Sofoniyaa̱ 3
3
Jé xí katsꞌén xota̱ na̱xi̱ńdáꞌniú Jerusalee̱n
1¡Xi̱xꞌi̱a̱n xò kuí na̱xi̱ńdáꞌniú xí ndajiín,
ko̱jo xi tsintꞌiéꞌénjiín, ko̱jo xi je kamá ndándií!
2Jmíjín xi ntꞌieé, tsꞌenjóꞌojín nga tjín xí ni botixómaá,
maꞌniátakónjín Néná, ti̱nde tsꞌéntíñajiín yojoo̱ Nee̱.
3Xota̱ xi botixómaá ngamasiee̱n kui na̱xi̱ńdáꞌniuú,
ja̱kon xandi̱je̱ xi ndyi̱ꞌbitsjè má kón,
nendiꞌamasiee̱n ja̱kon cho̱lobo̱ xi bojoó nga jñoó má kón,
kui xi nde ńda ꞌbíndojín nga kamángindyiojoón.
4Jáchji̱ni̱e̱ꞌe̱én jmí kjo̱a̱soboájiín,
kuí boá xi já xí botiñá xotaa̱,
já chináꞌmii̱ je katsꞌén ndándí Ndiꞌandikoón, kó katsjánié kjo̱a̱kitii̱.
5Néná, kui xi kixi̱ ngamasiee̱n kui ngi̱ndiee̱,
jmí ni xi ꞌniú ndajín sa̱ꞌínjín,
ndyiojón ndyiojón xki̱ ta̱jñó ko̱kó kjo̱a̱kixi̱i̱,
jmíni̱xtjin xcha̱jaa̱, ta̱nga xota̱ xi ꞌniú ndajiín jmí kjo̱a̱soboájiín.
6Án boá xi katsꞌenkjié an na̱xi̱ńdaá, kó tarieé jè ixóndó,
jè kjiꞌitiyana ndi̱yàtieé, nga nde ingojín xi kjo̱a̱ꞌa ngase,
jè kjiꞌitiya na̱xi̱ńdáꞌniuú, kó nde ingojín xota̱, ko̱jo tsi ꞌyá xí ki̱a̱ síndo ngase.
7Kó bi̱ kixian an: Nga ja̱koxi̱ ko̱ndakínní ji,
kó si̱ꞌinjo̱ꞌo ji kjo̱a̱chji̱ni̱e̱na.
Kó sa̱ꞌinkjiéjín an ndiꞌa nínga tikón,
ndatsi achichí má ni xi je atixoma an kjo̱a̱a̱ kui,
ta̱nga kui xotaa̱, achichí ta̱jñó katsꞌeén yojoo̱,
tsi̱ꞌe̱ nga chꞌo ngase ni xi katsꞌén.
8Kuíni nga bi̱ tsóni Néná:
Chiyéraní, ngaskande nga kjo̱chó ni̱xtjin nga an ta̱jñó kotijéjnúꞌun,
ngatꞌa̱ jè bo̱a̱ kixian an nga kꞌuitiko án na̱xi̱ńdaá,
kó kꞌuitiko án ngi̱ndie nínga botíxomaa̱,
tsi̱ꞌe̱ nga tsjachjíi̱ nga sa̱ꞌinxchán án,
nga ta̱nisién ꞌniú sa̱ꞌinxchán án,
ngatꞌa̱ ta̱ngatꞌanii̱ ndiꞌií kjo̱a̱chi̱ni̱na nga si̱ꞌankjieni ngayeje tꞌanangii̱.
Néná kꞌo̱xiéꞌá na̱xi̱ńdaá
9Nga kjo̱chó kui ni̱xtjii̱n, sa̱ꞌintsjie an tsꞌoa xota̱ na̱xi̱ńdaá,
tsi̱ꞌe̱ nga ngayejee̱ nga sa̱ꞌinkaxoma jaꞌeén Néná,
kó nga kui sa̱ꞌínseén, nga ta̱ ngo ka̱ma.
10Ndeskande nínga kjin ngasee̱ ndejèꞌ xi chji̱a̱ni nangi Etiopiaa̱,
nga kji̱ndi̱báni xota̱ xi kastsojoboaa̱,
nga ni̱ma̱ ka̱tso̱ nga ku̱i̱chji̱a̱na, kó kji̱ndi̱bájo̱na kjo̱a̱tjó.
