ɔni ndi Bina Bati Kuuku Katɔti úti uute-mii lɛlɔ. 2Na biteti ɔda bubo bɔbambadi bɔdi bitebunku ɔda bubo bɔmɛni lɛlɔ. Iye bitada ɔdi bitedie lɛnɔ. Mmomu bɛdi Unwoti ɔni ndi bina Katɔti ɔda bubo bɔni líti muute-mii mɛni lɛlɔ.

3Amii alati bɛ́nu ku bina anumi lɛlɔ lɛla lɛni na Katɔti ɔ́bla na Peor Kɔbi lɛlɔ, kalɛ na ɔ́yila ukyuli biala ɔni muuti ala taatákpa baƒiɔ banii baalɔ Baal udu. 4Nsu amii bani nsiaku Katɔti kama kpakplaa bɛmu bilie ngba úti úbedu ɔmwi kadi.

5Binu! Mina Unwoti Katɔti bunyimi bɔni na úbo-mi ɔda ka ntina-mii ni, lɛ́tina-mii ƒui. Na mɔɔsu-mii nnii bɛdi-mu lɛlɔ ƒui na kalɔ kani bísela bitéti binwini bina kadikɔ mmɔ lɛlɔ. 6Na nsɔ mɔɔsu-mii nnii bɛdi-mu lɛlɔ kaduɛ, na ɔmɛni ndubɔya na kadi bamba bekyuli bani nkya mmɔ badubɔnu bɔti kalɛ na bɛ́da anu. Na si bánu kalɛ na bɛɛdi ɔda bubo bɔmɛni lɛlɔ ni, bekyuli bammɔ badubɔsu banii, “Kadi bekyuli lisu bonwu bamɛni báda anu na beenú ala kalɔ geen.” 7Na kadi bekyuli badi beeebo ɔni na bana baƒiɔ bede-ma aani kalɛ na bula Unwoti Katɔti ude-bu mɛni na ɔɔtuna teete-bu si bɔ́kpali-nwu. 8Na kadi bamba bekyuli ina bebo lɛnyi muedi ni, bana ɔda bubo bulédu ɔda bubo siin bɔni na lɛ́tina-mii ɔmwi kadi mɛni.

9Nsu uwi ɔni na bilie ngba mɛni ni, binye kagyumana uwi biala kemmo kalɛ na bilayiƒala ɔda bubo bɔmmɔ. Na ala ani ƒui na bíti bina anumi bɛ́nu ni, biti bɛsu bina bebi ku bina bawɔ. 10Na binyimo limeyi lɛni na bíbasiaku bina Unwoti Katɔti na Sinai kɔbi kaƒɔna. Mmɔ na Katɔti ɔ́su-mi ɔnini, “Sala-ma lisu. Ɔsika mɔɔyɔ́ ka binu lɛla lɛni na mbo nte-mii kalɛ na bitaayia-mi na bitaabu-mi lɛnɔ uwi ɔni na bilie ngba mɛni. Na biti etemila ani bínu mmɔ bɛtina bina bebi na babla basiaku-nya lɛlɔ lɛni kani.”

11Bíbo bíbenye kɔbi kɔmmɔ kaƒɔna na liƒlukutu bili bili bonwu lɛ́ƒɔ-ku lɛlɔ ƒui na ɔ́bla suu geen na ogya ɔɔda taasi-ku lɛlɔ teetédu katɔ ƒui na ɔ́bla suu geen. 12Katɔti ɔ́tɛmi úte-mii ɔ́siku ogya ɔmɛni kemmo. Na bínu-nwu lɛdi bɛ́siku ogya ɔmmɔ kemmo, nsu bítanu-nwu udu biala bítati. 13Na ɔ́tɛmi úte-mii ɔ́siku ulu ɔni lɛlɔ na bɛdubɔsia na bɛdi nwuna lɛla lɛni na únyimiku-mii lɛlɔ na bitaadi Ɔda Bubo Leevu bɔni na únweni ɔ́sia atabi bɛbɛ anyɔ lɛlɔ mmɔ lɛlɔ. 14Na Katɔti ɔ́su-mi ka ntina-mii ɔda bubo bɔmmɔ ƒui kalɛ na bɛdi-mu lɛlɔ si bɛ́via Yordan Ketu bísela bitéti kalɔ kammɔ binwini bina kadikɔ.

Katɔti Úbo Israelƒuɔ Ɔda Na Ala Avɔdi Lɛlɔ

15Limeyi lɛni na Katɔti ɔ́tɛmi úte-mii ɔ́siku ogya kemmo na Sinai Kɔbi lɛlɔ ni, bítanu nwuna udu biala bítati. Anwuɔsu bɛnu lɛlɔ kemmo kaduɛ. 16Na bitabla likpidi na bɛvɔ iye bɛnwi lɛla lɛni udu na lɛ́lɛ ɔnana iye uleku, 17iye aasɛ ɔni muuveyi taavi ɔdi, 18iye kubweyi kɔni mɔɔkpɛ́ kaƒɔ lɛlɔ, iye kɔkpaku. 19Na bitaya na lɛla lɛdi lɛkɔku-mii na bɛta bitákpa ala ani nkya kayaa na bina anumi aanu aani ɔƒɛ ku kɔbuli ku ayabi. Ɔsika anya na Unwoti Katɔti údie úte kayawi bekyuli ƒui. 20Nsu amii amu ni, Katɔti nékpo údie-mii ɔ́lɛku lɛbibo lɛni mɔɔda aani ogya gaganga kemmo na Egyipte kalɔ ka bɛbla nwuna bekyuli bani na bɛdi ɔmwi mɛni.

