Sakariyaa̱ 7
7
Ni xi mejeén Néná, kjo̱a̱a̱ xota̱ na̱xi̱ńdaá
1Ni̱xtjin xi ma nijoón, sá xí ma nijaa̱n, kui xi Kisleu̱ kiꞌmí, nó xí ma nijoón nga atíxoma nda̱ re Ndariyoo̱, Néná tsíchji̱a̱jo nginí Sakariyaa̱. 2Xota̱ na̱xi̱ńdá Betee̱l ja̱bo̱a̱ jè katsangiya Saresee̱r, ko̱jo Rengee̱n Melee̱k ko̱jo xota̱a̱, tsi̱ꞌe̱ nga ꞌniú tsíꞌaá Néná, 3ko̱jo nga tsíchji̱a̱jo já chináꞌmi xi síndo Ndiꞌaa̱ Néná xí tsi̱ꞌe̱ jájuún, ko̱jo jáchji̱ni̱e̱ꞌe̱én Néná, nga bi̱ katsoó: A to̱kó xchaꞌájne̱ kui sá xí ma oón, ko̱jo nga ku̱i̱ndyionxónjne̱ xikó ndyi̱niꞌánjne̱ je kjín nó. 4Kósꞌe̱ kjiꞌá boá nga Néná xí tsi̱ꞌe̱ jájuún, tsíchji̱a̱jona nga bi̱ katsóna: 5Ndókjo̱e̱je ji ngayeje xota̱ na̱xi̱ńdá xí chji̱a̱ni kui ngi̱ndiee̱, ko̱jo já chináꞌmii̱, kó bi̱ tꞌíi̱n:
Kjiꞌanga kiniꞌánkjaꞌajnú kjindiá yojojnú,
ko̱jo nga kixindyion xa̱ꞌya̱jnú sá xí ma oón,
ko̱jo sá xí ma yitoo̱, kui xi ichítié ko̱jo tie nó nga bo̱a̱ kiniꞌánjnú,
a ta̱ngatꞌanii̱ an nga bo̱a̱ kiniꞌánjnú.
6Kó kjiꞌanga kichinie ko̱jo nga kiꞌyójnú,
a ta̱ngatꞌajínnií jún nga bo̱a̱ kiniꞌánjnú.
7A kuijín kuí eén xi tsíchji̱a̱ Néná nga katsꞌénkjién jáchji̱ni̱e̱ꞌe̱én,
kjiꞌanga ki̱a̱ na̱xi̱ńdáꞌniú Jerusale̱n, ko̱jo na̱xi̱ńdá xi síndotꞌaa̱,
ko̱jo nangi Nengee̱b, ko̱jo nangi Sefela̱, kisꞌiee̱ kjo̱a̱xió xotaa̱.
8Néná ingo ndi̱yà akó nginií ngo ni nga tsíchji̱a̱jo Sakariyaa̱, nga bi̱ katsoó:
9Bi̱ tsó Néná xí tsi̱ꞌe̱ jájuún:
Nda ti̱ꞌansénjnúu̱ nga si̱ꞌandajinjnú kjo̱a̱xti xi kꞌuieé xotaa̱ xikó kjiꞌi ni xi ja̱koxi̱i̱,
ngatꞌiéjnú kjo̱a̱ni̱ma̱takón kjo̱a̱a̱ nga ngo nga ngo xota̱ xingi̱jnú.
10Ngata̱ jmí kjo̱a̱ꞌniú niꞌánjínjnúu̱ ínchjín kꞌán xi je kꞌien xi̱ꞌii̱n,
ko̱jo xota̱ xi je xꞌi̱a̱a̱n, ko̱jo xota̱ xi xín nangi chji̱a̱ni,
ko̱jo xota̱ xi ni̱ma̱ nga jmí to̱njiín,
ti̱nde ngata̱ niꞌánkjójínjnú nga ni xi ndajín si̱ꞌanjo̱jnú ntsꞌiejnú.
11Ta̱nga kamámejénjiín tsintꞌié, ta̱sá katsꞌénkꞌafóyá, kó íchjá tji̱bo̱a̱nijon, tsi̱ꞌe̱ nga tsintꞌiéjín ni xi kiꞌmií, 12kó katsꞌén tajá ini̱ma̱a̱ xikó maá ndi̱jo̱ ndiamantee̱, tsi̱ꞌe̱ nga tsintꞌiéjín ni xi akakoyaá, ko̱jo én xí Néná xí tsi̱ꞌe̱ jájuún, katsangiyajo̱ A̱si̱énni̱xtjii̱n nga katsꞌénkíchji̱a̱ jáchji̱ni̱e̱ꞌén xchaá. Kuíni nga achichí ꞌniú katsꞌénxchánní Néná xí tsi̱ꞌe̱ jájuún kjo̱a̱a̱ kui nii̱. 13Kó xikótsꞌèn nga Néná tsíchji̱a̱, kó kui xotaa̱ katsꞌénsénjín, kósꞌe̱ kjiꞌanga kui xotaa̱ tsíchji̱a̱na, An tsintꞌiejáa̱n. Tsó Néná xí tsi̱ꞌe̱ jájuún.
14Kó ta̱sá ngo ndyíkí katsꞌenkjién án nga katsꞌentsojoboa an ngayeje na̱xi̱ńdá xi nde bejín kuí. Kó kisꞌietiya kui tꞌanangii̱ ngije xín kijí, kó nde ingojín xi jaꞌa kui ngi̱ndiee̱, ngatꞌa̱ kisꞌietiya nga katsꞌénkjatsón kuí ngi̱ndie xi achichí tsjachoo̱n.
Currently Selected:
Sakariyaa̱ 7: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
