Lɛkpa Ulu 11

Katɔti Údie Nwuna Litemi Lɛlɔ Bɔdi Ɔ́tina

1Bɛyɔ bina Unwoti Katɔti na bitaadi nwuna litemi lɛlɔ uwi ndi uwi. 2Na binyimo kalɛ na ɔ́ni-mii kɔtu ku kalɛ na údie nwuna ɔyikun kpakplaa ɔ́tina-mii. Nsu bina bebi ama ni, Katɔti útani-ma kɔtu kɔdi. 3Bebi bammɔ bátanu akɔla budie taatina lidu lɛni na ɔ́bla ɔ́tina Egyipteƒuɔ ku bana ɔga na Egyipte kalɔ lɛlɔ. 4Na bátanu kalɛ na Unwoti ɔ́yila Egyipteƒuɔ bekpone ku bana bapɔnkɔ kɛɛkɛ ɔni mɔɔní-ma udu. Na ɔ́ya na Ɛpugyie úti-ma uwi ɔni na bábi básiaku-mii mmɔ. 5Na baaagyi lɛla lɛni na Unwoti ɔ́bla úte-mii na kalɔ kakwiidi kemmo asa na bíbedu mɛni. 6Binyimo lɛla lɛni na Unwoti ɔ́bla Datan ku Abiram bani ndi Eliab bebi bani nási Ruben kɔdua kemmo. Na bina ƒui anumi ni, Unwoti ɔ́ya na kalɔ kébimi kenye na kébweli-ma ku bana kaduli bekyuli ku bana adi kevo kani bátu ku bana bebuo ƒui. 7Na amii ndi bekyuli bani nánu ala ebendi ani na Unwoti Katɔti ɔ́bla mɛni.

Katɔti Úse Kenye Ka Wete Israelƒuɔ Kusɛ Kusɛ Si Béduo Kalɔ Kawɔdi Kammɔ Lɛlɔ

8Bɛnu kaduɛ na bɛdi ɔda bubo ku ala ani na lɛ́tina-mii ɔmwi kadi mɛni lɛlɔ ƒui kalɛ na bɛkɛ ɔyikun na bɛvia Yordan Ketu na bitélie kalɔ kammɔ kemmo. 9Na ɔmmɔ ndubɔya na bilie bitu uwi na kakɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii mmɔ lɛlɔ. Kalɔ kammɔ na Unwoti Katɔti úse kenye ka wete bina bati kuuku ku bana bawɔ. 10Na kalɔ kani lɛlɔ na bísela bitélie mmɔ ni, keeese aani Egyipteƒuɔ kalɔ kani lɛlɔ na bílie mmɔ. Ɔsika Egyipteƒuɔ kalɔ kammɔ ni, si bɛ́va edula ni, ɔlɛka bibo abi na biwi-nya ntu asa na edula ammɔ adia. 11Nsu kalɔ kani lɛlɔ na bísela mɛni aka ni, kadi abi ku ɔkwalɛ kalɔ na ɔnantu ntu mɔɔdia edula na mmɔ. 12Ɔsika bina Unwoti Katɔti ɔɔnu kalɔ kammɔ lɛlɔ lɛkwa limodi.

13Anwuɔsu bɛdi ɔda bubo bɔni mɔɔsu-mii ɔmwi kadi mɛni lɛlɔ nnii bɛyɔ bina Unwoti Katɔti na biti bina kayi ƒui bitaakpa-nwu. 14Na si bɛɛdi ɔda bubo bɔmmɔ lɛlɔ ni, Unwoti Katɔti ɔdubɔya na ɔnantu utaana kaƒɛndi ku ketudi na bilayaki edula aani antabi ku ntɛ ku nnɔ. 15Na ɔdubɔya na livo litaakwɛ pii kalɛ na bina ɔmantɛ bebuo bataakɛ-nya taakun. Na amii lɛnɔ kɔka kulada-mii.

