Ni xi kamá 28

Bi̱ katsꞌén Pabloo̱ tji̱ngi̱ Malta̱

1Kó kjiꞌa ngije jatjoꞌajne̱ yojojne̱, kjiꞌanga kamáyàjne̱ nga Malta̱ ꞌmí kui tji̱ngi̱i̱. 2Kó xota̱ xi síndo kui ngi̱ndiee̱ kjén nga ta̱ nda katsꞌénjo̱jne̱ ngayejejne̱, kó nga je stsé kjiboaꞌa, ko̱jo nga achichí nchꞌàn, ngo ndiꞌí ítsié kósꞌe̱ tsíchji̱a̱jne̱ tsi̱ꞌe̱ nga tsangínkindyiontꞌajne̱ kui ndiꞌií. 3Kó ngije Pabloo̱ jaꞌátikó chikín kixí xi tsꞌénmindyiájin ngi̱jin ndiꞌií, kó ngo ye̱ xi tsꞌénmongaa̱ sibeé iskjiniee̱ tsja Pabloo̱. 4Kó nga kamábe kui xota̱ xi chji̱a̱ni kui tji̱ngi̱i̱ nga tsja Pabloo̱ tji̱e̱ngiboaꞌa kui ye̱e̱, bi̱ katsó ja̱kꞌi̱e̱ ja̱ngajaán xkjín:

–Nda̱ tsꞌenkꞌién ini̱ma̱rá kui nda̱a̱, ngatꞌa̱ ndatsi jatjoꞌaa̱ yojoo̱ ngi̱jin ndáchíkoón, ta̱nga kjo̱a̱kixi̱i̱ Néná katsjandièjiín nga kꞌuijñá ngase.

5Ta̱nga Pabloo̱ ki̱a̱ ítsaniejin ngi̱jin ndiꞌií kui ye̱e̱, kó jmí ni kamájiín. 6Kó ngayeje kui xotaa̱ ndyi̱koyaa̱ nga ka̱maske, ko̱jo tsi ta̱niján má ko̱yà ndyi̱tsó, ta̱nga jaskan ngi̱chí sájín, nga kamábe nga jmí ni kamájiín, kje̱ꞌe ni katsꞌénkjó nga ngora̱ ne Pabloo̱ katsó.

7Kó tiña kui ngi̱ndiee̱ kjín xoꞌba kisꞌie xi tsi̱ꞌe̱ ngo nda̱ xi nkꞌa xaá xi chji̱a̱ni kui tji̱ngi̱i̱, xi ꞌmí Publio̱, xi kjén nga ta̱ nda katsꞌénjo̱jne̱ nga kixindyionjne̱ ki̱a̱a̱ ján ni̱xtjin. 8Kó na̱ꞌmii̱ kui nda̱ xi ꞌmí Publioo̱ kjiꞌijñaꞌon nga ṉtꞌe̱ ndyi̱a̱a̱ ko̱jo chiꞌin tji̱jmájín tjiín, kó Pabloo̱ kijíkatsijee̱n, kó ngije tsíchji̱a̱a̱ Néná, íjñasoón tsja, kósꞌe̱ kamándaya. 9Ngije kamá kui nii̱, jeꞌekoón Pabloo̱ kje̱ꞌe ngase xota̱ xi oo̱n xi tjín kuí tji̱ngi̱i̱, kó bo̱a̱ tsꞌén ngayejee̱ nga kamándaya, 10kó achichí nda katsꞌénjo̱jne̱ ngayeje kui xotaa̱, kó jaskan ngije ndyi̱mongín nginíjne̱ ngi̱ya tjotso jee̱, katsjájne̱ ngayeje ni xi kamáchjiénjne̱ tsi̱ꞌe̱ ndi̱ya̱à.

