Sakariyaa̱ 8
8
Néná sa̱ꞌínchikonñé xota̱ na̱xi̱ńdaá
1Ingo ndi̱yà nginí nga Néná xí tsi̱ꞌe̱ jájuún tsíchji̱a̱jona, nga bi̱ katsó:
2Bi̱ tsó Néná xí tsi̱ꞌe̱ jájuún:
¡Achichí chi̱ni̱ kamá an kjo̱a̱a̱ na̱xi̱ńdáꞌniú Sioo̱n!
¡Ngo kjo̱a̱chi̱ni̱ xi achichí ꞌniú kisꞌiena!
3Bi̱ tsó Néná: Sa̱ꞌindaya ngiñá an na̱xi̱ńdáꞌniú Sioo̱n,
kó ki̱a̱ kotíjña̱jìi̱n ngamasiee̱n na̱xi̱ńdáꞌniú Jerusalee̱n.
Na̱xi̱ńdáꞌniú Jerusalee̱n, kuí boá xi Na̱xi̱ńdáꞌniú xí Ja̱koxi̱ kꞌuín,
kó na̱xi̱i̱ Néná xí tsi̱ꞌe̱ jájuún, Na̱xi̱ xi Tsjie kꞌuiín.
4Bi̱ tsó Néná xí tsi̱ꞌe̱ jájuún:
To̱kó kꞌuíndora xota̱ xi xchá xí chjo̱on xí xi̱ꞌin ki̱a̱ ndi̱tse̱e̱n na̱xi̱ńdáꞌniú Jerusalee̱n,
kó nga ngo nga ngo kjín nó ka̱maa̱ nga kjoyátsjara yánísieé.
5Kó ndi̱yàtieé na̱xi̱ńdáꞌniuú sꞌi̱kitsiera jákjíndí xíꞌín ko̱jo jákjíndí ínchjín, xi stsáton ki̱a̱ ndi̱tse̱e̱n.
6Bi̱ tsó Néná xí tsi̱ꞌe̱ jájuún:
Ndatsi kui ni̱xtjii̱n ko̱e̱je̱ndikoón xota̱ xi kꞌo̱ngi ngasee̱ kui na̱xi̱ńdaá nga sku̱i̱e̱.
A ti̱ ko̱e̱je̱ndikónna nga skuie an kui nii̱ ndatsa an nga. Tsó Néná xí tsi̱ꞌe̱ jájuún.
7Bi̱ tsó Néná xí tsi̱ꞌe̱ jájuún:
Ngotꞌe̱ ꞌne̱, án boá xi kꞌo̱xiéꞌá an xota̱ na̱xi̱ńdána,
xi síndo kui tꞌanangi xtji̱e̱e̱n nínga fotjo tsꞌueé,
ko̱jo xi síndo kui tꞌanangi nínga ꞌbosꞌien tsꞌueé,
8kó ki̱a̱ kjuínjo̱ an, tsi̱ꞌe̱ nga ki̱a̱ kꞌuíndo ngi̱yaa̱ na̱xi̱ńdáꞌniú Jerusalee̱n,
kó kuí boá xi ka̱ma xota̱ na̱xi̱ńdána, kó Án boá xi ka̱ma an Nee̱ kui,
kjo̱a̱a̱ ni xi ja̱koxi̱i̱ ko̱jo ni xi kjo̱a̱kixi̱i̱.
9Bi̱ tsó Néná xí tsi̱ꞌe̱ jájuún:
Ti̱ꞌangaꞌniújnú nga sa̱ꞌínxá ndsa̱jnú,
jún xi kui ni̱xtjii̱n ndyi̱ndaꞌyájnú kui én xí chji̱a̱ jáchji̱ni̱e̱ꞌe̱én Néná,
ndeskande koó nga kixindyia xó xí ꞌbítjatsꞌennii̱ Ndiꞌaa̱ Néná xí tsi̱ꞌe̱ jájuún,
tsi̱ꞌe̱ nga ka̱manda nginí.
10Ngatꞌa̱ ngindiee̱ kui ni̱xtjii̱n, jmíjín xi íchjií nga katsꞌénxá já xíꞌiín,
ti̱nde kamáchjíjín kjo̱a̱a̱ cho̱ xi katsꞌénxaá nga,
ti̱nde jmíjín kótsꞌèn nga nda kisꞌińdoni xotaa̱,
ta̱ngatꞌanii̱ nga kisꞌiee̱ kjo̱a̱ꞌontakón,
ngatꞌa̱ ti̱ Ánní xi kondra̱ indoñáa̱ xkjín.
11Ta̱nga ngotꞌe̱ ꞌne̱, jmí tsi bo̱a̱ tsꞌén sa̱ꞌinjo̱ an xota̱ xi kꞌo̱ngii̱ kui xota̱ na̱xi̱ńdaá,
xikó katsꞌenjo̱ an ni̱xtjin xi je jaꞌaa̱. Tsó Néná xí tsi̱ꞌe̱ jájuún.
12Ngatꞌa̱ sꞌe̱ kꞌuié ngo tji̱e̱e̱ xota̱ xi kꞌuieé kjo̱a̱xió.