16Na bitaya na ukyuli ɔdi ɔtɔlɔ-mii na bɛlɛ bina Unwoti kama na bitákpa baƒiɔ badi. 17Ɔsika si bɛ́lɛ-nwu kama ni, ɔmmɔ ɔdubɔya na uti kɔnyi ɔkya-mii geen na ɔya na ɔnantu ɔda bɔna ɔya na kalɔ kabuni kani na úte-mii mmɔ lɛlɔ na kakwii. Na si bɛ́va edula adi ni, alakana bɔkwɛ. Na ɔmɛni ndubɔya na bikpi bɛkya kalɔ kammɔ kemmo. 18Bɛtɛya ɔda bubo etemila ammɔ bɛkya bina lili kemmo na biteeti-nya lɛlɔ kasusu. Na binweni-nya bɛsia kɔkunkɛ lɛlɔ na bibo bɛda bina enu ku atɛntɛ. Na si bɛ́bla lɛni ni, ɔdububunku-mii na bitaadi ɔda bubo bɔmmɔ lɛlɔ. 19Na bɛya na bina bebi batɛya ɔda bubo bɔmmɔ. Na si bɛkya kaduli iye bɛkɛ ulu bísela kesii kadi iye bilie bɛɛnwuna iye bɛkya bɛɛbla kabla kadi ni, biti ɔda bubo bɔmmɔ binwini bina kɔtɛ kɔni na bɛɛtɛmi. 20Na binweni ɔda bubo bɔmmɔ bɛmana bina lɛtɔ kɔyakun ku kɔduli kɔyakun anumi. 21Na ɔmɛni ndubɔya na kalɔ kani na bina Unwoti Katɔti úse kenye ka weti wete bina bati kuuku ni, amii ku bina bebi bɛdubulie-ka lɛlɔ bítu uwi aani kalɛ na kayaa kammɔ kebi kalɔ lɛlɔ késela uwi ƒui.

22Bɛdi ɔda bubo bɔni ƒui na bina Unwoti Katɔti úti úte-mii mɛni lɛlɔ kaduɛ na bɛyɔ-nwu. Na bɛbla lɛla biala na wasu-mii. Na bɛda-nwu kpakplaa. 23Na si bɛɛsia nwuna ɔda bubo bɔmmɔ anu ni, Katɔti ɔdubɔbɔku kadi bamba bekyuli ƒui udie bana kɔlɔ lɛlɔ na amii bitéti kɔlɔ kɔmmɔ ina ka bekyuli bammɔ bemomo na bebo ɔyikun bétulo-mii. 24Na kesi kesii na bina lɛgba lɛɛnya ni, kalɔ kammɔ kadubɔbla bina kadi ɔ́si kalɔ kakwiidi kemmo na kada kakɛ úti útédu Lebanon na katɔ kakɛ na ɔ́si Euƒrate Ketudɔ na ɔƒɛ katukɔ úti utédu Mediterenia Ɛpu na ɔƒɛ kanukɔ. 25Na kesi kesii bísela ni, bina Unwoti Katɔti ɔdubɔya na bekyuli bani nlie kɔlɔ kɔmmɔ lɛlɔ bayia-mii geen aani kalɛ na ɔ́su úse. Na uláya na ukyuli ɔdi unye utile-mii ulu.

26Bɛnu! Nda kusɛ kusɛ ku ewida mɔɔvá-mi anumi ɔmwi kadi. Bidie ɔni na bɛɛyɔ́. 27Kusɛ kusɛ ɔdubɔsiaku-mii si bɛɛdi bina Unwoti Katɔti ɔda bubo bɔni na líti muute-mii ɔmwi kadi mɛni lɛlɔ. 28Nsu ewida adubɔsiaku-mii si bɛ́lɛ-nwu kama na bísie bɛɛkpá baƒiɔ bani na bɛɛɛgyi kudii. 29Na si uwi ɔni na Unwoti ɔ́ya na bíduo kalɔ kani na ɔ́su úse ka wete-mii mmɔ lɛlɔ ni, na bɛkɔ kusɛ kusɛ ɔmɛni lɛsa na Gerisim Kɔbi lɛlɔ. Na bɛkɔ ewida amɛni lɛsa na Ebal Kɔbi lɛlɔ. 30Bɛgyi ka abi anyɔ amɛni ede ɔma ɔni baalɔ banii Gilgal na Araba Kɔwɛ kemmo na Yordan kalɔ lɛlɔ. Na mmɔ ɔkya Yordan Ketu ɔƒɛ kanukɔ kesii kani baalɔ More na egyii enengudi enye mmɔ. 31Na ɔƒɛni ni, bɛdubo Yordan Ketu bɔvia na biteesie bitélie kalɔ kani na bina Unwoti Katɔti ɔ́su úse ka wete-mii lɛlɔ. Na si bísie bítélie mmɔ ni, 32bɛnu ka bɛɛdi ɔda bubo bɔni ƒui na líti muute-mii ɔmwi kadi mɛni lɛlɔ.

Currently Selected:

Lɛkpa Ulu 11: lef

Highlight

Copy

Compare