Lɛkpa Ulu 10

Katɔti Ɔ́sɔ Únweni Ɔda Bubo Leevu Bɔni Na Mose Úbo Ɔ́buɛ Mmɔ

1Uwi ɔmmɔ ni, Unwoti ɔ́su-mi ɔnini, “Sɔ nwi atabi anyɔ bamba aani edeedi kalɛ. Na anwi ugyii adaka ɔdi na eti atabi ammɔ na akɔ. Na eti adaka ɔmmɔ na akɔ ebo-mi kudɔ na kɔbi lɛlɔ mɛni. 2Na nsɔ ndubo ala edeedi ani na línweni lɛ́sia atabi ani na ébo ábwɛ mmɔ lɛlɔ bunweni bɔsia awɔdi amɛni lɛlɔ. Na si línweni lɛ́wɔlɔ ni, na eti atabi ammɔ akya adaka ɔmmɔ kemmo.”

3Anwuɔsu líti Akasia kugyii na lɛ́nwi adaka ɔni na Unwoti ɔ́su-mi mmɔ na lɛ́nwi atabi awɔdi aani kalɛ kani na atabi edeedi ammɔ ese pɛpɛɛpɛ na líti-nya lísienku kɔbi kɔmmɔ lɛlɔ. 4Amu na Unwoti ɔ́sɔ únweni ɔda bubo etemila leevu ɔ́sia atabi ammɔ lɛlɔ. Etemila ani kani na únweni ɔ́sia atabi edeedi ammɔ lɛlɔ. Na adi ɔda bubo etemila ani kani na ɔ́kɔ lɛsa úte-mii ɔ́siku ogya bonwu ɔmmɔ kemmo ɔni na bɛ́sala binye kɔbi kɔmmɔ kaƒɔna mmɔ. 5Amu ka Unwoti úti atabi ammɔ úte-mi ni, líti-nya líboku kɔbi kada na líti-nya lɛ́kya adaka ɔmmɔ kemmo aani kalɛ na ɔ́su-mi na akya mmɔ úbedu ɔmwi kadi.

6Na uwi ɔmmɔ ni, Israelƒuɔ bákya kesii kani na Yaakan kadi bekyuli abiɔ ákya. Na báta mmɔ bésie Mosera. Na mmɔ na Aaron úkpi na báva-nwu. Nwuna kama ni, ubidi ɔnanabi ɔni baalɔ banii Eleasar úti-nwu keliekɔ aani Katɔti Ɔkpane. 7Na ka bási Mosera ni, báta bétélie Gudgod. Na ka bási Gudgod ni, bésie Yotba kesii kani na ntukpa bɔkya kaduɛ. 8Na uwi ɔni na líti atabi ammɔ lɛ́yulaku kɔbi ḿbakya Bunyimi Adaka ɔmmɔ kemmo ni, Unwoti údie Lewi kɔdua bekyuli ka ama nteeti adaka ɔmmɔ. Na bénwini Unwoti Bakpane. Na ama ndubo kusɛ kusɛ buteeti teete Israelƒuɔ na Unwoti lɛnyi kemmo. Na bataabla-nwu kabla aani kalɛ na use ɔmwi. 9Ɔmɛni ɔsu na Lewi kɔdua bekyuli beeebo kadikɔ kadi na kalɔ kammɔ kemmo aani kalɛ na adua akladi bebo kalɛ. Mmomu bana kadikɔ kakya Katɔti bɛkpa kabla kani na baabla kemmo aani kalɛ na Unwoti Katɔti ɔ́su úse.

10Uwi ɔni na kɔmmɔ lɛlɔ ni, lɛ́kya mmɔ emeyi aavlene usien ku ɔƒɛ emeyi aani kalɛ kani na lɛ́kya kudeedi. Na Unwoti únu mina buvele na bina lili. Anwuɔsu na útayila-mii udu. 11Amu na ɔ́su-mi ɔnini, “Ta na atɔnku ƒula bekyuli na betélie kalɔ kani na lɛ́su líse ka meti mete bina bati kuuku mmɔ lɛlɔ.”

Katɔti Ɔɔwia Lɛla Lɛdi Ɔsiku Israelƒuɔ Kudɔ

12Lɛla lɛni na Katɔti ɔɔwia ɔsiku bina kudɔ ndi ka biti ɔbu bite-nwu na bɛsia nwuna ulu ɔni na ɔ́tina-mii na bɛyɔ-nwu ku bina kayi ƒui ku bina kɔyu ƒui. 13Na bɛdi nwuna ɔda bubo bɔni na líti muute-mii mɛni ƒui lɛlɔ. Na si bɛ́bla lɛni ni, lɛla biala lɛdubɔtɛ lite-mii.

14Bɛti nwaa ka ala ani ƒui nkya kayawi kemmo ni, adi bina Unwoti Katɔti adi. Na kayaa ku ala ani ƒui nkya-ka kemmo lɛnɔ adi nwuna adi. 15Nsu ka Unwoti ɔɔyɔ́ bina bati kuuku geen ɔsu na amii kani na úti ɔ́bla nwuna bekyuli. Na bɛmu bɛdi nwuna bekyuli. 16Anwuɔsu bɛda likpidi biala bidie bina kayi kemmo na bɛda atuɔkplu bɔbla bɛya.

17Ɔsika bina Unwoti Katɔti ubo ɔyikun utulo ɔyikun biala na ɔlɛka buti ɔbu bute-nwu geen. Na ɔdi Unwoti ɔni na ulánu anumi taabla lɛla lɛdi na ulabɛ taaƒɔ lɛla lɛdi ukyuli kudɔ. 18Na ɔdi-nwu lɛyɔla ka bekpinebi ku bekpinele baakɛ́ bana kadikɔ. Na ɔɔyɔ́ baƒɔ litemi na uute-ma adila ku adala. 19Anwuɔsu amii lɛnɔ bidie bina bɔyɔ bɛtina baƒɔ bammɔ. Ɔsika amii lɛnɔ bɛ́ɛbla baƒɔ dii na Egyipte kalɔ lɛlɔ. 20Na biti ɔbu bite bina Unwoti Katɔti na bitaakpa anwu lɛti pɛ. Bɛsiaku-nwu kama kpakplaa. 21Biteemwi-nwu uwi ndi uwi, ɔsika ɔdi bina Unwoti Katɔti. Na bina ɔdi biala ɔ́nu ku nwuna lɛnumi ala ebendi ani na ɔ́bla úte-mii ku ani mɔɔda liƒu. 22Uwi ɔni na bina bati kuuku báta bésie Egyipte kalɔ lɛlɔ ni, na bana bumomo bɔbla liti ku aavlanyɔ kani. Nsu ɔƒɛni ni, bina Unwoti Katɔti ɔ́ya na bímomo aani katɔ ayabi.

Currently Selected:

Lɛkpa Ulu 10: lef

Highlight

Copy

Compare