Bi̱ tsꞌén jachó Pabloo̱ na̱xi̱ńdá Roma̱

11Ngije kamájne̱ ján sá nga kixindyionjne̱ kui tji̱ngi̱i̱, tsanginyájne̱ ngo tjotso je xi ki̱a̱ jaꞌaa̱ cho̱nchꞌaàn, xi chji̱a̱ni na̱xi̱ńdáꞌniú Alejandriya̱, xi kjitꞌa a̱sie̱én ne xi ꞌmí Kastoo̱r ko̱jo Poluu̱ks. 12Kó nga jáchójne̱ na̱xi̱ńdáꞌniú xi ꞌmí Sirakusa̱, ján ni̱xtjin kamájne̱ nga kixindyionjne̱ ki̱a̱a̱, 13kó ki̱a̱ jatjo nginíjne̱ ngaskande nga jáchójne̱ na̱xi̱ńdáꞌniú Rejio̱, kó ingo ni̱xtjin ngase kisꞌie ngo tjo̱ xi kjindibáni xtji̱e̱e̱n na̱ngi, kó ngaskande xi ingo ni̱xtjii̱n jáchójne̱ na̱xi̱ńdáꞌniú Puteoli̱, 14nínga kasakojne̱ já ntsꞌie xi bo̱a̱ katsójne̱ nga ngo xomana̱ ku̱i̱ndyionjo̱jne̱ ki̱a̱, kó bo̱a̱ tsꞌén ngaskande nga fetꞌa tsangínjne̱ na̱xi̱ńdá Roma̱. 15Kó já ntsꞌie xi chji̱a̱ni na̱xi̱ńdá Roma̱ ja̱bo̱a̱ jè tsintꞌié kuí eén kjo̱a̱a̱ ji̱n, kó kuíni nga kijíkjaꞌáyíndi̱yàjne̱ ngaskande ngo ngi̱ndie xi ꞌmí Foro̱ tsi̱ꞌe̱ Apioo̱, ko̱jo ngi̱ndie xi ꞌmí Ján Taberna̱, kó nga kamábe kui jaá, Pabloo̱ katsjaá ndokꞌóchjì Néná, kó ꞌniú tsja kamá ngasee̱. 16Kó nga jáchójne̱ na̱xi̱ńdá Roma̱, jájuún katsjandiè nga xín kisꞌijña Pabloo̱, ta̱nga ta̱ ngo nda̱jun xi askondá.

Pabloo̱ Bi̱ tsꞌén íni̱jmì eén Néná na̱xi̱ńdá Roma̱

17Kó nga ja̱bo̱a̱ je ján ni̱xtjinnii̱ nga jachó na̱xi̱ńdá Roma̱, Pabloo̱ tsíchji̱a̱a̱ ngayeje xota̱ xi síndotjoón xota̱ jundío̱ xi síndo na̱xi̱ńdá Roma̱, kó ngije kamátikó yeje kui jaá, bi̱ katsoó:

–Jún já ntsꞌie, nde ngo ni tjítsꞌenjín an kondraa̱ xota̱ jundíoo̱, ti̱nde kondraa̱ kjo̱a̱xchá xí tjiín xota̱ tji̱e̱ xcháná, ta̱nga ta̱kó bo̱a̱ tsꞌén ki̱a̱ na̱xi̱ńdáꞌniú Jerusale̱n kiniꞌánkꞌasꞌienna ngi̱ya tsja xota̱ Romaa̱, 18kui xota̱ xi jaskan ngije katsꞌénkijentsꞌoana kamámejeén íjñandéna, ngatꞌa̱ jmí jé kasakojiín kjo̱a̱a̱ an tsi̱ꞌe̱ nga si̱ꞌankꞌienna, 19ta̱nga xota̱ jundíoo̱ katsjandièjín, kó kuíni nga tsíꞌá an nga nda̱ xtitjoón xi ko̱ngasee̱ tsi tjínna jé ko̱jo tsi jmíjínna, ndatsi jmíjínna ngo ni xi kongítaꞌin an xota̱ na̱xi̱ńdána. 20Kó kuíni nga tsíchji̱a̱ yejejnúꞌun jún, tsi̱ꞌe̱ nga skuiejnúꞌun kó xiyàjnúꞌun, ngatꞌa̱ ta̱ngatꞌanii̱ kui ni xi ndyi̱chiyáa̱ ñá xí xota̱ Israee̱l, kó kuíni nga bi̱ tsꞌén tjitáꞌniú án kꞌi̱e̱e̱.

