Sofoniyaa̱ 1
1
Ni̱xtjin nga katsꞌénxchán Néná
1Kuí bí én xí Néná katsóyaà Sofoniyaa̱ ndií Kusii̱, ndíndeè Jendalíyaa̱, ndínde xi ma joó Amariyaa̱, ndínde xi ma jaán Esekiyaa̱, ni̱xtjin nga Josiyaa̱ ndií Amoo̱n, kamá ree̱ nangi Jundáa̱.
Néná sa̱ꞌínkjié nangi Jundáa̱
2Ngayeje ni xi tjín nga̱són tꞌanangii̱, xi sa̱ꞌinkjié ndo̱jò ndójo̱ án, tsó Néná:
3Sa̱ꞌinkjié an xotaa̱, ko̱jo cho̱ tamaá,
sa̱ꞌinkjié an ni̱sie xi tjín nkꞌa jàn,
ko̱jo tji̱o̱ xi tjín ngi̱jin ndáchíkoón,
ko̱jo kui xota̱ xi achichí nga ndajiín,
ko̱jo xi ta̱ngatꞌanii̱ kui nga stingí kje̱ꞌe xota̱,
kó sa̱ꞌin an nga xcha̱ja kjin xota̱ nga̱sondiee̱ nga̱són tꞌanangii̱. Tsó Néná.
4Kuí má xota̱a̱ nangi Jundáa̱, ko̱jo xota̱a̱ na̱xi̱ńdáꞌniú Jerusalee̱n xi tsjachjíi̱,
kó kjoaꞌaxín kjin an ni xi síndo ngase xi tsi̱ꞌe̱ ne Baa̱l,
ko̱jo jaꞌeén chináꞌmi xi katsꞌénxátꞌaa̱ kui nee̱,
5ko̱jo xota̱ xi asieéntikoó ki̱a̱ nkꞌaa̱ ndiꞌa
nínga katsꞌéndikón jájún xi chji̱a̱ni ndiꞌakꞌajmii̱.
Ko̱jo xota̱ xi bosiéntikoó nga jaꞌeén Néná tsꞌénkjién nga tsjá tsꞌoa,
kó ti̱ kjiꞌa tsjá tsꞌoa kjo̱a̱a̱ ne Moloo̱k nga,
6ko̱jo xota̱ xi je katsꞌénkjii̱n yojoo̱ nga kijítji̱ngii̱ Néná,
ko̱jo xota̱ xi mongasejín Néná, ti̱nde jmí ni bosíyàjiín.
7¡Xió ti̱ndyiónjnú ngindyi̱ko̱n Ndi̱a̱ná kui xi Néná!
Ni̱xtjii̱n Néná jè tikón tiña.
Néná jè tikóndaa̱ ngo kjo̱a̱tjó, tsi̱ꞌe̱ xota̱ xi kui je jaꞌájin nga katsóyaà.
8Ni̱xtjin nga si̱ꞌan kui kjo̱a̱tjoó, An sa̱ꞌinjée̱ xota̱ xi ngito̱ko̱o̱,
ko̱jo ndií já ree̱, ko̱jo ngayeje xota̱ xi ńjño xi xín nangi chji̱a̱ni ndyi̱yajá.
9Kó kui ni̱xtjii̱n ti̱ sa̱ꞌinjée̱ ngayeje xi kjítjé nga̱ntjo̱a̱a̱ Ndiꞌaa̱ Néná,
kó ꞌbikítsie maá ni chejé, ko̱jo ni ndiso ndiꞌaa̱ ndi̱a̱a̱.
10Kui ni̱xtjii̱n, tsó Néná, ko̱nda̱ꞌyá ngo nda̱ xi ni̱ma̱ ka̱tso̱ ndeskande nínga ꞌmí Nga̱ntjo̱a̱a̱ Tji̱o̱o̱,
ko̱jo xi skja̱ndáyaboa ndeskande nga̱ntjo̱a̱ xi ma joó,
kó achichí ꞌniú ni̱ma̱ ka̱tso̱ nda̱ xi ko̱ndaꞌyáni ki̱a̱ nínga tji̱ngi̱i̱.
