Xota̱ Roma̱ 2

Bi̱ tsꞌén íni̱jmì Pabloo̱ kjo̱a̱a̱ nga Néná kixi̱ ko̱tíjé

1Kó kuíni nga ta̱ ꞌyání ji, nde jmíjín kó sé jí kjiꞌanga tiꞌbítꞌejé jí xota̱ xi ngasee̱, nga bo̱a̱ tiniꞌín, ti̱ jíní xi timindyijée̱ yojòo̱, ngatꞌa̱ ti̱ bo̱a̱ ti̱ tiniꞌín xikó ndyi̱tsꞌèn kuí xotaa̱ nga. 2Ta̱nga jè yàjne̱ nga Néná kixi̱ tsꞌén ko̱tíjeé xota̱ xi bo̱a̱ ndyi̱tsꞌe̱én. 3Kó ji xi tiꞌbítꞌejé kje̱ꞌe xota̱, kó ti̱kuii kui nii̱ tiniꞌín ndatsa ji nga, a ka̱maári kjo̱tjoꞌàa̱ yojòo̱ kjo̱a̱a̱ kjo̱a̱botíjeé Néná. 4Axa̱ niꞌínchꞌí jí kjo̱a̱cho̱o̱n kjo̱a̱ndaa̱, kjo̱a̱chiyákjo̱a̱a̱ ko̱jo kjo̱a̱ndaxota̱a̱ Néná, kó niꞌínkiejín ji yojòo̱ kjo̱a̱a̱ kjo̱a̱nda xi tsꞌénbokoó ndi̱yà tsi̱ꞌe̱ nga si̱ꞌinkꞌoyé ji yojòo̱. 5Ta̱nga ta̱ngatꞌanii̱ kjo̱a̱kitikjo̱a̱a̱ ko̱jo nga ini̱màa̱ mejénjiín sa̱ꞌínkꞌoyà, kuíni nga tiꞌbítikíi̱ kjo̱a̱xchán yojòo̱, ni̱xtjin nga Néná sa̱ꞌínxchán ko̱jo nga ko̱kó nga kixi̱ tsꞌén ko̱tíjé, 6kjiꞌanga Néná ku̱i̱ꞌíchjií nga ngo nga ngo xotaa̱ xikó kjiꞌi ni xi katsꞌén. 7Kjo̱a̱mindyion ngatsjéni̱xtjin tsja̱á xota̱ xi ndyi̱koyakjo̱a̱ nga ta̱ngongá ni xi nda ndyi̱tsꞌèn, kó nga ndyi̱mongase nga sa̱ko̱ó kjo̱a̱je, ko̱jo kjo̱a̱yandikón, ko̱jo nga kꞌuíndo ngatsjéni̱xtjin. 8Ta̱nga kjo̱a̱xcha̱án Néná ko̱tíjénií xota̱ xi kitikjo̱a̱a̱, ko̱jo xi ndyi̱tsꞌènkjátjosónjiín ni xi ja̱koxi̱i̱, nga ta̱sá ni xi kixi̱jiín xi ndyi̱tsꞌènkjátjosoón. 9Kjo̱a̱ni̱ma̱ ko̱jo kjo̱a̱boa sa̱ko̱ó ngayeje xota̱ xi ndajín ndyi̱tsꞌèn, tsi xota̱ jundío̱ ko̱jo tsi xota̱ jundío̱jín. 10Ta̱nga kjo̱a̱je, ko̱jo kjo̱a̱yandikón, ko̱jo kjo̱a̱xió sa̱ko̱ó ngayeje xota̱ xi ni xi nda ndyi̱tsꞌèn, tsi xota̱ jundío̱ ko̱jo tsi xota̱ jundío̱jín.

11Néná skjánjín tsꞌénjo̱ xotaa̱. 12Ngatꞌa̱ ngayeje xota̱ xi katsꞌénjé nga bejín kjo̱a̱kitii̱ Moisee̱, ti̱ kuí xí xcha̱jani nga jmí tsi kjo̱a̱kitii̱ xi ka̱majénií. Kó ngayeje xi katsꞌénjé nga be kjo̱a̱kitii̱, ti̱ kuí xí xcha̱jani nga kjo̱a̱kitii̱ xi ka̱majénií. 13Ngatꞌa̱ jmí tsi xota̱ xi ta̱kuítsí kjo̱a̱kitii̱ ntꞌieé xi kixi̱ síndo ngindyi̱ko̱n Néná, kuí boá xota̱ xi kixi̱ síndo xi ndyi̱tsꞌènkjátjosón kjo̱a̱kitii̱. 14Ngatꞌa̱ kjiꞌanga xota̱ xi jundío̱jín xi bejín kjo̱a̱kitii̱ tsꞌénkjátjosón ni xi tsó kjo̱a̱kitii̱ Néná, ndatsi bejín kui kjo̱a̱kitii̱, ti̱kuíní xi kjo̱a̱kiti kjimaa̱ ni xi ndyi̱tsꞌèn. 15Kó bokó nga ngi̱jin ini̱ma̱a̱ tjítꞌa ni xi bokoyá kjo̱a̱kitii̱. Ngatꞌa̱ kjiꞌanga tsꞌénkjó ngo ni, jè be tsi nda ko̱jo tsi ndajínkjiꞌi kui nii̱. Kó kjo̱a̱kjíntakoón tsóyaà tsi nda ko̱jo tsi ndajínkjiꞌi ni xi ndyi̱tsꞌèn. 16Bo̱a̱ ka̱ma ni̱xtjin nga Néná tsja̱axaá Jesukristoo̱ nga kui xi ka̱tso̱yà tsi nda ko̱jo tsi ndajínkjiꞌi ngayeje ni xi ꞌma xi síndoo̱ xotaa̱, xikó tsó éntjatsi̱e̱e̱ Néná xi tsꞌénꞌbini̱jmìjnúꞌun.