Ńꞌniuú tostsi̱je̱è tsja̱a to, kó tꞌanangii̱ tsja̱a ni xi maxchaá,
kó nkꞌajmii̱ tsja̱a xoño, kó Án boá xi sa̱ꞌin an nga xota̱ xi kꞌo̱ngii̱ kui xota̱ na̱xi̱ńdaá,
kꞌuieé ngayeje kui nii̱.
13Kó xikótsꞌèn nga ni xi ndajín ngi̱jii̱n na̱xi̱ńdaá kamájnú jún,
jún xi xota̱ tji̱e̱e̱ Jundáa̱, ko̱jo xota̱ tji̱e̱e̱ Israee̱l,
ti̱ bo̱a̱ ti̱ tsꞌén kꞌoxiéꞌájnúꞌun tsi̱ꞌe̱ nga jún xi ka̱majnú ngo kjo̱a̱niꞌánchikonñé.
¡Ngata̱ ndakonjínmájnú, kó ti̱ꞌangaꞌniújnú nga si̱ꞌankjiénjnú ndsa̱jnú!
14Ngatꞌa̱ bi̱ tsó Néná xí tsi̱ꞌe̱ jájuún:
Xikó má tsꞌén kamámejénna nga ndajín sa̱ꞌinjo̱jnúꞌun,
kjiꞌanga xota̱ xi xchájnú katsꞌénxtína, tsó Néná xí tsi̱ꞌe̱ jájuún,
kó asikjojín an ni xi katsꞌenkjó Án.
15Bo̱a̱ tsꞌén je tjíndana kui ni̱xtjii̱n nga sa̱ꞌin ngiñá an ni xi nda ngandaa̱ na̱xi̱ńdáꞌniú Jerusalee̱n,
ko̱jo xota̱ tji̱e̱e̱ Jundáa̱. ¡Ngata̱ ndakonjínmájnú!
16Kuí bí kui nii̱ xi chjiéngá si̱ꞌánjnú:
Ni xi ja̱koxi̱ boá xi ndókjo̱a̱jojnú xota̱ xingi̱jnú.
Ni xi kixi̱i̱ ti̱ꞌankjiénjnú kjiꞌanga si̱ꞌanjéjnúu̱ ngo xota̱
ki̱a̱ nga̱ntjo̱a̱a̱ na̱xi̱ńdáꞌniuú, tsi̱ꞌe̱ nga kꞌuié kjo̱a̱xió.
17Ngata̱ ngojín jún xi ni xi ndajín niꞌánkjójnú kondraa̱ xota̱ xingi̱jnú,
ngata̱ niꞌántjójínjnú ni xi ngiboanéná tsó xotaa̱,
kó kjo̱a̱ndiso boá, ngatꞌa̱ ngayeje kui nii̱ xi chꞌóna. Tsó Néná.
18Kó tsíchji̱a̱jo nginína Néná xí tsi̱ꞌe̱ jájuún, kó bi̱ katsóna:
19Bi̱ tsó Néná xí tsi̱ꞌe̱ jájuún:
Kjindiá xí si̱ꞌánjnú xi ma nijoón saá,
ko̱jo xi ma uún, ko̱jo xi ma yitoo̱, ko̱jo xi ma tiee̱,
kuí boá xi kjo̱a̱tsjajnú ka̱majnú,
ko̱jo kui sꞌué xí tsꞌén xota̱ tji̱e̱e̱ Jundáa̱.
Ja̱ ti̱ꞌantjójnú ja̱koxi̱i̱ ko̱jo kjo̱a̱xioó.
20Bi̱ tsó Néná xí tsi̱ꞌe̱ jájuún:
To̱kó sꞌe̱ ndibá ngase xota̱ na̱xi̱ńdá xí chji̱a̱ni kjín na̱xi̱ńdáꞌniú,
21kó kui xotaa̱, ja̱kꞌi̱e̱ ja̱ngaján na̱xi̱ńdáꞌniú ko̱e̱je̱ nga bi̱ ka̱tso̱:
¡Tjiàn, kó si̱ꞌán nga xió kꞌuijñá Néná ko̱jo nga ku̱i̱ndyi̱sé kuí Néná xí tsi̱ꞌe̱ jájuún!
¡Ko̱jo an kjuín án nga!
22Kó achichí ka̱ma xota̱a̱ nangii̱,
ko̱jo xota̱a̱ na̱xi̱ńdá xí tjiín ngaꞌniú xí kji̱ndi̱bákoón Néná xí tsi̱ꞌe̱ jájuún,
ki̱a̱ na̱xi̱ńdáꞌniú Jerusale̱n, tsi̱ꞌe̱ nga ku̱i̱ꞌaa̱ kjo̱a̱nda Néná.
23Bi̱ tsó Néná xí tsi̱ꞌe̱ jájuún:
Kui ni̱xtjin jàn, tie jáxíꞌín xi chji̱a̱ni ngayeje na̱xi̱ńdá ko̱jo én,
skjíbéní ńjñoo̱ ngo nda̱ jundíoo̱, xi bi̱ ka̱tso̱o̱:
¡Te̱ꞌéndièjne̱ nga kongínjo̱jne̱ jún,
ngatꞌa̱ jè yajne̱ nga Néná boá xi tikónjo̱jnú jún!
Currently Selected:
Sakariyaa̱ 8: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