21Ɔ́si amii ɔsu ni, bina Unwoti Katɔti úti kɔnyi ɔ́kya-mi na úse kenye ka ami Mose mina ɔgba ɔɔɔdubo bɔvia Yordan Ketu na liduo kalɔ kabuni kani na úti uute-mii na kenwini bina kadikɔ mɛni kemmo. 22Mmomu ndubukpi bɔtɛ kalɔ kamɛni lɛlɔ ɔni na mina ɔgba ulavia Yordan Ketu kani na bɛdubo bɔvia ɔƒɛni busie kalɔ kabuni kani na bísela bitéti binwini bina kadikɔ mɛni lɛlɔ. 23Na bɛnu kaduɛ na bitayiƒala lɛla lɛni na Katɔti únyimiku-mii mmɔ. Na bɛdi nwuna ɔda bubo lɛlɔ bɔni násu-mii ka bitavɔ iye bitanwi lɛla lɛdi bitese bitete lɛlɔ mmɔ lɛlɔ. 24Ɔsika si bɛ́bla lɛni ni, bina Unwoti Katɔti ɔdubuti kɔnyi. Ɔsika uukpó kogyulo na use aani Ogya na ɔkana na ɔkyula-mii.

25Ina bílie kalɔ kammɔ lɛlɔ bítu uwi na bɛ́wɔ bebi ku bawɔ tɛtɛ na ɔmmɔ kama bɛ́vɔ baƒiɔ badi bíse bíte lɛlɔ ni, Katɔti ɔdubuti kɔnyi ɔkya-mii. Ɔsika ala ammɔ bene ƒui adi likpidi na nwuna anumi. 26Anwuɔsu mɔɔsu-mii na katɔ ku kalɔ anumi ɔmwi limeyi lɛmɛni ka si bítadi litemi lɛni na lɛ́su-mii mɛni lɛlɔ ni, uwi uletu asa na Katɔti ɔdubɔyila-mii udu na kalɔ kani na bísela bitéti binwini bina kadikɔ mɛni lɛlɔ si bɛ́via Yordan Ketu. 27Na mɔɔsu-mii lɛnɔ nnii, Katɔti ɔdubo-mii bugyingya bɔkya kadi bamba bekyuli akɔ ɔni na bina ɛlɛɛ badi kani ndubo bubu na bana akɔ mmɔ. 28Na mmɔ na bɛdubo ala ani na bekyuli béti egyii ku atabi bánwi na bávɔ bɔkpa. Na kugyikɛ ku atabi ala ammɔ ebo anumi, nsu alákana bɔnu. Na ebo atu, nsu alákana lɛla lɛdi bunu. Na alákana adila adi bɔdi, iye enwenyi lɛla lɛdi enu. 29Nsu si bɛdubuti bina kayi ƒui bɛwia Unwoti Katɔti kama ulu na kesii kani na bɛkya mmɔ ni, bɛdubɔnu-nwu. 30Na si bíduo bukpoku bɔdi kemmo na ala amɛni aalɛ́ku-mii ni, mmɔ na bɛdubunwini bisie Unwoti kudɔ na binu nwuna litemi. 31Ɔsika Katɔti ubo lɛƒɔndia na ulada-mii ulanyonu iye ɔyila-mii udu na ulayiƒala bunyimi bɔni na anwu ɔlati únyimi ku bina bati kuuku.

32Na amii alati bɛwia bɛsiku uwi ɔni návi asa na báwɔ-mii. Na bɛwia bɛsiku uwi ɔni na Katɔti úti údie ukyuli. Na bɛwia kayawi kammɔ ƒui kemmo si ukyuli ɔdi únu ka ala ebendi amɛni udu álɛ dii. 33Kadi bamba bekyuli badi bétenu dii ka Katɔti ɔtɛmi ɔsiku ogya kemmo na belie ngba aani kalɛ na amii bínu na bilie ngba. 34Na muuye-mii nnii baƒiɔ badi bésie kalɔ kadi lɛlɔ dii na bétédie bekyuli bálɛku kalɔ kammɔ lɛlɔ na béti-ma bábla nwuna bekyuli aani kalɛ na bina Unwoti Katɔti údie-mii ɔ́lɛku Egyipte kalɔ lɛlɔ? Na bina anumi lɛlɔ ni, údie nwuna ɔyikun ɔ́tina-mii na ɔ́ya na lɛlɛ lidu lidu líbo bekyuli lɛlɔ, na údie akɔla lidu lidu ku ala ani mɔɔda liƒu geen ɔ́tina.