21Kó kui jaá, bi̱ katsoó Pabloo̱:

–Ji̱n, nde ngo xo̱jo̱n tjinángiyàjínjne̱ xi chji̱a̱ni nangi Jundea̱ xi chji̱a̱ kjo̱a̱a̱ ji, ti̱nde ngojín já ntsꞌie jundío̱ xi ndyi̱ndibání jàn xí chꞌo tsꞌén ndyi̱chji̱a̱ kjo̱a̱a̱ kondra̱ tse̱. 22Mejénjne̱ ko̱nda̱ꞌyájne̱ kótsꞌèn niꞌínkjé jí, ngatꞌa̱ jè yàjne̱ nga ta̱jñàní tjindókjo̱a̱ kjo̱a̱a̱ kondraa̱ kui ndi̱yà tja̱tsi̱e̱e̱.

23Kó ngije ngo ni̱xtjin ikꞌíjñaá, achichí xota̱ jachókoón Pabloo̱, kui xi katsóyaà kjo̱a̱a̱ xikótsꞌèn ko̱tíxoma Néná ndeskande nga ta̱jño̱ó ngaskande nga kamángixoón, kamámejeén Pabloo̱ nga sa̱ꞌínꞌindakon kui xotaa̱ kjo̱a̱a̱ Kjisoo̱, nga katsꞌénkjién xo̱jo̱n kjo̱a̱kitii̱ Moisee̱, ko̱jo xo̱jo̱n xi katsꞌénꞌindó jáchji̱ni̱e̱ꞌe̱én Néná. 24Kó tjín xí kisꞌijii̱n ni xi katsó Pabloo̱, kó tjín xí kisꞌijinjiín nga, 25kó nga jmí ni índajín, ńgó ńgó kijí, kó Pabloo̱ ta̱ bi̱ tsí katsoó:

–Achichí nda tsíchji̱a̱jo xota̱ tji̱e̱ xchájnú A̱si̱énni̱xtjii̱n Néná nga katsꞌénkíchji̱a̱ nda̱chji̱ni̱e̱ꞌe̱én Néná xi ꞌmí Isayaa̱, nga bi̱ katsó:

26Tꞌen ji, kó tꞌíyée̱ kui xota̱ na̱xi̱ńdaá:

Ndatsi ꞌniú ko̱nda̱ꞌyájnú, ta̱nga ka̱makjínjínjnú,

ko̱jo ti̱ ndatsi ꞌniú stsitsíjenjnú, nde xcha̱jínjnú,

27ngatꞌa̱ ta̱nisién ꞌniú tajá ini̱ma̱a̱ kui xota̱ na̱xi̱ńdaá,

kó katsꞌénxtiya yojoo̱,

kó íchjá ndyi̱ko̱n,

tsi̱ꞌe̱ nga ka̱májín sku̱i̱e̱, ti̱nde ka̱májín ku̱i̱ntꞌiè,

ko̱jo ti̱nde kamákjínjiín,

tsi̱ꞌe̱ nga ánjín kjo̱e̱ꞌe̱kónna,

kó nga ka̱májín án sa̱ꞌindaya an.

28Jún ngatamayajnú nga ngotꞌe̱ ꞌne̱, Néná tsꞌéntsjaá kjo̱a̱ꞌnaxiéꞌaá xota̱ xi jundío̱jín, kó ta̱sá kuí xi ku̱i̱ntꞌiè kuí eén.

29Kó ngije katsó kui nii̱, já jundíoo̱ kijí, kó tsíchji̱a̱tijo̱ xkjín.

30Kó Pabloo̱ jó nó chi̱bo̱a̱ chi̱bo̱a̱ kamaá nga kisꞌijña ngo ndiꞌa xi íchjí sá, nínga katsꞌénseén ngayeje xota̱ xi jachókoón, 31kó nde jmíjín xi katsꞌénniꞌii̱n nga íni̱jmì eén kjo̱a̱a̱ xikótsꞌèn ko̱tíxoma Néná, ko̱jo nga akóyá kjo̱a̱a̱ Ndi̱a̱ná Jesukristoo̱.

Currently Selected:

Ni xi kamá 28: MAIX

Highlight

Copy