Xota̱ Roma̱ 1

Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Roma̱

1Tsꞌentíndejnú Pabloo̱, nda̱ xi Néná tsíchji̱a̱a̱ nga katsjáxaá tsi̱ꞌe̱ nga apostro̱#1:1 “Xi kanangiyaa̱” tsó “nda̱ apostro̱” axa̱ “já apostro̱” nga én ngriengo̱. ka̱ma an, kó íjñátꞌaxínna, tsi̱ꞌe̱ nga kꞌuini̱jmì án éntjatsi̱e̱e̱ Néná.

2Kuí eén xi katsóyàtjón Néná nga tsja̱á nga katsꞌénkíchji̱a̱ jáchji̱ni̱e̱ꞌe̱én xikótsꞌèn tjítꞌa xo̱jo̱n én tsjiee̱ Néná. 3Kuí eén xi chji̱a̱ kjo̱a̱a̱ ndií, kui xi Ndi̱a̱ná Jesukristoo̱. Kui xi xota̱ tji̱e̱e̱ Ndabii̱ kjindibáni nga katsen xikoó ñá. 4Ta̱nga nga jaꞌáꞌyaá Jesukristoo̱ ngi̱jii̱n xota̱ xi je jesoón, ta̱ngatꞌanií A̱si̱énni̱xtjii̱n Néná, kó akó nga ja̱koxi̱ nga kui xi ndií Néná xí tjiín ngaꞌniuú. 5Ta̱ngatꞌaa̱ Jesukristoo̱ nga Néná katsjána kjo̱a̱ndaa̱, ko̱jo nga apostroo̱ kamá an, kó katsangiyana tsi̱ꞌe̱ nga ta̱jñàní kꞌuini̱jmìi̱ xotaa̱, tsi̱ꞌe̱ nga sꞌi̱jii̱n ko̱jo ku̱i̱ntꞌiéꞌeén Ndi̱a̱ná. 6Kó ngi̱jii̱n kui xotaa̱ tindyionjinjnú jún. Ndi̱a̱ná Jesukristoo̱ boá xi tsíchji̱a̱jnú tsi̱ꞌe̱ nga xota̱ tsi̱ꞌe̱ ka̱majnú.

7Ngayejejnú xi tindyiónjnú na̱xi̱ńdá Roma̱, tsꞌéntsangiyajnúꞌun kui xo̱jo̱o̱n, jún xi jaꞌájinjnú Néná nga xota̱ tsjiee̱ kui ka̱majnú jún. Néná xí Na̱ꞌminá ko̱jo Ndi̱a̱ná Jesukristoo̱ nga tsja̱ajnú kjo̱a̱ndaa̱ ko̱jo kjo̱a̱xioó.

Pabloo̱ bi̱ tsꞌén kamámejeén kijí na̱xi̱ńdá Roma̱

8Tjón mára tsjàa̱ ndokꞌóchjì Néná ta̱ngatꞌaa̱ Jesukristoo̱ kjo̱a̱a̱ ngayejejnú, ngatꞌa̱ kjo̱a̱sꞌijinjnú ngayeje són nga̱sondiee̱ nga tjindókjo̱a̱. 9Néná kui xi ngayeje ini̱ma̱na nga tjítsꞌen an xaá nga tsꞌénꞌbini̱jmì án éntjatsi̱e̱e̱ ndií, be nga ngatsjéni̱xtjin tsꞌénchji̱a̱tjejnúꞌun, kjiꞌanga chjiáa̱ kui. 10Kó ꞌniú míꞌáa̱ tsi mejeén Néná nga ka̱ma tsja̱ndièna nga kjuínkátsijenjnúꞌun. 11Ngatꞌa̱ mejénna skuiejnúꞌun tsi̱ꞌe̱ nga tsjajnúꞌun ngo kjo̱a̱nda xi tsjá A̱si̱énni̱xtjii̱n tsi̱ꞌe̱ nga ꞌniú ku̱i̱ndyionjnú. 12Mejénna nga ja̱kꞌi̱e̱ ja̱ngaján ko̱e̱ꞌéngaꞌniúu̱ xingi̱ xikótsꞌèn sꞌijinná.

