Sakariyaa̱ 6
6
Nga nijón karro̱ tsi̱ꞌe̱ kjo̱a̱xcha̱án
1Ti̱ iskjininkꞌa ngiñá an kje̱n án, kó askotsijen an, sꞌe̱ kamábe an nijón karro̱ xi ndyi̱fotjoni ngi̱jii̱n jó na̱xi̱, kó kui na̱xi̱i̱ ki̱cha̱ bronse̱ kamándani. 2Kui karro̱ xi tjoón ndi̱je̱ iní boá xi ndyi̱kjien, karro̱ xi ma joó, ndi̱je̱ jmá boá xi ndyi̱kjien, 3karro̱ xi ma jaán, ndi̱je̱ tiboa boá xi ndyi̱kjien, kó karro̱ xi ma nijoón, ndi̱je̱ indó chjanga boá xi ndyi̱kjien. 4Kó bi̱ kixiáa̱n kui ndítsjie xi tsꞌénchji̱a̱jona:
—Ji ndi̱a̱, mí nii̱ bo̱a̱ xi̱ꞌbi̱.
5Kó kui ndítsjiee̱, bi̱ katsóna:
—Kuí bí kui nii̱ xi nga nijón tjo̱o̱ nkꞌajmii̱, kui xi fotjo jaskan ngije fochó ngindyi̱ko̱n Néná xí tsi̱ꞌe̱ ngayeje nga̱sondiee̱. 6Kui karro̱ xi ndyi̱kjien ndi̱je̱ jmaá, kuí boá xi fotjo xtji̱e̱e̱n ta̱ꞌii̱n nga̱sondiee̱, kó kui karro̱ xi ndyi̱kjien ndi̱je̱ tiboaa̱, ki̱a̱ fítji̱ngii̱ kui xi tjoón, kó kui karro̱ xi ndyi̱kjien ndi̱je̱ xi indó chjangaa̱, ki̱a̱ fotjo xtji̱e̱e̱n na̱ngii̱ nga̱sondiee̱.
7Kó kui ndi̱je̱ xi indó chjangaa̱, achichí ni xi kjimaa̱ nga je ko̱e̱je̱ ngayeje nga̱sondiee̱. Kó kui ndítsjiee̱, bi̱ katsoó:
—¡Tangínjnú ngayeje tꞌanangii̱! Kó jaskan kijí ja̱kꞌi̱e̱ ja̱ngaján ngayeje tꞌanangii̱. 8Sꞌe̱ kui ndítsjiee̱ tsíchji̱a̱na, kó bi̱ katsóna:
—Jéꞌe̱n, kui xi ndyi̱fí xtji̱e̱e̱n nínga ta̱ꞌii̱n kui nga̱sondiee̱, kuí boá xi sa̱ꞌín nga sa̱ꞌínkjaꞌyá A̱si̱énni̱xtjinna ki̱a̱ xtji̱e̱e̱n ta̱ꞌii̱n nga̱sondiee̱.
Josuee̱ kiniꞌánkꞌasꞌiee̱n ngo korona̱
9Néná ingo ndi̱yà akó nginína ngo ni, nga bi̱ katsóna:
10Chje̱ꞌétikí jí chji̱e̱, tsi̱ꞌe̱ xota̱ xi je kjindibáꞌoyá nginí nga jatjoni nangi Babiloniaa̱, kui xi chji̱a̱ni Elndai̱, ko̱jo Tobií, ko̱jo Jendaiyaa̱, kó ti̱kuii ni̱xtjin tꞌen ji, kó ti̱tjásꞌi̱n ji ndiꞌaa̱ Josiyaa̱ ndií Sofoniyaa̱. 11Kó chjábé jí to̱ntiboaa̱ ko̱jo to̱nsinieé, sꞌe̱ ti̱ꞌinde ji ngo korona̱ xi je, kó to̱ko̱ Josuee̱ ndií Josandaa̱k tꞌíꞌé ji, kui nda̱ xi chináꞌmi ngito̱ko̱o̱. 12Kó bi̱ tꞌíi̱n: Bi̱ tsó Néná xí tsi̱ꞌe̱ jájuún:
Kui nda̱ xi ꞌYo̱ tjítꞌa jaꞌeén, kꞌuieé ja̱ma̱,
kó kuí boá xi sa̱ꞌínda na̱ngo̱xi̱i̱ Néná.
13Jo̱o̱n, kuí boá xi skjinínkꞌá na̱ngo̱xi̱i̱ Néná,
kó kꞌuieé kjo̱a̱je, kó ki̱a̱ kꞌuijñá,
kó ki̱a̱ ko̱tíxoma ki̱a̱ yáxíríe̱ ndikoón,
kó kuí boá xi chináꞌmi ka̱ma nga ko̱tíxoma,
kó ku̱i̱ꞌínda nga kꞌuieé kjo̱a̱xió ngajó xá xí tsꞌén.
14Kó kui korona̱ xi jee̱, kuí boá xi ngo kjo̱a̱foaꞌátsjien ka̱maa̱ Elee̱n, ko̱jo Tobií, ko̱jo Jendaiyaa̱, ko̱jo Ee̱n ndií Sofoniyaa̱ ki̱a̱ na̱ngo̱xi̱i̱ Néná.
15Kó xota̱ xi kjin síndoo̱, kji̱ndi̱bá tsꞌénda na̱ngo̱xi̱i̱ Néná, kó kjiꞌá boá nga xche̱ ji nga Néná xí tsi̱ꞌe̱ jájuún boá xi katsangiyakonna jún. Bo̱a̱ ka̱ma, tsi kꞌuieé kjo̱a̱kjínkón nga si̱ꞌinkjatjosén ji nda̱a̱ Néná, kui xi Nejnú má.
Currently Selected:
Sakariyaa̱ 6: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