35Na Unwoti údie amɛni ƒui úti ɔ́tina-mii ka anwu lɛti ndi Katɔti na ɔdi biala ɔsɔ uuubo. 36Na ɔ́ya na bínu nwuna lɛdi bɛ́siku katɔ kalɛ na ɔda-mii kpakplaa na ulu ɔni lɛlɔ na ɔdi ka bɛsia lɛlɔ. Na kalɔ kamɛni lɛlɔ lɛnɔ ni, ɔ́ya na bɛ́nu nwuna ogya ɔni mɔɔda bonwu na ɔ́tɛmi ɔ́siku ogya ɔmmɔ kemmo úte-mii. 37Ka ɔɔyɔ́ bina bati kuuku ɔsu ni, ɔ́ƒuna-mii ka binwini nwuna badi. Na anwu ɔlati úbo úbedie-mii ɔ́lɛku Egyipte kalɔ lɛlɔ ku nwuna ɔyikun bonwu. 38Na ɔni na bíti bísela ni, ɔ́bɔku kɔlɔ kɔni bekyuli mbo ɔyikun betulo-mii kalɛ na amii bɛkɛ kuƒi na biti kɔlɔ kɔmmɔ binwini bina kadikɔ aani kalɛ na use ɔmwi. Na aka ndi kalɔ kani lɛlɔ bilie mɛni.

39Anwuɔsu bɛti nwaa ka Unwoti lɛti ndi katɔ ku kalɔ Ɔti. Na ɔdi biala ɔsɔ uuubo. 40Na nwuna ɔda bubo bɔni ƒui líti líte-mii ɔmwi limeyi lɛmɛni lɛlɔ ni, bɛdi-mu ƒui lɛlɔ. Na lɛla biala na bɛɛbla ni, lɛdubɔtɛ lite-mii kaduɛ ku bina bawɔ ƒui. Na ɔmɛni ndubɔya na bilie kalɔ kani na bina Unwoti Katɔti úti uute-mii mɛni ka biti-ka bɛbla bina kadikɔ uwi ƒui.

Báda Lɛma Libendi Béte Kabɛkɔ

41Amu na Mose údie lɛma libendi ɛtɛ lɛni nkya Yordan Ketu ɔƒɛ katukɔ úse 42ka si ukyuli ɔdi ɔɔɔgyi asa na ɔ́du ukyuli ɔni naaadi nwuna ukisine ni, ɔkana na ukeli utábɛ lɛma lɛmɛni ɔdi biala kemmo. Na si úduo ɔdi kemmo ni, utalɛka badu ukyuli ɔdune ɔmmɔ. 43Na lɛma lɛmmɔ ndi Beser ku Romot ku Golum. Na Beser ɔdi Ruben kɔdua bekyuli ɔma ɔni ndi abi lɛlɔ kalɔ kakwiidi ɔma ɔni nsia ɔtantɛ. Na Romot ɔma ɔni nkya Gilead kalɔ kemmo ni, ɔdi Gad kɔdua bekyuli ɔdi. Na Golum na Basan kalɔ lɛlɔ ɔdi Manase kɔdua bekyuli ɔdi.

Mose Údie Katɔti Ɔda Bubo Keyi

44Ɔmɛni ndi ɔda bubo bɔni na Mose údie ɔ́tina Israelƒuɔ ka basia-mu kama. 45Ɔda bubo bɔmɛni ku ala ani ƒui na adanku mmɔ ni, údie-nya ɔ́tina-ma uwi ɔni na bálɛ Egyipte kalɔ lɛlɔ. 46Uwi ɔmmɔ na bébo beli kɔwɛ kɔni nde ɔma ɔni baalɔ Bet-Peor na Yordan Ketu ɔƒɛ katukɔ kakɛ. Na kalɔ kammɔ kadi Ɔga Sihon ɔni ndi Amoriƒuɔ ɔga na uli Hesbon ɔma kemmo. Mose ku Israelƒuɔ békpo bádi ɔga ɔmɛni lɛlɔ. 47Na báƒɔ-nwu kalɔ bénwini bana kadikɔ. Békpo Ɔga Og ɔni ndi Amoriƒuɔ ɔga unyɔdi ɔni mɔɔdi lɛga na Basan kalɔ lɛlɔ na báƒɔ anwu kadi lɛnɔ. Baga inyɔ bamɛni mɔɔdi lɛlɔ na Yordan Ketu ɔƒɛ katukɔ kakɛ na ɔvi ɔmmɔ. 48Na kalɔ kamɛni kadanku ɔ́si Aroer ɔni ntɛ Aron Kɔwɛ kenye úti útédu Sion Kɔbi kɔni baalɔ banii Hermon 49ku kɔwɛ kakɛ kani nkya Yordan Ketu ɔƒɛ katukɔ kakɛ úti útédu Mma Ɛpu si éti ésela Pisga Kɔbi kaƒɔna ƒui kadi bana ɔdi.

Currently Selected:

Lɛkpa Ulu 4: lef

Highlight

Copy

Compare