13Jún ntsꞌie, mejénna nga xcha̱jnú nga antꞌe̱na nga mejénna nga kjuínkónjnúꞌun, ta̱nga ngongá kjiꞌa fotjokjàna kje̱ꞌe ni xi bosíkjo ni xi je tjíndana. Mejénna kjuínkónjnúꞌun tsi̱ꞌe̱ nga sa̱ꞌin an ngi̱jinjnú xá xi katsjána Jesukristoo̱, xikó katsꞌen an ngi̱jii̱n xota̱ xi ngasee̱. 14Chjiéngá sa̱ꞌin an kui xaá ngi̱jii̱n ta̱ꞌya xota̱ní, tsi xi ngriengo̱, ko̱jo tsi xi ngriengo̱jín, tsi xi kjínkón, ko̱jo tsi xi kjínkónjín. 15Kó bo̱a̱ tsꞌén nga je tikónda an tsi̱ꞌe̱ nga kꞌuini̱jmìjnúꞌun éntjatsi̱e̱e̱ Jesukristoo̱ jún xi tindyiónjnú na̱xi̱ńdá Roma̱.

Bi̱ tsꞌén íni̱jmì Pabloo̱ kjo̱a̱a̱ ngaꞌniuú éntjatsi̱e̱e̱ Néná

16Ngatꞌa̱ soboájín mána kjo̱a̱a̱ éntjatsi̱e̱e̱ Néná xí ꞌbini̱jmì án, ngatꞌa̱ kuí xí ngaꞌniuú Néná tsi̱ꞌe̱ nga kjo̱tjoꞌa ngayeje xota̱ xi sꞌijii̱n, tsi xota̱ xi jundío̱ ko̱jo tsi xota̱ xi jundío̱jín. 17Ngatꞌa̱ éntjatsi̱e̱e̱ bokóní xikótsꞌèn nga Néná tsjaá xotaa̱ nga kixi̱ ka̱ma ngindyi̱ko̱n kui, ta̱ngatꞌanii̱ nga sꞌijii̱n. Bo̱a̱ ma ngatꞌa̱ sꞌijii̱n, xikótsꞌèn kjitꞌa xo̱jo̱n eén Néná: “Xi kixi̱ ngindyi̱ko̱n Néná, ta̱ngatꞌanií nga sꞌijii̱n nga kꞌuijñáni nga̱sondie.”

Bi̱ tsꞌén íni̱jmì Pabloo̱ kjo̱a̱a̱ jé xí katsꞌén xotaa̱

18Néná ndeskande ndiꞌakꞌajmi jàn bokóní kjo̱a̱xcha̱án kondra̱ tsi̱ꞌe̱ ngayeje xota̱ xi bendikónjín, ko̱jo xi ni xi kixi̱jín ndyi̱tsꞌèn ngindyi̱ko̱n. Kuí xotaa̱ xi ndyi̱ꞌbíchjaá nga xcha̱ ni xi ja̱koxi̱i̱. 19Ngatꞌa̱ ni xi ya kjo̱a̱a̱ Néná, jè be nda nda kui xotaa̱, ngatꞌa̱ ti̱kuíní Néná xi akoó. 20Ngatꞌa̱ Néná ndeskande koó nga ítjatsꞌennii̱ nga katsꞌénda nga̱sondiee̱, ni xi yàjín kjo̱a̱a̱ kui, xikoó ngaꞌniú xi tjiín ngatsjéni̱xtjin, ko̱jo nga kui xi Néná, ka̱ma xcha̱ kui nii̱, kjo̱a̱a̱ ni xi je katsꞌénda. Kó kui xota̱ xi ndajiín ka̱májín bo̱a̱ ka̱tso̱ nga bejín ni xi ndyi̱tsꞌèn. 21Ngatꞌa̱ ndatsi xotaa̱ ja̱bo̱a̱ je kamábe Néná, katsjájiín kjo̱a̱je xikoó nga kui xi Néná, ti̱nde katsjájiín ndokꞌóchjì, ta̱sá ni xi jmí ni chjíjiín xi katsꞌénkjó, kó ta̱sá katsꞌéntajá ini̱ma̱a̱. 22Xota̱ xi kjínkón katsoó yojoo̱, kó ta̱sá xota̱ xi kitikjo̱a̱ kamá. 23Kó asíkjo kjo̱a̱je tsjie xi tsi̱ꞌe̱ kui Néná xi tikón ngatsjéni̱xtjii̱n, kó kje̱ꞌe ni katsꞌéndikón, ni xi kjiyojotꞌa a̱sie̱én xota̱, ko̱jo ni̱sie, ko̱jo cho̱ xi tjiín nijón sé, ko̱jo ye̱.