Bi̱ tsꞌén íni̱jmì Pabloo̱ kjo̱a̱a̱ xota̱ jundíoo̱ ko̱jo kjo̱a̱kitii̱

17Ta̱nga ji xi bo̱a̱ tꞌísé nga xota̱ jundío̱ ji, kó nga kjo̱a̱kitii̱ kjimaꞌnítakín, ko̱jo nga tsja maa̱ nga Néná sꞌijii̱n. 18Jè yé ji ni xi mejeén Néná nga si̱ꞌin ji, kó ye ji mí ni xi nda ngatꞌa̱ kjo̱a̱kitii̱ bokoyaá ji. 19Kó ꞌnítakín ji yojòo̱ nga ji xi xikó maá ngo nda̱ xi ko̱ko̱ó ndi̱ya̱à ngo nda̱ xi ti̱ka̱, ko̱jo tsi ji xi xikoó ngo ndiꞌí tsi̱ꞌe̱ xota̱ xi síndo jñoó. 20Ji xi mostroo̱ xota̱ xi jmí ni bejín, ko̱jo mostroo̱ jákjíndí kjimá ji, ngatꞌa̱ tikoón kjo̱a̱kitii̱ xikoó ngo ni xi kjínkón ko̱jo ni xi ja̱koxi̱. 21Ji xi tibokoyée̱ kje̱ꞌe xota̱, ánní nga ta̱sájín yojòo̱ tibokoyée̱. Ji xi tiꞌbíni̱jmìi̱ xotaa̱ nga májín niꞌánchejé, kó a niꞌínchejéjín ji. 22Ji xi bo̱a̱ tꞌísée̱ xotaa̱ nga májín tsꞌéntꞌaa̱kjo̱a̱ xkjín, ta̱nga, a bo̱a̱jín tiniꞌín ji. Ji xi bo̱a̱ tꞌísée̱ xotaa̱ nga ka̱májín ngo a̱sie̱én ngo ne xi tsꞌénda xotaa̱ sa̱ꞌíndikón, kó ji a tiniꞌínchejéjíi̱n na̱ngo̱xi̱i̱ a̱sie̱én ni xi Néná ndyi̱tsoó xotaa̱. 23Ji xi achichí je ꞌnaxié yojòo̱ nga bo̱a̱ tꞌísé nga ye ji kjo̱a̱kitii̱ Néná, a timiyinijín ji kui kjo̱a̱kitii̱ nga tiyendikínjín ji Néná. 24Ngatꞌa̱ bi̱ tsꞌén kjitꞌa xo̱jo̱n eén Néná: “Ta̱ngatꞌanii̱ jún, nga xota̱ xi jundío̱jiín chꞌo ndyi̱tsoó Néná.”

25Nga ja̱koxi̱ tsi kiniꞌínkjatjosén ji kjo̱a̱kitii̱, sirkunsisioo̱n chjírií, ta̱nga tsi kiniꞌínkjatjosénjín ji kjo̱a̱kitii̱ xikónií tsi jmíjiín sirkunsisioo̱n. 26Tsi xota̱ xi jundío̱jín katsꞌénjiín sirkunsisio̱n yojoo̱, ta̱nga tsi ndyi̱tsꞌènkjátjosón ni xi tsó kjo̱a̱kitii̱ Néná, xikónií tsi katsꞌeén sirkunsisio̱n yojoo̱. 27Kó tsi ngo xota̱ xi jmíjiín sirkunsisioo̱n, ta̱nga tsꞌénkjátjosón cha̱n cha̱n kjo̱a̱kitii̱, kuí boá xi ka̱tso̱yà tsi nda ko̱jo tsi ndajín tiniꞌín ji, ji xi ye ji kjo̱a̱kitii̱ ko̱jo kjo̱a̱sirkunsisioo̱n kó tiniꞌínkjatjosénjín ji. 28Ngatꞌa̱ jmí tsi yojoo̱ xi bokó ꞌyání xi jundío̱, ti̱nde jmí tsi sirkunsisioo̱n xi niꞌán ja̱koxi̱i̱ yojoo̱ xi ja̱koxi̱ nga kui xi sirkunsisio̱n. 29Kuí xí xota̱ jundío̱ xi xota̱ jundío̱ ngi̱ya yojoo̱ nga, kó sirkunsisio̱n xi ndaa̱ kuí xí xikoó tsi ngi̱jin ini̱ma̱a̱ xotaa̱ nga kiniꞌaán, kó A̱si̱énni̱xtjii̱n Néná boá xi bo̱a̱ tsꞌén, jmí tsi kjo̱a̱a̱ xikó tsó kjo̱a̱kitii̱. Néná boá xi tsꞌénjóꞌo xota̱ xi ja̱koxi̱ nga ngi̱jin ini̱ma̱a̱ nga kiniꞌaán sirkunsisioo̱n, kó jmí tsi xotaa̱.

Currently Selected:

Xota̱ Roma̱ 2: MAIX

Highlight

Copy