11Kui ni̱xtjii̱n soboájín ka̱maa̱ ji, kjo̱a̱a̱ ni xi kiniꞌín ji ni̱xtjin nga kandaꞌyéꞌínjínní,
ngatꞌa̱ kjiꞌa, Án boá xi kjoaꞌaxín an kui xi tsja maa̱ kjo̱a̱a̱ kjo̱a̱nkꞌakòo̱n,
kó nginijánjín nkꞌakon ngase ka̱ma ki̱a̱ na̱xi̱ ndikónna.
12Kósꞌe̱ kꞌuijñá an ngi̱jìi̱n ngo xtín xota̱ na̱xi̱ńdá xí ni̱ma̱,
ko̱jo xi ni̱ma̱kjo̱a̱, kui xi ka̱maꞌniátakón jaꞌeén Néná.
13Xota̱ Israee̱l xi kꞌo̱ngii̱ sa̱ꞌínjín ni xi ta̱nisién ndajín,
ti̱nde jmí kjo̱a̱ndiso ku̱i̱chji̱a̱jín, ti̱nde kꞌo̱ṉcha̱jín,
ngatꞌa̱ xchoón nga ko̱e̱ꞌeé nichinie ko̱jo nga sa̱ꞌínkjaꞌyá,
kó nde jmíjín xi ku̱i̱ndyiándikoón.
Néná sa̱ꞌínkjindibáꞌóyá nginí xota̱ na̱xi̱ńdaá
14¡Ndè jí na̱xi̱ńdáꞌniú Sioo̱n!
¡Cheꞌeyé tsjá ji nangi Israee̱l!
¡Tsjangatamaa̱, kó tsjangatꞌieé ngayeje ini̱ma̱a̱,
ji na̱xi̱ńdáꞌniú Jerusalee̱n!
15Néná jè ijñátꞌaxín kjo̱a̱botíjée̱, jè tsangatji̱ngii̱ kondra̱a̱,
Néná, kui xi ree̱ xota̱ Israee̱l, jè ki̱a̱ tikón ngamasièe̱n.
¡Jmíni̱xtjin ko̱nda̱kin ngase ji ni xi ndajiín!
16Kui ni̱xtjin jàn, bi̱ kꞌuiín na̱xi̱ńdáꞌniú Jerusalee̱n:
¡Na̱xi̱ńdáꞌniú Sioo̱n ngata̱ ndakinjín má ji,
ti̱nde ngata̱ ma indajín ndse̱ ji!
17¡Néná, kui xi Nèe̱, je ki̱a̱ tikón ngamasièe̱n!
¡Kuí boá xi ngo nda̱ chꞌokon xi ꞌboxiéꞌáná!
Achichí tsjá ka̱maa̱ kjo̱a̱a̱ ji, kó xió kꞌuijñá kjo̱a̱a̱ nga tjoó ji,
kó tsja ka̱maa̱ nga si̱é só xi tsjatsó xi niꞌántsjáni.
18Kꞌuindotikó án kui xi kjandá nga kjin síndonii̱ ji,
ngatꞌa̱ jè ngiti̱ boeꞌéndièjiín nga ki̱a̱ kꞌuíndo sꞌué xí niꞌaán,
kó kjoaꞌaxín an kjo̱a̱soboá xi tikónnieé jí.
19Kui ni̱xtjii̱n kjo̱a̱soboá sa̱ꞌinkjaꞌa an ngayeje xi kjo̱a̱ni̱ma̱ katsꞌénkjaꞌaa̱,
ta̱nga kꞌoxiéꞌá an kui xi fíni̱ma̱tꞌaa̱,
kó skjíbé án kui xi ikiyotji̱ngii̱,
kó ki̱a̱ kꞌuindo an xikoó ni xi niꞌándikón,
kó ngachjaninkꞌa jaꞌeén ngayeje ngi̱ndie nínga kjo̱a̱soboá kiniꞌánkjaꞌa.
20Kui ni̱xtjii̱n kjoéꞌe̱jojnúꞌun, kó kꞌuitikójnúꞌun,
kó jún boá xi kjo̱a̱tsja ka̱majnú,
kó chjanínkꞌá jaꞌénjnú ki̱a̱ ngayeje nangi xi tjín nga̱sondiee̱,
kjiꞌanga ngindyikónjnú sa̱ꞌindéjnúꞌun kjo̱a̱a̱ nga kixindyionꞌniújnú. Tsó Néná.
Currently Selected:
Sofoniyaa̱ 3: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