24Kó kuíni nga Néná ki̱a̱ índomasien ngi̱jii̱n ni ndándí xi kamámejeén ini̱ma̱a̱, nga ja̱kꞌi̱e̱ ja̱ngaján katsꞌénjo̱ yojoo̱ ni xi chꞌokjiꞌi. 25Asíkjo nga kjo̱a̱ndiso katsꞌén ni xi ja̱koxi̱i̱ Néná, kó ta̱sá katsꞌéndikón ni xi kiniꞌándaa̱, ngindiee̱ nga Néná xí sa̱ꞌíndikón, kui Néná xí katsꞌénda nga̱sondiee̱, kui xi ta̱ kjiꞌání nga nganiꞌántsjaà. Bo̱a̱ kjiꞌi.

26Kó kuíni nga Néná índomasien ngatꞌa̱ katsꞌén ni xi soboá mána ñá nga ya, ngatꞌa̱ ngaskande ínchjiín, ngiti̱ xi xi̱ꞌínjín xi katsꞌéntsjajo̱ yojoo̱ xikó kjiꞌi ndi̱ya̱à Néná, 27ti̱ bo̱a̱ ti̱ katsꞌén jáxíꞌiín nga, ngiti̱ ínchjínjín xi katsꞌéntsjajo̱ yojoo̱ xikó kjiꞌi ndi̱ya̱à Néná, kó ítsꞌi̱yanii̱ nga ja̱kꞌi̱e̱ ja̱ngaján katsꞌénmején xkjín, ngatꞌa̱ katsꞌén ni xi soboá mána ñá nga ya, kó ndajín tsꞌén íchjí kjo̱a̱a̱ ni xi ndajín xi katsꞌén.

28Kó nga akó kui xotaa̱ nga kamámejénjiín katsꞌénseén Néná, Néná índomasien tsi̱ꞌe̱ nga kjo̱tsòn kjo̱a̱kjíntakoón, tsi̱ꞌe̱ nga sa̱ꞌín ni xi májín niꞌán. 29Katsꞌén ngayeje to̱ko̱ya ni xi kixi̱jín, katsꞌén kjo̱a̱tondo̱, kamámejeén ni xi tsi̱ꞌe̱jín, kisꞌiee̱ kjo̱a̱ton, kisꞌiee̱ kjo̱a̱ꞌontakón, katsꞌénkꞌién xkjín, kisꞌiee̱ kjo̱a̱xti, tsꞌenṉcha̱jo xkjín, katsꞌén ni xi ndajín. 30Tsíchji̱a̱taꞌin xkjín, chꞌo kamaá Néná, katsꞌén ni xi májín niꞌán ngindyi̱ko̱n xotaa̱, chꞌokon kamá, ti̱kuii je tsꞌaxié yojoo̱, katsꞌéntsijen ni xi ndajín, tsintꞌiéꞌénjiín xi xchaá. 31Kitikjo̱a̱ kamá, katsꞌénkjatjosónjín xaá, kamábejín xikó kjiꞌi ndi̱yà xí ndaa̱, jmíjín xi kamáꞌniuú, kó ni̱ma̱jín kamaá xkjín. 32Jè be kui xotaa̱ nga kjo̱a̱kitii̱ Néná tsó nga ngayeje xota̱ xi tsꞌén kuí nii̱, chjiéngá ko̱yà, ta̱nga jmí tsi ta̱ ta̱kó bo̱a̱ ndyi̱tsꞌèn tsi, ngaskande tsja maa̱ kjo̱a̱a̱ xota̱ xi ndyi̱tsꞌèn kuí nii̱.

Currently Selected:

Xota̱ Roma̱ 1: MAIX

Highlight

Copy