Sofoniyaa̱ 2
2
Kjo̱a̱botíjé xí sa̱ko̱ó na̱xi̱ńdá xí síndotꞌaa̱
1¡Ngatamatikójnú jún na̱xi̱ńdá xí jmí ni chjíjiín!
2Ngindiee̱ nga ku̱i̱ꞌítsꞌi̱yanii̱ nga ka̱machjínií kjo̱a̱botíxomaa̱ Néná nga xikoó tsi xtjié sa̱ꞌínjo̱ná,
ngindiee̱ nga kji̱ndi̱bániéná ni̱xtjin nga sa̱ꞌínxchán Néná.
3¡Ti̱ndyi̱séjnú Néná, jún xota̱ xi ni̱ma̱kjo̱a̱ xi tindyiónjnú kui nga̱sondiee̱!
Jún xota̱ xi niꞌánkjatjosónjnú kjo̱a̱kitii̱, ti̱ndyi̱séjnú kjo̱a̱kixi̱i̱,
ti̱ndyi̱séjnú kjo̱a̱ni̱ma̱kjo̱a̱a̱,
tsi ta̱ nda ni̱xtjin ka̱ma ku̱i̱ndyionꞌmájnú nga kjo̱chó ni̱xtjii̱n Néná.
4Na̱xi̱ńdáꞌniú Ngasa̱ sꞌi̱jñamasien, na̱xi̱ńdáꞌniú Askaloo̱n sꞌi̱jñatiya,
na̱xi̱ńdáꞌniú Asndoo̱nd ku̱i̱yòtjíngií xotaa̱ nga ka̱ma masien ndisꞌué,
kó na̱xi̱ńdáꞌniuú, xikoó tsi chja̱níyá kjin kjin.
5¡Xi̱xꞌi̱a̱n xò xota̱ xi síndo ki̱a̱ tꞌa ndáchíkoón, ki̱a̱ nangii̱ xota̱ Kretaa̱!
Eén Néná kondra̱ tsa̱jún je tikónni,
ji nangi Kanaa̱n, nangii̱ xota̱ Filisteaa̱,
Án boá xi sa̱ꞌin an nga si̱ꞌankjie kjin kjiin,
kó nde ingojín xota̱ xi kꞌuíndo ngasee̱.
6Kósꞌe̱ ki̱a̱ tꞌa ndáchíkoón ndi̱xcho̱ ka̱ma,
kó kꞌuieé jí ndiꞌaa̱ xota̱ xi koo̱n cho̱tsa̱nga̱a̱,
ko̱jo ti̱ kꞌuieé jí ngi̱ndie nínga kꞌuimá cho̱tsa̱nga̱a̱.
7Kó ki̱a̱ tꞌa ndáchíkoón, ki̱a̱ kꞌuíndo xota̱ xi kꞌo̱ngini ki̱a̱ ndiꞌaa̱ Néná.
Ki̱a̱ ko̱e̱ꞌeé ni xi skji̱ni̱e̱, kó nga ka̱mangixoón ki̱a̱ chjábení ki̱a̱ ndiꞌaa̱ Askaloo̱n,
ngatꞌa̱ Néná, kui xi Nee̱ kui, kjo̱chókatsijee̱n,
kó kuí boá xi sa̱ꞌíndé nga síndoꞌniú.
Én xí kanangiya kondra̱a̱ nangi Moaa̱b ko̱jo nangi Amoo̱n
8Jè tsintꞌie an én chꞌo tsó xi chji̱a̱ xota̱a̱ nangi Moaa̱b,
ko̱jo én xí ndajín xi chji̱a̱ xota̱ tji̱e̱e̱ Amoo̱n xi katsoó xota̱ na̱xi̱ńdána,
ko̱jo kjo̱a̱a̱ nga katsꞌéntsié ngase tꞌanangii̱, kó jaꞌatjoón tsindioó.