11¡Ni̱ma̱ tꞌínjnú jún xota̱ xi chji̱a̱ni ki̱a̱ na̱xi̱ńdáꞌniú Maktee̱,
ngatꞌa̱ ngayeje nangii̱ nga xota̱ xi botiñá nii̱ je kiniꞌánkjié!
Ngayeje xota̱ xi tsie to̱n ndyi̱yaꞌaa̱ je kiniꞌánkjiesón.
12Kui ni̱xtjin jàn ndiꞌí foko̱ má sa̱ꞌinkjièn án nga skotsijèe̱n na̱xi̱ńdáꞌniú Jerusalee̱n,
kó kotijée̱ kui xi xioó síndoo̱, kui xi bo̱a̱ kon xikó maá bino̱ xi ꞌbíjñá nga niꞌánxaán,
kui xi bi̱ tsó nga chji̱a̱ ngi̱jin ini̱ma̱a̱: Néná jmí ni xi nda, ko̱jo tsi ni xi ndajín sa̱ꞌínjín.
13Kuíni nga kjo̱a̱cho̱n xi tjiín chja̱ꞌáxiín,
kó ndiꞌaa̱ kjotíyà. Sa̱ꞌínda ndiꞌa, ta̱nga ki̱a̱jín kꞌuíndoꞌyà,
ku̱i̱ꞌítji̱e̱ tostsi̱je̱è, ta̱nga kꞌuíjín bino̱ xi tsja̱a kuí too̱.
14¡Jè kjima tiña ni̱xtjin jee̱ Néná!
Jè tsá, ko̱jo jè tiña tikón nga ka̱ma,
xikoó tsi sa ka̱ma nga ko̱nda̱ꞌyá nda̱ xi kjo̱ni̱e̱ ni̱xtjii̱n Néná,
kó ngaskande nda̱ xi chꞌokoo̱n skja̱ndáyà nga ku̱i̱ꞌa nga ko̱siko̱jo.
15Ni̱xtjin nga kꞌuié kjo̱a̱xti boá kui ni̱xtjii̱n,
ni̱xtjin nga kꞌuié kjo̱a̱ni̱ma̱, ko̱jo nga nda̱ ka̱maa̱ xotaa̱,
ni̱xtjin nga si̱ꞌankjie ko̱jo sꞌi̱tiya boá,
ni̱xtjin nga jñó ko̱jo nga ni̱xtji̱e̱n boá,
ni̱xtjin nga sꞌi̱jñó ko̱jo nga chꞌànꞌásien ka̱ma,
16ni̱xtjin nga kjo̱ni̱e̱ tjioo̱, ko̱jo nga kꞌuiyaá xotaa̱ boá,
kui xi ka̱ma ki̱a̱ nínga tikón ngamasiee̱n na̱xi̱ńdáꞌniuú,
ko̱jo nínga síndo tarié xi nkꞌa ngasee̱.
17Án boá xi sa̱ꞌin an nga xota̱ nga̱sondiee̱ nda̱ ka̱maa̱,
ko̱jo nga kꞌuitsómá xikoó tsi xota̱ xi ti̱ka̱,
ngatꞌa̱ katsꞌénjé kondra̱a̱ Néná, kó jiín xtjón xikó maá xa̱,
kó tsiꞌee̱ xtjón xikó maá yeꞌe.
18Ti̱nde to̱ntiboaa̱, ti̱nde to̱nsinieé ka̱májiín kꞌo̱xiéꞌá xotaa̱ ni̱xtjin nga sa̱ꞌínxchán Néná,
kjiꞌanga ndiꞌií kjo̱a̱chi̱ni̱i̱ boá xí sa̱ꞌínkjién nga sa̱ꞌínkjié tꞌanangii̱, ngatꞌa̱ nga ja̱koxi̱,
¡ta̱niján má sa̱ꞌínkjié ngayeje xota̱ xi síndo nga̱sondiee̱!
Currently Selected:
Sofoniyaa̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
