Ajeoo̱ 1
1
Nga kachjaninkꞌa nginí na̱ngo̱xi̱i̱
1Ni̱xtjin tjoón sá xí ma juu̱n, nó xí ma joó nga atíxoma nda̱ re Ndariyoo̱, Néná tsíchji̱a̱jo nga bi̱ katsoó nda̱chji̱ni̱e̱ꞌén Ajeoo̱, tsi̱ꞌe̱ nga ka̱tso̱yaa̱ Sorobabee̱l ndií Salatiee̱l, xtitjón nangi Jundáa̱, ko̱jo Josuee̱ ndií Josandaa̱k, chináꞌmi ngito̱ko̱o̱.
2Bi̱ katsó Ndi̱a̱ná kui xi Néná xí tsi̱ꞌe̱ jájuún nga tsíchji̱a̱:
Bi̱ tsó kui xota̱ na̱xi̱ńdaá:
Kji̱e̱ fochójín ni̱xtjin nga xchjanínkꞌá nginí Ndiꞌana.
3Kósꞌe̱ Ndi̱a̱ná kui xi Néná, ti̱ tsíchji̱a̱jo nginí nda̱chji̱ni̱e̱ꞌén Ajeoo̱, nga bi̱ katsoó:
4Kó a ni̱xtjin nga jún boá nga ka̱ma ku̱i̱ndyionyàjnú ndiꞌa xi tsjakon,
tji̱e̱nga Ndiꞌana je tsixóndó.
5Ja̱ ngotꞌe̱ ꞌne̱, bi̱ tsó Ndi̱a̱ná kui xi Néná xí tsi̱ꞌe̱ jájuún:
Nda má ti̱ꞌankjójnú ni xi ndyi̱niꞌánjnú,
6ngatꞌa̱ jún, achichí tsie ni tjié ꞌbítji̱e̱jnú,
ta̱nga chiboá tsí má ni xi chjaꞌátikójnú.
Chiniejnú nichinie, ta̱nga tsiejínjnú.
ꞌYójnú niꞌyó, ta̱nga xixiójín xíndájnú.
Chajájnú ńjño, ta̱nga ma asojínjnú.
Kó xota̱ xi tsꞌén xá ni̱xtjii̱n, fochóꞌajiín to̱n xi tsꞌén.
7Bi̱ tsó Ndi̱a̱ná kui xi Néná xí tsi̱ꞌe̱ jájuún:
Nda má ti̱ꞌankjójnú ni xi ndyi̱niꞌánjnú.
8Tangínnijíngijnú na̱xi̱i̱, kó ndibájo̱jnú yá xí xchjanínkꞌani Ndiꞌana,
kó An sa̱ꞌinjo̱ꞌo An, kó ki̱a̱ koko An kjo̱a̱jena. Tsó Ndi̱a̱ná kui xi Néná.
9Achichí ni xi mindyiséjnú, kó chiboá tsí má ni xi sakójnú.
Ni xi chjaꞌátjójnú ngi̱ya ndiꞌaa̱, An botitsojó ngiñá An.
Míkjo̱a̱a̱ nga bo̱a̱ tsꞌen An. Tsó Ndi̱a̱ná kui xi Néná xí tsi̱ꞌe̱ jájuún.
Ngatꞌa̱ ndiꞌana je ixóndó,
tji̱e̱nga nga ngo nga ngo jún ndiꞌajnú boá xi nda̱ kjimajnú.
10Kuíni nga, ta̱ngatꞌanii̱ jún nga nkꞌajmii̱ ngiti̱ mejénjiín tsꞌénkáꞌá stseé,
kó tꞌanangii̱ ngiti̱ mejénjiín tsjá ni xi maxchá.
11Kó Án boá xi je jéꞌe̱jo An sibeé tsi̱ꞌe̱ nga sꞌi̱jña kixí tꞌanangii̱, ko̱jo na̱xi̱i̱,
ko̱jo xka̱a̱ to ndso̱ko̱a̱n ṉño̱paa̱n, ko̱jo binoo̱, ko̱jo istii̱,
ko̱jo ngayeje ni xi maxchá tꞌanangii̱, ko̱jo ngayeje xota̱,
ko̱jo ngayeje cho̱, ko̱jo ngayeje xá xí niꞌaán.
12Kó Sorobabee̱l ndií Salatiee̱l, ko̱jo Josuee̱ ndií Josandaa̱k, kui xi chináꞌmii̱ ngito̱ko̱o̱ kamá, ko̱jo ngayeje xota̱ xi ngasee̱, tsintꞌiéꞌeén Ndi̱a̱ná kui xi Néná, kjo̱a̱a̱ kui én xí tsíchji̱a̱ nda̱chji̱ni̱e̱ꞌén Ajeoo̱, xikó má tsꞌén atíxoma Ndi̱a̱ná kui xi Néná, kui xi Nee̱ ndatsa kui nga. Kó xota̱ na̱xi̱ńdaá kitsjiendikón ngindyi̱ko̱n Ndi̱a̱ná kui xi Néná. 13Kósꞌe̱ Ajeoo̱, kui nda̱ xi katsangiya Ndi̱a̱ná kui xi Néná, tsíchji̱a̱jo xota̱ na̱xi̱ńdaá ni xi atíxoma Ndi̱a̱ná kui xi Néná, nga bi̱ katsoó:
Ki̱a̱ tikónjo̱jnúꞌun. Tsó Ndi̱a̱ná kui xi Néná.
14Kó Néná katsjangaꞌniuú a̱si̱énni̱xtjii̱n Sorobabee̱l ndií Salatiee̱l, xtitjoón nangi Jundáa̱, ko̱jo a̱si̱énni̱xtjii̱n Josuee̱, chináꞌmi ngito̱ko̱o̱, kui xi ndií Josandaa̱k kamá, ko̱jo a̱si̱énni̱xtjii̱n ngayeje xota̱ na̱xi̱ńdá xí ngasee̱, kó kui xotaa̱ kijí, kó ítsꞌi̱yanii̱ nga katsꞌén kui xaá ki̱a̱ Ndiꞌaa̱ Nee̱, kui xi Ndi̱a̱ná kui xi Néná xí tsi̱ꞌe̱ jájuún. 15Ni̱xtjin kan nijoón sá xi ma juu̱n, nó xí ma joó nga atíxoma nda̱ re Ndariyoo̱ má nga bo̱a̱ kamá.
Currently Selected:
Ajeoo̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