9Kuíni nga, tikón án, tsó Néná xí tsi̱ꞌe̱ jájuún, Nee̱ xota̱ Israee̱l,
nga nangi Moaa̱b, bo̱a̱ ka̱maa̱ xikoó na̱xi̱ńdáꞌniú Sondoma̱,
kó xota̱ tji̱e̱e̱ Amoo̱n, bo̱a̱ ka̱maa̱ xikoó na̱xi̱ńdáꞌniú Ngomorra̱,
nga nangi nínga tjín ndaꞌyá, ko̱jo nangi na̱xa̱,
ko̱jo nangi xi kjiꞌitiya ka̱ma, ngatsjéni̱xtjin.
Xota̱ xi kꞌo̱ngii̱ xota̱ na̱xi̱ńdána koótiya kui ngi̱ndiee̱,
kó kui tsi̱ꞌe̱ ka̱ma tꞌanangii̱.
10Kuí boá kui nii̱ xi chjií ka̱ma, kjo̱a̱a̱ nga nkꞌakon kamá,
ngatꞌa̱ nkꞌa kamaá yojoo̱ kondra̱a̱ na̱xi̱ńdaá Néná xí tsi̱ꞌe̱ jájuún.
11Kó Néná achichí nga ndajín sa̱ꞌínjo̱,
ngatꞌa̱ sa̱ꞌinkjié ngayeje ne xi tjín nga̱sondiee̱.
Kó ngayeje na̱xi̱ńdá xí ngasee̱, ki̱a̱ nínga síndo, ki̱a̱ ko̱sieéntikoó Néná.
Én kondra̱ tsi̱ꞌe̱ nangi Etiopiaa̱
12¡Ko̱jo jún nga, xota̱ xi chji̱a̱ni Etiopiaa̱,
ki̱cha̱ndojóna sa̱ꞌinkjiesónnijnúꞌun!
Én kondra̱ tsi̱ꞌe̱ xota̱ Asiriaa̱
13Ti̱ bo̱a̱ ti̱ tsꞌén Néná tsja̱achjií xota̱ xi síndo xtji̱e̱e̱n ta̱ꞌin,
kó sa̱ꞌinkjié xota̱ Asiriaa̱, kó koótiya na̱xi̱ńdáꞌniú Nínibe̱,
kó nangi tsomí ka̱ma, xikoó nangi kixií.
14Kó ki̱a̱ si̱ꞌankjíjin ngamasiee̱n kui ngi̱ndiee̱ xtín cho̱yojoo̱,
ko̱jo ngayeje to̱ko̱ya cho̱ tamá xí tjín ngi̱jin kꞌijñaá,
ki̱a̱ nkꞌaa̱ nga̱ntjo̱a̱a̱ ndiꞌaa̱, ki̱a̱ kꞌuíndo jnoó ko̱jo cho̱ńñoo,
kó nda̱a̱ ki̱a̱ ko̱nda̱ꞌyaá nga̱ntjo̱a̱masienkjaá,
kó ni̱sie kuerboo̱, ki̱a̱ skja̱ndáyà tꞌa nga̱ntjo̱a̱ ndiꞌaa̱,
ngatꞌa̱ sꞌi̱jñatsijen yákón xi kjijon kui ndiꞌaa̱.
15Kuí bí na̱xi̱ńdáꞌniú xí achichí kjo̱a̱tsja kisꞌiee̱, kó jmíjín ni xi nda̱ kamaá,
kui xi bi̱ katsó ngi̱jin ini̱ma̱a̱:
Ta̱ꞌyajínni ngase xi tjín, ta̱ án tsí.
¡Jè achichí ni xi ndajín xi je tjiín,
jè ngi̱ndiee̱ cho̱ tamá jè kamá!
Ta̱ꞌyaní xi ki̱a̱ kjo̱a̱ꞌatꞌaa̱, ku̱i̱ꞌíxo̱bí má nga sa̱ꞌíntíyaá tsja.
Currently Selected:
Sofoniyaa̱ 2: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
